Betula

xéneru de plantes
(Redirixío dende Abeduriu)

Betula ye un xéneru d'árboles de la familia Betulaceae y del orde Fagales. El nome común «abeduriu» designa a dellos distintos árboles caducifolios pertenecientes a esti xéneru; dacuando tamién se designa con esti nome a los omeros (Alnus glutinosa), árboles pertenecientes a la mesma familia. El so nome procede del llatín betūlla que de la mesma vendría de la pallabra betu que yera como los celtes designaben al abeduriu.

L'abeduriu sirve d'alimentu a un gran númberu de lepidópteros tales como Colotois pennaria, Campaea margaritata, Acoriques tiliae, Drepana binaria, Geometra papilionaria, Hemithea aestivaria y Phalera bucephala.

Morfoloxía y distribución editar

  • Altor: ente 10 y 30 m, dependiendo de la especie
  • Fueyes: simples, serraes, romboidales de 3 a 6 cm, variando llixeramente según la especie.
  • Cañes: flexibles y corteza ablancazada.
  • Flores: especie diclino monoica: el mesmu árbol tien flores masculines y femenines con amentos mariellos o verdes. El polen tien tres poros, tien forma esferoidal, de 20 a 25 µm de diámetru y superficie finamente granosa.
  • Distribución:  atopase por una gran parte del hemisferiu norte, n'Europa (nos países nórdicos lleguen a formar grandes montes), en parte d'Asia, América del Norte y el norte d'África.
  • Hábitat: rique zones soleyeres, suelos acedos y xilizos que tengan abondu mugor.

Especies editar

La siguiente llista nun ye completa y refierse namái a una clasificación pol so  orixe xeográficu. Pa la clasificación taxonómica, vease Especies de Betula.

Abedurios d'Europa y Asia
  • Betula albosinensis
    • Betula albosinensis var. septentrionalis - Abeduriu chinu de corteza colorada
  • Betula alnoides
  • Betula austrosinensis
  • Betula carpatica
  • Betula chinensis
  • Betula dalecarlica
  • Betula ermanii - Abeduriu de Erman.
  • Betula grossa
  • Betula jacquemontii (Betula utilis subsp. jacquemontii)
  • Betula kamtschatica - Abeduriu de Kamchatka platyphylla
  • Betula mandschurica
    • Betula mandschurica var. japonica
  • Betula maximowiczii - Abeduriu de Maximowicz.
  • Betula medwediewii
  • Betula #nana - #Abedul nanu.
  • Betula pendula - Abeduriu común, abeduriu blancu.
  • Betula platyphylla (Betula pendula var. platyphylla)
  • Betula pubescens
    • Betula pubescens subespecies trabancosa
  • Betula sukatschewii
  • Betula szechuanica (Betula pendula var. szechuanica)
  • Betula utilis

Aplicaciones editar

Los abedurios son árboles versátiles:

Tienen gran valor ornamental pola so corteza platiada, y el coloríu qu'adquier la so xamasca mientres la seronda. La cazumbre, la corteza, les fueyes, la madera, les ramines, y los raigaños utilizense pal alimentu, materiales de construcción, tratamientos melecinales, llubricantes y otros usos práuticos.

La madera utilizase pa faer pasta de papel y tinta d'imprenta; trabayase con facilidá polo que s'emplega pa mangos de ferramientes y otros oxetos de pequeñu tamañu; en Rusia ye usada pa tallar les matrioshki, les famoses muñeques ruses y otres obres de bixutería. La so madera ye escelente pal carbón.

Nel noroeste d'España ye bien emplegáu en plantíos lliniales de carreteres; en zones de borrines frecuentes son particularmente preseos, pos los sos tueros destaquen perbién na escuridá.

Los biltos d'abeduriu críen unos fungos que s'usaben nos países nórdicos pa curar l'alcoholismu.

La cazumbre fervida ye usada como enxagüe bucal pa les enfermedaes del gargüelu, ulceraciones de la boca, irritación de les melles, y una escelente loción detersiva pa llagues y úlceras.

La cazumbre del abeduriu tamién se bebe como tónicu o añadese al xarabe d'abeduriu, vinagre, cerveza, bebíes refrescantes y otros alimentos. El xarabe del abeduriu ye malo de fabricar, lo que-y fai más costosu qu'otros xarabes utilizaos n'alimentación.

Coles raigaños fai una pomada pa la piel qu'ayuda a la cicatrización de firíes, los granos, la sarna, les erupciones y pústulas de la piel.

Les fueyes, sobremanera seques, estornen les mosques y los tabanes que fadien a los animales domésticos. Tamién s'utilicen les fueyes pa faer té con propiedaes diurétiques y pal llogru d'estractos pa tintes y cosméticos. Les fueyes ensugaes al sol son escelentes pa los dolores reumáticos. Ayuden tamién a la trespiración de los pies evitando'l mal golor. Otru usu que se da a les fueyes fresques d'esti árbol ye la so aplicación sobre los pechos de les muyeres que dan de mamar, pa solliviar el dolor y pa contener la lleche.

Mitoloxía y simbolismu editar

Les sos fueyes, flexibles pero rectes fueron usaes p'axorizar a los malos espíritus; en Xapón, les mikos, muyeres sirvientes de los templos shinto xaponeses, llevaben a cabu dances ceremoniales nes qu'azotaben l'aire con cañes d'abeduriu p'axorizar a los onis; n'España ya Italia llantaben abedurios na entrada de los establos pa estornar a los demonios y pantasmes; los xamanes de Norteamérica usaben les cañes d'abeduriu pa los esconxuros.

Na antigua Roma, l'abeduriu yera símbolu de poder y autoridá; emplegábense les sos cañes p'afatar les cabeces de les persones importantes, denominándose fasces, d'onde vien el vocablu fascista.

En Xapón amás de tener la so función nos rituales sintoístes como yá se mentó, tenía una función como llinguaxe del amor nes muyeres: cuando una muyer llevaba una flor d'abeduriu significaba que taba disponible y regala-y dicha flor a un home yera una declaración romántica; una ramina desnuda significaba que la rellación nun podía llevase a cabu; los raigaños que taba casada; les fueyes qu'anque tuviera casada taba abierta a una rellación estramatrimonial.

 
Monte d'abedurios en Rusia.

Pa los celtes yera un árbol sagráu; yera l'árbol d'empiezu, símbolu de la renovación, de les nueves oportunidaes, lo que vuelve nacer. Esto debe a que ye de tolos árboles, el primeru qu'echa nueves fueyes. El so mes llunar ye del venticuatro d'avientu hasta'l venti de xineru.

Galería d'imáxenes editar

Referencies editar