Wikipedia

Jeet Kune Do

El jeet kune do (chinu: 截拳道; cantonés: jihtkyùhndouh; pinyin: jiéquándaò; “vía del puñu qu'interceuta”) ye un arte marcial principalmente de mano vacía, creáu por Bruce Lee alredor de 1967.

Jeet Kune Do
Emblema del Jeet Kune Do
El Taijitu representa los conceptos del yin y el yang. Los caráuteres chinos signifiquen: "Usar el non camín como camín" y "Tener la non llende como llende". Les fleches representen la interaición sin fin ente’l yin y el yang.
Tamién JKD, Jeet Kun Do, Jun Fan Jeet Kune Do
Enfoque Eclécticu
Fundador Bruce Lee
Paternidá Wing Chun, kung fu, boxéu, esgrima
Deporte olímpicu Non
Sitiu oficial Bruce Lee Foundation
Cambiar los datos en Wikidata

Filosofía y principios editar

El jeet kune do nun ye propiamente un estilu de llucha, sinón más bien un conceutu, que consiste nel estudiu de delles artes marciales o d'otros tipos de deportes al envís de desendolcar la propia práutica. El prauticante absuerbe lo que ye útil pa él, refuga lo que nun lo ye y amiesta lo que ye de so.

Atópense equí elementos del wing chun, un arte marcial chinu que prauticara Bruce Lee con Yip Man y Wong Shun Leung enantes de colar pa los Estaos Xuníos. El jeet kune do posia pataes propies d'otres artes marciales chines del Norte, asina como golpes de boxéu, esgrima, hapkido, kali/eskrima y jujutsu; hasta elementos inspiraos nel boxeador Mohamed Ali. El jeet kune do (en curtio dacuando JKD), magar que provién de les artes “tradicionales”, ruempe cola ética avezada: ye llícito dafechu morder, sacar los güeyos, cutir nos xenitales; darréu que ye un métodu de combate en situaciones reales. Ye importante pescanciar que Bruce Lee cautivó la idea de "fluxu", ello ye, de cambéu constante; el prauticante nun tien que s’apegar al so arte, hai que facelu evolucionar, ye inútil caltener la tradición si nun la facemos espoxigar. El lluchador ye’l que fai al arte y non l'arte’l que fai al lluchador. El lluchador esprésase per aciu del so arte, y como toos somos diferentes caún esprésase de forma diferente.

La exa del jeet kune do ta muncho nel desarrollu físicu, la defensa personal y el combate. Insiste sobre too na noción de combate real y total.

Otru puntu esencial del JKD ye l'ausencia de formes marciales, que’l fundador xulgaba inútiles. Nun ye que nun supiera tamién apreciales, pero nun ye cuestión d'estilos: trátase sobre too d'una filosofía, y los que pudieron escuchar a Bruce Lee en vida recuerden les sos capacidaes nestes árees.

Carauterístiques téuniques editar

1. Economía estructural rigorosa nel ataque y na defensa (ataques de reflundiu colos miembros adelantraos, defenses con manes pegañoses “chi sao”).

2. “Armes” camudables, pataes y puñaes solmenaos “con arte sin arte”, ensin venceyase a los métodos, pa evitar el paralís.

3. Ritmu rotu, ritmu mediu y ritmu enteru o ritmu de tres cuartos (ritmu del JKD nel ataque y el contrataque).

4. Entrenamientu con peses, entrenamientu científicu suplementariu y puesta a puntu completa.

5. Movimientos direutos (el "movimientu direutu del JKD") nos ataques y contrataques, llanzándolos dende la posición na que se ta, ensin volver a ella.

6. Movilidá del troncu y xuegu de piernes llixeru.

7. Trabayar suelto, con táutiques d'ataque inesperaes.

8. Cuerpu a cuerpu despiadáu:

  • a. truñada engañosa
  • b. valtu
  • c. prinda zarrada
  • d. inmovilización

9. Fortalecimientu de tol organismu per aciu del combate total y con contautu, sobre blancos móviles.

10. “Armes” potentes per aciu d'un ameyoramientu continuu.

11. Espresión de la individualidá y non producción de mases, vitalidá y non aplicación muerta de regles clásiques.

12. Amás de los movimientos físicos, entrenamientu de la “continuidá del yo espresivu”.

13. Totalidá, non parcialidá estructural.

14. Relaxación y entrada potente en xunto; pero una relaxación plena d'elasticidá, como un muelle, non un cuerpu físicamente dondu. Arriendes de flexibilidá mental.

15. Fluxu ininterrumpíu (movimientos reutos y curvos, a nivel altu y baxu, a derecha y a izquierda, pasos llaterales, oscilación vertical y circular del troncu, movimientos circulares coles manes)

16. Caltenimientu constante d'una posición bien equilibrada al movese. Continuidá ente tensión máxima y relaxación máxima.

El JKD dempués de Bruce Lee editar

Anque oficialmente Bruce Lee peslló les sos escueles d'artes marciales dos años enantes de la so muerte, autorizó que’l so programa fuera enseñáu en priváu. Dempués de la so muerte’l jeet kune do dixebróse en dos grupos principales estremaos, que son escurque:

  • La rama llamada JKD Orixinal (o Jun Fan JKD). Ente los sos promotores tán Taky Kimura, Yap Mat, James Lee, Jerry Poteet y Ted Wong. Dicen enseñar lo que se creye que yera lo qu'en concreto enseñó Bruce Lee en vida, y afalen a los estudiantes a desendolcar a fondu les sos habilidaes a traviés d'eses enseñances. Los principios d'entrenamientu propios d'esta rama tán formaos pol conceutu estáticu de lo que fuera “enseñao n’orixe”, como por casu los sistemes d'artes marciales “tradicionales” de sieglos d'antigüedá reconocibles como “estilos”, resalvando lo referío a la filosofía del “estilu sin estilu”.
  • La rama Conceutos del JKD, representada ente otros por Dan Inosanto, Richard Bustillo, o Larry Hartsell. Estos grupos esfórciense por siguir la filosofía d'espresión de la propia individualidá per aciu de reinterpretar sistemes de combate al traviés de la lente del Jeet Kune Do, atalantando qu'esto nun significa que se trate d'un arte estáticu, sinón sobre too d'una evolución constante, y incorporen elementos de munches otres artes marciales a la embelga principal de les sos enseñances, sobre too material de “grappling” (sistemes d'agarre y llucha) y de Kali/Eskrima (sistemes filipinos). Básense pa esta escoyeta nes sos preferencies personales y n’atributos físicos individuales. El “sistema” completu del JKD pue describise como un simple diagrama, y los conceutos pueden asina aplicase a una bayura de contestos d'una forma “universal”.

Bibliografía editar

  • Fernando, Mª Isabel. “Bruce Lee, el pequeño dragón”. Ed. VidaLibre, 1995
  • Lee, Bruce. Chinese Gung Fu, the Phylosophical Art of Self-defense, 1963. ISBN 0-89750-112-8
  • Lee, Bruce. “The Estáu of Jeet Kune Do”. U.S.: Ohara Publications Inc., 1975. ISBN 0-89750-048-2
  • Yilmaz, Yuksel. “Philosophia of Jeet Kune Do”. T.R.: Yalin Yayincilik, 2008. ISBN 978-9944-313-67-4

Referencies editar

Enllaces esternos editar

Sacáu de «https://ast.wikipedia.org/w/index.php?title=Jeet_Kune_Do&oldid=3615343»