Wikipedia

Soo Bahk Do

Soo Bahk Do ye’l nome del arte marcial fundáu y enseñáu pol Kwan Jang Nim Hwang Kee, el so socesor Hwang Hyun Chul (conocíu como H.C. Hwang), y los instructores certificaos poles organizaciones miembros de la Organización Mundial Moo Duk Kwan.[1]

Historia editar

El maestru Hwang Kee combinó les artes coreanes llariegues de defensa personal (Soo Bahk Ki y Tae Kyun) con otros principios de combate (Kung Fu chinu del Norte y del Sur) y referencies morales como la filosofía del Do (Tao), No Ja (Lao Tzu) y Kong Ja (Confuciu), no que se conoz anguaño como Soo Bahk Do (Tangsudo) Moo Duk Kwan. Al desendolcar l'arte marcial, Hwang Kee basóse muncho nun testu antiguu, el Muye Dobo Tongji (Manual Completu Ilustráu de les Artes Marciales de l'Antigua Corea. [2]

Hwang Kee creó’l Moo Duk Kwan el 9 de payares de 1945. Primero foi afaláu a estudiar les artes marciales en 1921, cuando tenía unos siete años. Taba nuna aldea vecina nun festival tradicional llamáu "Dan O", onde había tiru con arcu, llucha y munchos otros festexos. Tando Kee esfrutando del festival, un grupu de siete u ocho homes engarráronse con otru. De sópitu atacaron toos al home que taba solu, qu'entós principió a esquitar y a contratacar colos pies, quedando nuna puerta pa poder enfrentase a unu de cada vez, llegando a vencer a tol grupu. Esta habilidá pa defendese contra dellos atacantes ablucó a Hwang Kee que nesi momentu supo que quería deprender artes marciales.

Hwang Kee estudió dellos años y pescudó munches fontes. Hai quien diz que lu reconocieron como maestru a los 22 años. En mayu de 1935 Hwang Kee entamó a trabayar pa la compañía coreana de ferrocarriles, lo que-y permitió viaxar. En mayu de 1936 conoció a un maestru chinu de Kung Fu llamáu Yang, Kuk Jin, col qu'entrenó hasta 1946. Daquella China taba pasando pela revolución comunista. L’entrenamientu consistía en Seh Bop (postures), Bo Bop (pasos), Ryun Bop (acondicionamientu) y Hyung (formes) coles sos aplicaciones. El 9 de payares de 1945 Hwang Kee fundó’l Moo Duk Kwan, que tien como ideal básicu’l desarrollu de los sos prauticantes. Individuos fuertes en cuerpu y n’espíritu faen comunidaes fuertes, y comunidaes fuertes faen naciones fuertes; les naciones fuertes y pacífiques faen un mundu fuerte y en paz.[3] En 1957 descubrió nel Muye Dobo Tongji’l Soo Bahk, un verdaderu arte marcial coreanu. Kee desendolcó’l sistema Soo Bahk pa que s’estudiara per aciu del Moo Duk Kwan. Escoyó’l nome Soo Bahk Do, deriváu de Soo Bahk Ki, téunica de golpiar coles manes, y de Soo Bahk Hee, danza de golpiar coles manes, qu'asoleyaba’l Muye Dobo Tongji. En 1960 l'Asociación Coreana de Soo Bahk Do almitióse y rexistróse oficialmente nel gobiernu de Corea como arte marcial tradicional coreanu.

Vistimienta editar

Pa la práutica nel dojang úsase un dobok asemeyáu al karategi xaponés, que lleva a la izquierda del pechu l'escudu de la escuela. Ye de color blancu, simbolizando la pureza.

En Soo Bahk Do ponse muncha atención na etiqueta, polo que’l dobok ha amosase siempre nun estáu bien presentable.

Dende cinturón verde (6u kup) la solapa ye del mesmu color que’l cinturón. Esto ye, dende’l 3er kup ye bermeyu hasta’l 1er kup, y nos danes el cintu y la solapa son azul marino, non negru como n’otres artes marciales. Esto ye porque Hwang Kee caltenía qu'un prauticante nun algama nunca la perfeición, el conocimientu dafechu d'un estilu y, poro, el so cinturón nun pue ser negru dafechu.

