Arquiteutura popular asturiana
L'arquitectura popular asturiana, pol so calter vernáculu, toma toes aquelles construcciones tradicionales, realizaes colos materiales qu'apurre naturalmente la redolada, afeches a les condiciones climátiques y a los requerimientos específicos de la vida y el trabayu les persones del llugar. Polo xeneral, trátase de viviendes o dependencies auxiliares construyíes polos sos mesmos habitantes, davezu cola collaboración de maestros y artesanos llocales. Los diseños, probaos y ameyoraos a lo llargo de los años, reproducen con pequeños cambeos, xenerando un estilu característicu. Nel casu d'Asturies, el so relieve montascosu aprove los materiales pa les construcciones con muries de piedra. Los teyaos o cubiertes inclinaos respuenden a les condiciones del clima, qu'inclúi temporaes d'abondoses agües y llargues nevaes.[1]
Tipoloxíes
editarCiertes formes d'esta arquitectura respuenden al so usu como vivienda familiar, otres son típicamente construcciones auxiliares destinaes al ganáu, la preservación de los enseres y ferramientes rurales o l'almacenaxe de les colleches. En dellos casos, les construcciones son de calter mestu o camudaron de destín a lo llargo del tiempu.
Viviendes
editarCasa terrera
editarTrátase d'una triba de casa llabradora con bona presencia nel pasáu que tiende a desapaecer col pasu del tiempu. Estes cases carauterícense pol so volume compauto, un solu nivel directamente sobro'l suelu, planta rectangular d'unos 50 m² de superficie, muries de piedra y techu a dos agües de cayueles, teyes o cubierta vexetal, por casu paya de centenu.[2]
Casa mariñana
editar
El so nome deriva de les descripciones de viviendes allugaes cerca de la mariña, anque esiste'l mesmu tipu de diseñu en llugares alloñaos de la mar. Verificóse la continuidá d'esta tipoloxía dende finales del sieglu XVI hasta mediaos del sieglu XX, coles variaciones propies de les necesidaes o pobibilidades de los sos propietarios.Trátase d'una construcción de planta rectangular, muries de piedra caliar o arenisca, cubierta a dos agües de teya, cola fachada empobinada xeneralmente pal sur.Na so forma más cenciella, l'interior ta subdividíu por dos muries estructurales. Una d'elles paralela a la fachada principal, traviesa la construcción dende unu a otru de les muries llaterales. La otra muria parte de la cara posterior de la casa y remata a una cierta distancia de la fachada principal, xenerando un espaciu semicubiertu a manera de portal o proteición del accesu y estremando de la mesma la construcción nuna estaya de vivienda y una estaya de serviciu, destinada a tenada, almacén de enseres o ferramientes, etc.Na so estructura básica o con adaptaciones pa poder medrar o les funciones de la estaya destinada a vivienda, esti diseñu perduró más de cuatro sieglos.[3]
Casa de corredor
editar
La casa de corredor ye una tipoloxía bien abondosa n'Asturies. Trátase d'una construcción de planta rectangular desenvuelta en dos niveles, con muries de piedra y techu a dos agües. El corredor, xeneralmente asitiáu nel pisu cimeru y sobro la fachada principal, funciona como una estensión natural de la vivienda escontra l'esterior. D'esta miente el corredor crea espacios p'aconceyar o de descansu, cuando les condiciones climátiques son favoratibles o bien espacios de serviciu, como l'ensugáu de productos comestibles, por casu. Polo xeneral, el corredor ta empobináu pal sur o l'este y ta llindáu por un barandal de madera, con estremaos diseños torniaos, tallaos o calaos. En dellos casos, los corredores abiertos de les antigües cases zarráronse con vidros o paneles de madera, como una manera de favorecer la eficiencia enerxética de les viviendes o amontar la privacidá.[4]
Casa de patín
editar
Esta tipoloxía atópase davezu na zona occidental d'Asturies y ye típica del relieve montascosu. Trátase d'una construcción de planta rectangular y dos pisos, con muries de piedra y techu a cuatro agües, xeneralmente de cayuela. Éntrase per aciu d'una xubidoria esterna o patín que llega hasta'l pisu cimeru. Nos allugamientos nos que'l tarrén ta pindiu o tien desnivel, el patín amenorgase a unos pocos pasos.
