Gensei Ryu o Genseiryū (玄制流) ye un estilu de karate con raigaños nel Tomari-te, ún de los tres estilos orixinales del karate d' Okinawa, Xapón. Creólu Seiken Shukumine (1925–2001), que combinó téuniques clásiques coles sos anovaciones propies p'asina desendolcar les especiales carauterístiques del Gensei Ryu. Shukumine tuvo dos maestros conocíos, Sadoyama y Kishimoto.

Gensei Ryu
Tamién Genseiryu, Gensei Ryu Karate-do
Fecha de fundación 1950 (oficialmente en 1953)
País d'orixe Okinawa,  Xapón
Fundador Seiken Shukumine (1925-2001)
Métodos téunicos Sen, Un, Hen, Nen, Ten
Ancestros Tomari-te
Escueles derivaes Butokukai, Nippon Karate-dō Budō Kyokai, Genwakai, Ryounkai, Keneikai, Seidokai

El nome Gensei Ryu usóse pela primer vez en 1953. Esti nome fórmenlu en xaponés tres caráuteres (kanji) diferentes: 玄制流. El primeru ye gen 玄 y significa 'misterioso', 'atapao', y 'universu', pero tamién 'una verdá esnidiosa y fonda'. El segundu ye sei 制 y tórnase a 'control', 'sistema', 'llei' o 'regla', pero tamién 'crear una forma.' El postreru ye ryū 流, que significa cenciellamente 'estilu' o 'escuela.' La combinación gensei 玄制 podía tornase a 'controlar l'universu', pero miembros de la escuela interpreten que significa daqué como "dir en cata de la verdá fonda y asoleyala per aciu de la forma," lo que puede considerase dende un puntu de vista tanto físicu como espiritual.

Historia editar

El Gensei Ryu tien raigaños nun antiguu estilu de karate llamáu Tomari-te. Delles fontes argúin que'l raigañu ye'l Shuri-te, pero sicasí les diferencies son mínimes teniendo en cuenta que dambos estilos deriven del Shōrin-ryū. Nos años 1920 y 1930 fálase de tres estilos principales n'Okinawa. Estos tres estilos (Naha-te, Tomari-te y Shuri-te) llámenlos dacuando más en xeneral Karate d'Okinawa, y recibíen esos nomes de les tres ciudaes onde se desarrollaron: Naha, Tomari y Shuri.

Matsumura "Bushi" Sōkon (1809–1898) foi ún de los maestros del Shuri-te. Tuvo munchos estudiantes que dempués llegaron a ser lleendes del karate, como Yasutsune (Ankō) Itosu. Un alumnu menos conocíu foi Bushi Takemura, que desarrolló una versión del kata (型) Kushanku que tovía entrenen güei en Gensei Ryu y en Bugeikan. Ún de los alumnos de Takemura foi Kishimoto (1862–1945, anque delles fontes daten la nacencia nel 1868), que foi l'últimu maestru de Seiken Shukumine.

Seiken Shukumine, nacíu'l 9 d'avientu de 1925 en Nago, na isla xaponesa d'Okinawa, empezó con 8 años coles lleiciones de karate d' Ankō Sadoyama, un gran maestru de koryū karate ("téuniques chines de la vieya escuela"). Esti entrenólu cuatro años. Cuando Shukumine tenía alredor de 14 años, foi aceptáu por Kishimoto.

Kishimoto yera mui selectivu: solamente tuvo nueve discípulos en tola vida, y Seiken Shukumine tuvo qu'aporfiar munches veces enantes de que Kishimoto decidiera aprendelu. Los últimos dos estudiantes de Kishimoto fueron Seiken Shukumine y Seitoku Higa (nacíu nel 1920). Otra fonte afita que Kishimoto esaminó a Seiken Shukumine enantes d'aceptalu como estudiante. Cuando Shukumine y Kishimoto se conocieron, ésti garró un atizador y arrefundió un cachu de carbón de lleña con toles sos fuercies haza Shukumine, que lu esquivó. Kishimoto aceptólu como estudiante con una condición: que-y prometiera caltener les téuniques en secretu.

Na Segunda Guerra Mundial Shukumine foi reclutáu con 18 años pa l' armada y tuvo que s'aunir al Cuerpu Xaponés de Kamikaze, donde llegó a ser pilotu "kaiten", una embarcación d'un solu home llena d'esplosivos qu'usaben nos ataques suicides kamikaze contra los buques de guerra americanos. Seiken Shukumine entrenábase pa empobinar esta pequeña embarcación per entemedios de la maralla proteutora de rede d'aceru qu'estraben pel agua alredor de los buques pa protexelos de los ataques d'estos kaiten. Él pensaba nuna manera d' arte marcial de maniobrar ente estes redes d'aceru y tentaba d'atalantar téuniques pa refugar los torpedos enemigos. Aprendió que tenía que trabayar duro pa calistrar les defenses enemigues, y el so maxín d'artista marcial vio cómo esi enfoque podía adaptase al karate tradicional pa enveredase a una forma de combate más flexible y dinámica.