Dende’l 4u dan el cintu tien pel mediu, a tolo llargo, una franxa de color bermeyu.

Graduaciones editar

Hai 10 kups o gups (cinturones de colores):

  • 10u kup: blancu. El blancu representa la pureza de la nieve ivernizo, onde too ta por escribise.
  • 9u kup: naranxa con una raya blanca. El naranxa ye un encontu pedagóxicu ensin significáu simbólicu dalu.
  • 8u kup: naranxa con dos rayes blanques.
  • 7u kup: naranxa con tres rayes blanques.
  • 6u kup: verde con una raya blanca. El verde representa la primavera y el florecimientu del prauticante.
  • 5u kup: verde con dos rayes blanques.
  • 4u kup: verde con tres rayes blanques.
  • 3u kup: bermeyu con una raya blanca. El bermeyu representa la fuercia y asóciase col españíu del branu.
  • 2u kup: bermeyu con dos rayes blanques.
  • 1u kup: bermeyu con tres rayes blanques.

Dempués de los kups, vienen los danes:

  • 1er dan: azul marino, una raya blanca. L’azul representa la sabiduría, la madurez y la paz, y asóciase a la seronda.
  • 2u dan: azul marino, dos rayes.
  • 3er dan: azul marino, tres rayes.
  • 4u dan a 9u dan: azul marino, una franxa bermeya central a tolo llargo’l cintu (simboliza la fuercia aplicada con sabiduría).

De primer a tercer dan los prauticantes/instructores son denomaos Kyo Sa (Nim) (instructor); dende’l cuartu dan, Sa Bom (Nim) (modelu/exemplu). El “Nim” ye una partícula de respetu que dediquen a la persona nomada los que tienen un rangu menor. A un estudiante avanzáu que nun sía instructor llámenlu Sam Be (Nim).


El significáu de los colores de los cintos ye netu al de los colores del escudu.

El cinturón anaranxáu foi agregáu por Hwang Kee nel añu 1975 pa que los prauticantes de Soo Bahk Do llegaren a ser danes con más conocimientos.

Bandera editar

L’escudu del estilu ta formáu pola figura d'un puñu derechu doráu (dacuando anaranxáu) vistu de frente, arrodiáu a los llaos por dos cañes de lloréu, con 14 fueyes y 6 frutos encarnaos caúna.

Embaxo’l puñu alcuéntrase un pergamín o cinta en color azul marino colos kanjis Su - Mu - Bahk.

Puñu: lo marcial (honor, xusticia, fortaleza).

Fueyes: 14 a cada llau representen les 14 provincies de Corea y tamién la paz. La simetría representa l'harmonía.

6 Frutos encarnaos: los cinco continentes au se prautica anguaño’l Su Bahk Do - Mu Duk Kwan; y la Lluna o voluntá de facelu llegar a toles partes.

pergamín: alude al conocimientu.

Caráuteres: Soo: mano; Mu: lo marcial; Bahk: golpe. El “Mu” interpónse metanos el golpe de mano, “Soo Bahk”, pa recordanos que non solo hai qu'aprender a lluchar, sinón a decidir cuándo facelo.

Los colores del escudu:

Blancu: iviernu (pureza, la nieve onde nun hai nada escrito.)

Anaranxáu: ye la transición ente l'iviernu y la primavera.

Verde: primavera (esporpolle.)

Bermeyu: branu (fueu, fuercia, enerxía, cabeza activa.)

Azul: seronda (madurez, collecha, agua como símbolu de sabiduría.)

Terminoloxía editar

Nesti arte marcial la denomación de téuniques, posiciones, formes, etc. faise en coreanu.

Los siguientes términos trescríbense cola pronunciación aproximada.

