Camilo Cienfuegos Gorriarán (6 de febreru de 1932L'Habana – 28 d'ochobre de 1959Océanu Atlánticu) foi una de les figures más emblemátiques de la Revolución Cubana xunta Fidel Castro, Huber Matos, Eloy Gutiérrez Menoyo y Che Guevara. Fíu d'anarquistes.

Camilo Cienfuegos
Vida
Nacimientu L'Habana[1]6 de febreru de 1932[1]
Nacionalidá Bandera de Cuba Cuba
España
Muerte Océanu Atlánticu28 d'ochobre de 1959[1] (27 años)
Causa de la muerte accidente d'avión
Familia
Hermanos/es Osmany Cienfuegos Gorriarán
Estudios
Llingües falaes castellanu
Oficiu políticu, revolucionariuoficial
Miembru de Movimientu 26 de Xunetu
Serviciu militar
Graduación xeneral del exércitu
Lluchó en Revolución cubana
Creencies
Partíu políticu Movimientu 26 de Xunetu
Cambiar los datos en Wikidata

Biografía editar

Nacíu en Lawton, Ciudá de L'Habana, Cuba, onde cursó los sos estudios primarios na escuela Remberto Alemán.

Nel añu 1953 viaxó a los Estados Xuníos a la gueta d'una meyor condición económica, pero decide regresar indignáu pol ambiente del país y pola esplotación a la que yeren sometíos los trabayadores.

En 1954 axúntase a la llucha estudiantil escontra la dictadura del réxime tiránicu de Fulgencio Batista y, un añu más tarde, ye firíu de bala mientres una manifestación. Foi ficháu polos cuerpos represivos del dictador polo que viose obligáu a exiliase. Na ciudá de Nueva York conoció les idees y propósitos del entos estudiante Fidel Castro, y decide treslladase a Méxicu, onde inxértase a la espedición que nel yate Granma, s'entama pa volver ainiciar la llucha armada'n Cuba.

Pol so puxu'n combate otórgase-y el rangu de capitán tres la llucha en Sierra Maestra. En 1957 crease una nueva columna guerrillera: la columna númberu 4, fia de la columna "José Martí", y que ta a cargo del Comandante Ernesto Che Guevara. Ye nesta columna onde cumple la so función de capitán y onde xurde una cordial amistá ente elli y el Ché.

Demientres la llucha guerrillera pol trunfu la Revolución Cubana asignose-y la xera de dirixir la columna invasora númberu 2 "Antonio Maceo", que partió de Sierra Maestra faza l'Occidente de Cuba n'agostu de 1958 y que, xunta la columna ocho (Ciro redondo) al mandu del Che Guevara, estendió al occidente de la islla les aiciones militares qu'entamaren na fastera oriental .

Liderada por Camilo Cienfuegos toma la ciudá de Yaguajay, una batalla decisiva nel güelpe final del Exército Rebelde pa debilitar las fuercies armaes de Fulgencio Batista. Tres el trunfu la Revolución, Cienfuegos formó parte del Altu mandu del Ejército. Combatió nos llevantamientos contra-revolucionarios y participó tamién na Reforma Agraria.

Al Comandante Camilo Cienfuegos conocíase-y como "El Héroe de Yaguajay", yera mui queríu pola so homildá, cenciellez y sonrisa franca.

Muerte editar

La versión oficial diz que Camilo Cienfuegos finó'l 28 d'ochobre de 1959 nun acidente d'aviación per aciu del mal tiempu, anque enxamás se pudieren alcontrar restos del avión, nin hebo reportes de problemes climáticos na ruta que supuestamente debía siguir. Esisten numberoses teoríes sobre la so muerte y de los fechos que l'antemanaren.

Una d'estes fala d'ametrallamientu del Cessna 310 tripuláu por Cienfuegos por parte d'un avión Sea Fury de la Fuercia Aerea Revolucionaria Cubana, supuestamente tripuláu por Blas Domínguez, pilotu personal de Fidel Castro. Nesti casu Domínguez hubiere asesinao a Camilo Cienfuegos por órdenes direutes de Fidel, bien pol so venceyamientu con Huber Matos, quien se rebelare escontra'l rumbu tiránicu que tomaba la "Revolución Cubana" (y fechu pol que llueu foi condenáu a 20 años de cárcele) o bien pol enfotu que'l pueblu cubanu depositaba en Camilo.

 
Camilo xunto con Fidel Castro.

Dotramiente, ye tamién posible que l'avión fuere valtáu por error de la mesma defensa antiaérea cubana. Hai que contar que daquella habia una gran tensión sobre estes fuercies, al violase de continuo l'espaciu aériu cubanu, y que los sistemes de deteción y comunicación con que cuntaban yeren mui llimitaos.

Al mesmu tiempu, hai teoríes asemeyaes que falen de la implicación de la CIA nel valtamientu del avión y la muerte de Cienfuegos. Estes básense nos constantes atentaos contra los revolucionarios que participaren na guerra escontra'l dictador Batista.

Finalmente, otra teoría plantega que Camilo sí llegó a La Habana y ellí foi asesináu. Supónse que'l capitán Cristino Naranjo, quien fuere fiel compañeru de Camilo, tuvo evidencies de qu'estos fechos ocurrieren na nueche del 27 d'ochobre a manes de Raúl Castro personalmente. El capitán Naranjo entamó la so propia esquisa que nun foi a acabar, al ser asesináu pocos díes después, el 13 de payares, en circustancies poco clares.

Seya como fuere, la muerte de Camilo Cienfuegos continúa siendo una asignatura pendiente de la historia reciente de Cuba y, debio al intensu conflictu d'intereses que l'arodia, resulta imposible na práutica determinar cómo asocedió.

Memoria editar

  • Cada 28 d'ochobre los escolinos de Cuba echen flores al mar como homenaxe a Camilo Cienfuegos.
  • La Universidá de Matanzas lleva por nome "Camilo Cienfuegos".
  • El retratu de Camilo Cienfuegos alcuéntrase nos billetes de 20 pesos cubanos y 20 pesos cubanos convertibles.

Referencies editar

  1. 1,0 1,1 1,2 Afirmao en: Gran Enciclopedia Soviética (1969–1978). Sección, versículu o párrafu: Сьенфуэгос Камило. Data de consulta: 28 setiembre 2015. Editorial: Большая Российская энциклопедия. Llingua de la obra o nome: rusu. Data d'espublización: 1969.