Val Dios qu'a Shukumine nunca lu nomaron pa un ataque suicida y sobrevivió a la guerra. Pero cuando tornó pa la so patria alcontró qu'Okinawa taba esbarrumbada poles bombes y que'l so maestru Soko Kishimoto morriera cuando la Batalla d'Okinawa en 1945. Shukumine retiróse en soledá un par d'años y entamó a crear el so estilu de karate calteniendo na megolla'l so entrenamientu como pilotu kaiten. Combinó les sos téuniques nueves coles clásiques qu'aprendiera de los sos maestros Sadoyama y Kishimoto, desendolcando asina les carauterístiques especiales del Gensei Ryu.

 
El Maestru Seiken Shukumine

En 1949, na ciudá d' Itō (Prefeutura de Shizuoka, Xapón), Seiken Shukumine demostró públicamente les sos téuniques de karate pela primer vez. N'ochobre de 1950 Shukumine participó nuna exhibición de karate organizada pola televisión xaponesa. Nesta demostración participaron tamién otros maestros como Hidetaka Nishiyama (de l'Asociación Xaponesa de Karate, JKA), Yasuhiro Konishi (Ryobukai) Ryusho Sakagami (Itosukai), H. Kenjo (Kenshukai), Kanki Izumikawa y Shikan (Seiichi) Akamine (dambos de Gōjū-ryū). Shukumine demostró ente otres coses el kata koshokun dai, tameshiwari (téunica de rompimientu, nesti casu Shukumine rompió 34 teyes col shutō, el cantu de la mano abierta) y hachidan-tobi-geri (patada múltiple en saltu, con 8 pataes d'un saltu). A primeros de los 1950 Shukumine creó'l sansai no kata, una obra maestra del karate Gensei Ryu.

En 1953 Shukumine empecipió a dar lleiciones na base militar Tachikawa a les Fuercies d'Autodefensa de Xapón, y nos 10 años siguientes dio lleiciones en munchos dojos (p.e. n'universidaes y grupos corporativos) na redolada del área de Tokiu. Nesi añu 1953 Shukumine sopelexó oficialmente que les sos téuniques yeren Gensei Ryu, pero suel mencionase l'añu 1950 como'l d'entamu del Gensei Ryu.

En 1962 Shukumine creó un nuevu arte marcial, un desendolcu avanzáu del Gensei Ryu que llamó Taido. Pero'l Taido nun ye karate, sinón un nuevu arte marcial. De magar entós, Shukumine tuvo principalmente implicáu nel Taido y munchos de los sos alumnos empecipiaron a entrenase tamién nél. Sicasí dellos estudiantes de Taidō caltuvieron una rellación amistosa con dellos estudiantes de Gensei Ryu y Shukumine siguió de xemes en cuando aconceyando colos sos antiguos alumnos.

En 1964 Shukumine espublizó'l so llibru Shin Karatedō Kyōhan nel que describe les bases del Ko-ryu Karate-do. Nel llibru descríbense mui bien de kata, téuniques y materiales d'entrenamientu, esplíquense a fondu dellos kata, con semeyes:

  • Ten-i no Kata
  • Chi-i no Kata
  • Jin-i no Kata
  • Sansai
  • Koryū Naifanchi
  • Koryū Bassai
  • Koryū Kusanku

Ye dicir añade los kata creaos por él: Ten-i no Kata Chi-i no Kata Jin-i no Kata y Sansai. Pero menciónense más kata nesti llibru, ensin semeyes; un total de 44 kata incluyendo Taikyoku-Shodan, Tensho-no-Kata, Wankan, etc. L'autor refierse a los conteníos de Shin Karatedō Kyōhan como koryū (古流), que se considera karate de la 'antigua tradición' o de la 'vieya escuela', pero tamién menciona'l nome Gensei Ryu unes cuantes veces.

Dende los años 1960 el Gensei Ryu entamó a espardese tamién fuera de Xapón, a países como EXA, España, Finlandia, Holanda, Dinamarca, Australia, Brasil, India, etc.

El 26 de payares de 2001 morrió Seiken Shukumine d'un paru cardiacu, dempués de seis años de malura. Tenía 75 años y dexaba muyer, un fíu y dos fíes.

Carauterístiques del Gensei Ryu editar

Shukumine tamién yera conocíu como filósofu, y cuando la guerra aprendió que facer daqué inesperao o imprevisto ye'l secretu de la victoria, igual nuna guerra ente dos naciones como nuna simple amarradiella ente persones. N'otres pallabres, la filosofía básica del Gensei Ryu persigue esta idea de facer lo inesperao.