Posiciones editar

  • CHASE: posición.
  • CHUN BI CHASE: posición de sollerte, en pie colos puños preparaos delantre la cintura.
  • BARO CHASE: posición de tornar, neta al chun bi, pero llámase asina cuando se fai pa terminar.
  • CHUN GUL CHASE: posición llarga, pesu p'alantre.
  • JU GUL CHASE: posición de tigre (o gatu nel Kárate xaponés), pesu p'atrás.
  • KI MA CHASE: posición de xinete, pesu centráu.
  • SA KO RIP CHASE: posición de xinete a 45º. (sustituye a Ki Ma y ye más sana pa les rodiyes)
  • CHUNG GAN CHASE: posición intermedia.
  • KYO CHA RIP CHASE: posición con pies cruzaos.

Téuniques de mano (Su Ki) editar

Golpes editar

  • KONG KYOK: ataque o golpe.
  • SANG DAN KONG KYOK: golpe altu (base de la nariz).
  • CHUNG DAN KONG KYOK: golpe mediu (al plexu solar).
  • WENG YIN KONG KYOK: golpe de llau (davezu en KI MA CHASE).
  • CAP KWON: golpe colos nudiellos mayores (golpe de revés).
  • SU DO KONG KYOK: golpe col cantu la mano.
  • KWAN SU KONG KYOK: golpe cola punta los deos.
  • CHANG KWON: golpe cola palma la mano.
  • KWON DO: mazazu p'abaxo.
  • PAL KUP KONG KYOK: golpe col coldu.
  • PAL MOK: golpe cola parte interna de la moñeca.

Defenses editar

  • MAKI: defensa.
  • JA DAN MAKI: defensa baxa.
  • SANG DAN MAKI: defensa alta.
  • ANESO PAKURO MAKI: defensa d'adientro p'afuera.
  • PAKESO ANURO MAKI: defensa d'afuera p'adientro.
  • SU DO MAKI: defensa col cantu la mano.
  • SANG SU MAKI: defensa con encontu (defensa doble).

Téuniques de pie (Yok Ki) editar

  • CHA GUI: patada.
  • AP CHA GUI: patada normal de frente.
  • AP CHA NUT GUI: patada de frente (golpiando col metatarsu).
  • FU RYO CHA GUI: patada de frente col cantu’l pie.
  • YOP CHA GUI: patada reuta de llau.
  • AP PODO OL LI GUI: estiramientu frontal (exerciciu).
  • YOP PODO OL LI GUI: estiramientu llateral (exerciciu).
  • DOLLIOP CHA GUI: patada circular.
  • YOP JU RI GUI: patada de ganchu.
  • TWI CHA GUI: patada de xiru.
  • PIT CHA GUI: patada circular invertida.
  • ANESO PAKURO CHA GUI: patada descendente d'adientro p'afuera.
  • PAKESO ANURO CHA GUI: patada descendente d'afuera p'adientro.
  • PUT CHIT CHA GUI: patada descendente frontal.
  • SANG BAL CHA GUI: dos pataes a la vez.
  • MOO RUP CHA GUI: patada cola rodiya (rodiyazu).
  • I DAN: saltando.

Otres téuniques editar

  • MI RYO KONG KYUK: cabezazu.

Formes editar

En coreanu hyongs, les formes son secuencies de movimientos (ataques, bloqueos y exercicios de respiración nes más avanzaes) qu'imiten un combate real contra dellos oponentes.[4]

Hyongs de Kups editar

  • Ki Cho (Son 3 formes: Il Bu; I Bu y Sam Bu)

D’autor desconocíu, los Kicho foron sistematizaos pol Gran Maestru Hwang Kee.

Kicho significa “básico”. Sicasí esta forma tamién pue definise como “vientu o aliendu divín”, en realidá una idea d'orixe bíblicu que representa la forma primera de la creación de too per aciu un “soplu” de la divinidá, al ser estes formes les primeres en llegar a la conocencia del estudiante de Soo Bahk Do.

