Shuhari
Shuhari (守破離) ye un conceutu de les artes marciales xaponeses que describe les tres etapes del aprendimientu, o camín haza la maestría. Aplícase tamién en Xapón al procesu d'aprendimientu n’otres artes y oficios.
Etimoloxía editar
El términu shuhari nun ye propiamente una pallabra, sinón una amestadura de tres caráuteres independientes. El conxuntu d'estos tres kanjis pue traducise aproximao como "primero aprender, dempués dixebrase, y finalmente trescender". Esto interprétase como: “siguir les enseñances, adautar les enseñances y superar les enseñances”. D’esta miente:
- 守 (Shu): "protexer", "obedecer". Ye la forma tradicional de llegar a la sabencia, aprendiendo les bases y les téuniques per aciu de la imitación del maestru.
- 破 (Ha): "dixebrase", "separtase". Ye romper cola tradición, adautar les téuniques a les nueves realidaes, atopar nuevos enfoques.
- 離 (Ri): "marchar", "degolar". Ye algamar la trescendencia. Acabóse la sabencia tradicional; yá nun hai llendes y tolos movimientos son naturales, llegándose a ser unu col espíritu ensin enferronase a les formes. Tresciéndese lo físico.
Esplicación editar
El maestru d'Aikido, Shihan Seishiro Endo, afirmó:
"Ye conocío que, cuando aprendemos o entrenamos dalgo, vamos pasando les etapes de shu, ha, y ri. Estes etapes esplíquense como sigue. En shu repetimos les formes y nos disciplinamos al envís de que los nuesos cuerpos absuerban les formes creaes polos nuesos antepasaos. Caltenémonos fieles a les formes ensin esvianos. Llueu, na etapa d'ha, una vez disciplinaos p'adquirir les formes y los movimientos, facemos anovaciones. Nesti procesu les formes pueden desfacese y escartase. Pa cabu, en ri, separtámonos dafechu de les formes, abrimos la puerta a la téunica creativa y aportamos a una situación onde actuamos acordies colo que’l corazón/mente de nueso desea, ensin torgues anque ensin salise de les normes.”[1]
Historia editar
El conceutu de shuhari presentólu primero Fuhaku Kawakami como “jo-ha-kyū” nel “Tao del Té”, significando que les aiciones o esfuercios tienen qu'empezar amodo, dempués entainar, p'acabar rápido. Llueu, Zeami Motokiyo (c. 1363–c. 1443), maestru del teatru clásicu “Noh”, estendió esti conceutu a la so danza como shuhari, qu'había convertise tamién en parte de la filosofía del Aikido. Shuhari ye asina mesmo parte central de la filosofía del Shorinji Kempo.
Pue considerase shuhari como un conxuntu de círculos concéntricos, con Shu dientro d'Ha, y dambos dientro de Ri. Les téuniques y conocimientos fundamentales nun cambien.[2]
Na fase Shu l'estudiante tien de siguir llealmente la instrucción d'un maestru; nun ta tovía preparáu pa percorrer y comparar caminos diferentes.[3]
Conceutos asemeyaos editar
Delles artes marciales chines o wushu, tienen un conceutu asemeyáu de tres etapes de camín a la maestría:
- 地 di (Tierra): Son les bases. Esperimentar movimientos nos niveles básicos.
- 人 ren (Home): Preparaos p'aprender (dellos grandes maestros de les artes marciales chines comparen la entrada nesti nivel col 1ᵉʳ Dan del sistema xaponés de graos de cintu negru).
- 天 tian (Cielu): Pensamientu non consciente, movimientos como los elementos. Esta etapa lleva años d'entrenamientu y preparación con otros grandes maestros.
Referencies editar
- ↑ An Interview with Endô Seishirô Shihan. Aiki News, Dou, No. 144 (2005). Translated by Daniel Nishina and Akiya Hideo
- ↑ http://www.shuhari.com/site/view/ShuharisMeaning.pml Significáu de Shuhari
- ↑ McCarthy, Patrick, "The World within Karate & Kinjo Hiroshi" in Journal of Asian Martial Arts, V. 3 No. 2, 1994.