En munchos casos, la planta inferior destínase a corte, tenada o otros servicios.[2]
Construcciones auxiliares
editarHorros, paneres y cabazos
editar
Los horros, les paneres y los cabazos son la solución que va sieglos s'atopó pa dar respuesta al problema de la preservación de los granos almacenaos, evitando los deterioros productu de les agües o'l mugor del suelu y amenorgar l'aiciónde royedores o otros animales. Magar qu'esisten en delles partes del mundu, n'Asturies y Galicia formen parte significativa del paisaxe rural.[Nota 1] Trátase de tenaes elevaes, construyíos de manera tal que la so xubidoria d'accesu torga la entrada d'animales.[5]Estímase qu'esisten unes 10 000 construcciones d'esti tipu n'Asturies.[6] La llexislación vixente protexe tolos horros, paneres y cabazos construyíos antes de 1900 y regula el so usu y caltenimientu.[7] Con pequeñes variantes y adaptaciones, el diseñu básicu caltúvose dende'l sieglu XIV.[8]Por cuenta de les característiques constructives, los horros y les paneres puen desmontase y rearmar n'otru allugamientu.[Nota 2] Esta característica fai que seyan consideraos bienes muebles, auxiliares o secundarios a la construcción principal.[9]
Los horros son construcciones cuadrangulares de madera, polo xeneral de castañal o carbayu, con cubiertes inclinaes a cuatro agües, xeneralmente de teya, cayuela o elementos vexetales. Esta estructura sofítase en cuatro pilastres de piedra o madera llamaos pegoyos. Los pegoyos tienen forma de pirámide truncada de cuatro cares y allúguense nos cuatro vértices de la estructura superior. Ente los pegoyos y la base de la estructura asítiense unes llábanes de piedra llamaes mueles de tamañu más grande que l'estremu del pegoyu, d'esta manera tórgase que los royedores puean aportar al espaciu interior del horru. La entrada del horru esta empobinada xeneralmente pal sur o l'este y llégase a ella por aciu una escalera o patín (tamién llamada xubidora) qu'escarez del caberu pasal, dexando un espaciu llibre que torga l'accesu d'animales.[10]
Nel sieglu XVII introdució'l cultivu del maíz, que poles sos característiques espardióse rápido en tol territoriu d'Asturies.[11]Les paneres empezaron entós a construyise masivamente por cuenta de la necesidá de disponer de mayores espacios pal ensugáu y almacenamientu de cereales. De la mesma, el diseñu inicial del horru axeitóse a les nueves necesidaes: la planta cuadrada derivó nuna planta rectangular de mayor superficie, lo que riquió que s'incorporaren más pares de pegoyos pa soportar la estructura. En dellos casos l'interior subdividióse en dos o más compartimientos y nel esterior amestóse una o más galeríes.[12][2]
La ornamentación d'horros y paneres realízase davezu nes vigues estructurales y los arcos de les abertures principales. Trátase de talles fondes realizaes na madera, delles vegaes resaltaes con pintura colorada, blanca o negra, que remembren el cincelado en piedra presente n'ilesies y otros edificios. Los más habituales son los motivos circulares, como la flor del agua de seyes pétalos, los motivos xeométricos en series, los motivos relixosos, como cruces formaes por triángulos xuníos polos sos vértices, y dellos diseños llineales antropomórficos o zoomórficos.
Los cabazos surden como una adaptación del diseñu de los horros. A diferencia d'éstos, tienen planta rectangular, con gran diferencia de llargor ente los llaos mayor y menor, y cubierta a cuatro agües. Los llaos menores suelen construyise con mampostería y nún d'ellos ta l'accesu. Los llaos mayores tán cubiertos por llistones de madera o, en dellos casos, por mampostería discontinua con abertures verticales estrenches pa dexar la circulación del aire.[13]
Les fontes, bebederos y llabaderos yeren construcciones de calter comuñal, qu'hasta bien entráu'l sieglu XX constituyíen elementos importantes pa los pueblos, porque yeren los únicos puntos de suministru d'agua pal consumu humanu, d'animales o pa llavar la ropa.
