Satélites d'Uranu

Uranu, el séptimu planeta del sistema solar, tien 27 satélites conocidos y con nomes definitivos. Mentantu que la mayoría de los cuerpos celestes del nuesu sistema solar reciben nomes de la mitoloxía grecorromana, les llunes uranianes reciben los de so de diversos personaxes de les obres lliteraries de William Shakespeare y Alexander Pope. William Herschel descubrió les dos primeres, Titania y Oberón, en 1787; lleven el nome de la reina y el rei de les fades de la obra shakesperiana A midsummer's night dream (El sueñu d'una nueche braniega). Otres dos llunes de forma esférica foron descubiertas en 1851 por William Lassell. Los sos nomes, como los dos anteriores, foron decidíos por Herschel, a pitición de Lassell, en 1852. Esti decidió nomalas Ariel, como la sílfide del poema The rape of the lock (El rizu robáu), d'Alexander Pope, y un personaxe de The tempest (La tempestá) de William Shakespeare; y Umbriel, como otru personaxe d'El rizu robáu. La cabera de les llunes clásiques (les que foron descubiertes primero de la era espacial) foi descubierta en 1948 por Gerard Kuiper, y recibió'l so nome, Miranda, d'otru personaxe de La tempestá. El viaxe de la sonda espacial Voyager 2 y l'ayuda de modernos telescopios permitieron atopar los otros ventidós satélites uranianos.

En 1986 la sonda Voyager 2 descubrió otros diez satélites, con un diámetro que varía (menos el de Puck, que tien 160 km) ente los 40 y 80 km de diámetru. Son, n'orde alfabéticu, Belinda, Bianca, Cordelia, Creseida, Desdémona, Julieta, Ofelia, Porcia, Puck y Rosalina. Cordelia y Ofelia son satélites pastor de los bordes interior y esterior del anillu épsilon, el más esternu d'Uranu. Los otros ocho tienen órbites circulares ente los anillos y Miranda, que ye la más interior de les llunes clásiques; Puck ye'l más cercanu a ella. Los satélites restantes foron descubiertos na década de 1990 gracies al telescopiu espacial Hubble.

Les llunes d'Uranu divídense en trés grupos: cinco llunes grandes, yá nomaes; trece llunes interiores; y nueve llunes de forma irregular. Les llunes interiores son pequeños cuerpos oscuros que comparten colos anillos del planeta les sos propiedaes y el so orixe. Les llunes grandes son lo bastante grandes pa tener algamao el so equilibriu hidrostáticu, y en cuatru d'elles hai nicios d'actividá interna, col desendolcu de procesos volcánicos y de formación d'escobios na so superficie. La mayor de toes, Titania, tien 1.578 km de diámetru, lo que la convierte, con una masa venti veces menor que la de la Lluna, na octava lluna más grande de tou el sistema solar. Toles anteriores orbiten ente Uranu y Oberón. Per fuera d'elles orbiten, n'orbites mui elíptiques y perinclinaes y mui alloñaes del planeta, les llunes irregulares.

Tabla de datos editar

Nome	Diámetru(km)	Masa(kg)	Radiu orbital mediu (km)	Periodu orbital (días)
Cordelia	40,2	4,5×10¹⁶	49.752	0,3350
Ofelia	42,8	5,4×10¹⁶	53.764	0,3764
Bianca	51,4	9,3×10¹⁶	59.165	0,4346
Crésida	79,6	3,43×10¹⁷	61.767	0,4636
Desdémona	64	1,78×10¹⁷	62.659	0,4737
Julieta	93,6	5,57×10¹⁷	64.358	0,4931
Porcia	136	1,68×10¹⁸	66.097	0,5132
Rosalinda	72	2,54×10¹⁷	69.927	0,5585
Cupido	12	1,2×10¹⁵	74.800	0,618
Belinda	80,6	3,57×10¹⁷	75.255	0,6235
Perdita	80	4×10¹⁷	76.400	0,6380
Puck	162	2,89×10¹⁸	86.004	0,7618
Mab	16	4×10¹⁵	97.730	0,923
Miranda	472	6,59×10¹⁹	129.872	1,4135
Ariel	1158	1,35×10²¹	191.020	2,5203
Umbriel	1169,4	1,17×10²¹	266.300	4,1442
Titania	1577,8	3,52×10²¹	463.300	8,7059
Oberón	1522,8	3,01×10²¹	583.519	13,4632
Francisco	12	1,3×10¹⁵	4.276.000	266,56
Calibán	98	7,3×10¹⁷	7.231.000	-579,73^*
Stefano	20	6×10¹⁵	8.002.000	-676,5^*
Trínculo	10	7,5×10¹⁴	8.571.000	-758,1^*
Sicorax	190	5,4×10¹⁸	12.179.000	-1.288,28^*
Margarita	11	10¹⁵	14.345.000	1687,01
Próspero	30	2,1×10¹⁶	16.243.000	-1.977,29^*
Setebos	30	2,1×10¹⁶	17.501.000	-2.234,77^*
Ferdinando	11	1,3×10¹⁵	20.901.000	2887,21^*