  • Pyong Ahn (son 5 formes)

Creaes pol Maestru Itosu. Significa “calma y seguridá”; la calma fai referencia al equilibriu internu de la persona, y represéntase por una balanza nos caráuteres kanji. La seguridá refierse al llar como llugar seguru (la casa y la muyer-madre nos kanjis).

  • Chil Song (son 7 formes)

Creaes pol Gran Maestru Hwang Kee. Significa “siete estrelles”; refierse a la séptima estrella de la constelación d'El Carru, la estrella del Norte que guiaba antiguamente a pastores y viaxeros cuando volaben perdíos, y nortiaben cola estrella del Norte. La motivación de les formes Chil Song ye guiar na sienda al prauticante de Mu Do, afalando’l so desenrollu como como artista marcial.

  • Passai

De creador desconocíu significa “escoyeta de les meyores téuniques en velocidá”, anque tamién se conoz como “arrodiar el muru defensivu del contrariu”.

  • Yuk Ro (son 6 formes)

Creaes pol Gran Maestru Hwang Kee. Significa “sestu", "el númberu 6" o "los 6 elementos”. Estes formes estráyense del Llibru de les Artes de Guerra Coreanes, el Muyei Dobo Tongi.

  • Yuk Ro Cho Dan (Du Mun Hyong)

Significa “puerta grande” y simboliza un ingresu pergrande a la conocencia marcial a traviés d'estes formes.

  • Naihanchi (son 3 formes)

Créyese que’l creador foi Jang Song Kye (fundador del Kang Yu Ryu). El nome orixinal d'estes formes ye Neh Bo Jin, que significa “avanzar dando pasos haza dientro” y l'usu equivocáu de la so pronunciación causó qu'anguaño se-yos llame Naihanchi.

Hyongs de Danes editar

  • Jindo

Creador desconocíu. Significa “avanzar y zallar” y el nome fai referencia a Pal Weh (8 direiciones). Tamién se creye qu'antaño esti nome denomaba filosóficamente una llucha a muerte ensin testigos no fondero la viesca.

  • Yuk Ro I dan (Jung Jol Hyong)

Significa “corte a la metá” y la interpretación del so significáu ye cortar a la metá la enerxía del contrariu.

  • Lo Hai Hyong

Creador desconocíu. Significa “ave sobro una pata” o “garra na piedra” y refierse a una cigüeña d'estes traces carauterizada pola gracia y la fachenda.

  • Yuk Ro Sam Dan (Po Wol Hyong)

Significa “abrazando la lluna”.

  • Sip Su Hyong

Creador desconocíu. Significa “diez manes”. La demostración téunica d'esta forma ye lenta, poderosa y pesada.

  • Kong Sang Kun Hyong

Llámase asina n’honor a un misioneru chinu del mesmu nome, qu'introduxo esta forma.

  • Yuk Ro Sa Dam
  • Yang Pyon Hyong

Significa “agarrar y tirar”

  • Wang Shu Hyong

Creada por Wang Shu, significa “pequeñu páxaru salvaxe”. La so téunica ye activa, llixera y rápida.

  • Sei Shan Hyong

Créyese que’l creador foi Jang Sam Bong (fundador del Tae Kuk Kwon). El nome de la forma rellaciónase coles trece influyencies básiques, a la so vez basaes en principios del Tae Kuk Kwon.

  • Yuk Ro O Dan
  • Sail Chu Hyong

Significa “martiellu que bancia”.

Defensa personal editar

La defensa personal (ho sin sul) del estilu tien agarres a les moñeques por parte del atacante de diferentes formes, y contra-téuniques por parte del defensor. Nel programa d'estudiu hai 27 secuencies predeterminaes de defensa personal.

Referencies editar

  1. ↑ Hwang, The History of Moo Duk Kwan, 1995.
  2. ↑ http://www.dynamic-korea.com/culture/view.php?main=LEC%E2%8A%82=HAN&uid=200500028484
  3. ↑ History
  4. ↑ Formes Soo Bahk Do en rhsbdc

Enllaces esternos editar

Sacáu de «https://ast.wikipedia.org/w/index.php?title=Soo_Bahk_Do&oldid=2655774»