Polo xeneral, les fontes presenten un diseñu de templete o frontón más o menos simple y los bebederos o bebezones consistíen en cencielles piles ensin especiales curiaos de diseñu o ornamentación. Los llavaderos evolucionaron de simples diseños de grandes pilones con lloses na so redolada a flor del suelu, hasta construcciones más ellaboraes, techaes y con espacios que dexaben que cada muyer realizara la llavadura nun espaciu individual.[14]
Los molinos y batanes fueron construcciones diseñaes dende va sieglos p'aprovechar les posibilidaes de los ríos y regueros del país.[2] Nos entamos del desenvolvimientu de la maquinaria n'etapes preindustriales, favorecieron la molienda de granu o'l trabayu colos texíos, sustituyendo la fuerza humano o animal pola enerxía hidráulico.[15]
Otres construcciones tradicionales populares taben asociaes a les práutiques de l'actividá rural, como les cortes y payares, xeneralmente xuníos nuna construcción única de dos plantes, en dellos casos inmediata a la vivienda principal, onde la planta inferior se destinaba a los animales.[2]
Notes
editar- ↑ Los horros y paneres asturianos pueden clasificase nos llamaos estilos Villaviciosa, Allande y Carreño, tomáu los nomes de los conceyos onde se toparon los más destacaos o representativos. L'estilu Villaviciosa ye'l más antiguu. Desenvolvióse dende principios del sieglu XVI hasta principios del sieglu XVII. Los estilos Allande y Carreño desenvolviéronse dambos dende'l sieglu XVIII hasta metá del sieglu XX.
- ↑ Por sieglos, los llabradores nun yeren propietarios de la tierra, sinón que la trabayaben y ocupaben pagando una renta. En casu de que tuvieren qu'abandonala por cualesquier causa, perdíen tou lo que nella hubieren construyíu, nun siendo que pudiera treslladase xunto col restu de les sos pertenencies.
Referencies
editar- ↑ «Arquitectura popular. Patrimonio cultural en Asturias».
- ↑ 2,0 2,1 2,2 2,3 2,4 «Construcciones populares». Recuperando la memoria.
- ↑ «La casa mariñana». Fundación José Cardín Fernández (Octubre de 2012).
- ↑ «El corredor en las casas asturianas». Universidad Autónoma de Madrid (Febrero de 2014).
- ↑ «Cabazos, hórreos y paneras». Asturias para disfrutar.
- ↑ Maria Victoria Rodríguez (7 de setiembre de 2010). «Asturias: hórreos, paneras y cabazos».
- ↑ «Artículo 75 Protección de hórreos, paneras y cabazos». Ley del Principado de Asturias 1/2001, de 6 de marzu, de Patrimonio Cultural (Marzo de 2001).
- ↑ Alberto Uría (1 d'abril de 2011). «El hórreo asturiano». Archiváu dende l'orixinal, el 2022-02-24.
- ↑ «Hórreo y panera» (24 d'abril de 2013).
- ↑ Ricardo Robles Otero (Enero de 2009). «El hórreo asturiano».
- ↑ Ignacio Gracia Noriega (Septiembre de 2006). «El maíz y la patata». Nódulo.
- ↑ Álvarez Acero. Construcciones tradicionales en Asturias. Universidad de Oviedo.
- ↑ «Cabazos, hórreos y paneras».
- ↑ El agua en la vida cotidiana - Fuentes, lavaderos y abrevaderos de Asturias. Fundación Municipal de Cultura, Educación y Universidad Popular del Ayuntamiento de Gijón. ISBN 978-84-96906-44-0.
- ↑ Gonzalo Morís Menéndez - Valdés (Diciembre de 2006). «Ingenios hidráulicos históricos - Molinos, batanes y pedrerías». Departamento de Construcción e Ingeniería de Fabricación E.T.S. - Ingenieros Industriales de Gijón - Universidad de Oviedo.
Datos: Q21402544