Shukumine pescudaba cómo aplicar esta idea non solo na vida sinón tamién nel Gensei Ryu Karate y nos sos kata. Col tiempu creó la teoría básica de "Sen, Un, Hen, Nen y Ten. Estos son los principios básicos que faen al Gensei Ryu un estilu de karate tridimensional:

  • Sen (torbolín): movimientu circular vertical de la exa'l cuerpu (rotar, xirar);
  • Un (foles): movimientu fachendosu arriba y abaxo nes direiciones de p'alantre y p'atrás;
  • Hen (nubes): movimientu de cayida arrémente p'alantre y p'atrás, o a derecha y a izquierda;
  • Nen (marexada, remolín): téuniques de xirar usando manes y brazos, principalmente executaes nel sitiu;
  • Ten (lluminoso): una téunica nuna situación inesperada creada al xirar al frente, xirar atrás y xirar a un llau.

"Sansai" ye'l que se perconoz como típicu kata del Gensei Ryu, con bayura d'estes téuniques. Otres téuniques xenuines del Gensei Ryu son les pataes ebi-geri (patada trasera con dambes manes en suelu y la cara cerca'l suelu) y manji-geri (patada llateral o mawashi-geri cola cabeza cerca'l suelu y dambes manes en suelu). Dambes pataes tan nel grupu llamáu shajo-geri (cuerpu qu'apoya) y fáenles tamién en Taido. Arriendes de kata, en Gensei Ryu prautícase tamién shihō y happō (tamién lo faen otros estilos, anque non toos). Shihō' traduzse como 'cuatro direiciones' y compriende exercicios nos que se repite varies veces una combinación de téuniques en cuatro direiciones diferentes (alantre, atrás, derecha, izquierda). Cuasi ye lo mesmo con happō, pero este traduzse como 'ocho direiciones', colo qu'abarca exercicios n'ocho direiciones diferentes.

Dempués de 1962 editar

Dempués de que Shukumine dexara d'enseñar Gensei Ryu en 1962 (quitando nunes poques ocasiones), dalgunos alumnos crearon les sos propies organizaciones de Gensei Ryu pa siguir con esti estilu a los sos deleres. Ente otros son les siguientes: Butokukai (fundada tres años enantes de que Shukumine dexara oficialmente'l karate y dirixida por Kunihiko Tosa), Nippon Karate-dō Budō Kyokai, Genwakai, Ryounkai, Keneikai y Seidokai. La organización de Gensei Ryu más antigua qu'inda esiste anguaño ye la Federación Internacional de Genseiryū Karate-do (1959).

Introducción n'España editar

 
Sensei Kohata

L'introductor del Karate-Do Gensei Ryu en España, y amás pioneru del Karate n'Asturies, ye'l maestru Hiromichi Kohata (Tokiu, 19 d'avientu de 1944), alumnu de los maestros Setsuzo Kuruji, Sadao Ayase, y del mesmu Seiken Shukumine. El maestru Kohata introduxo'l Gensei Ryu n'Asturies en 1970, ya inda güei esta ye la comunidá autónoma onde más se prautica esti estilu.

El Maestru Kohata entamó a enseñar Gensei Ryu nos ximnasios Sukurakan y Takeda II, de Xixón, y nel Takeda d' Uviéu. En 1971 sacó n' España ‘l títulu d'Entrenador Nacional de Karate y fizo na villa asturiana de L'Entregu una exhibición énte l'entós Príncipe Xuan Carlos de Borbón.

En 1985 el sensei Kohata funda l'Asociación Gensei Ryu Karate-Do d'España y espubliza un llibru de kates del estilu Gensei Ryu. Esi mesmu añu traxo a España al so maestru Setsuzo Kuruji pa xuntar criterios téunicu-metodolóxicos.

Munchos de los maestros y competidores de karate más destacaos d'Asturies y d'España fueron, o son tovía, alumnos del maestru Kohata. Ente otros: Carlos Valdés, Rodolfo Suárez, Ignacio Rodríguez Fanjul, José Luis Prieto, Ángel Arenas, Lino Gómez Feito, José Manuel Rodríguez[1] Ente ellos tan los primeros estudiantes de Karate qu'hubo n'Asturies, razón pola que'l Gensei Ryu foi munchos años l'estilu más prauticáu equí.

Referencies editar

  1. [https://www.lne.es/campeones/2010/04/07/maestros-taira-kohata/897107.html Artículu de José Manuel Rodríguez sobre los maestros Taira y Kohata, pioneros respeutivamente del Yudu y del Karate n'Asturies

Enllaces esternos editar