Categoría alderique:Medicina

¿Qué tal crear una subcategoría dientro de Medicina que se nome AMALECIMIENTOS (o ENFERMEDAES, yo prefiero el primeru), pa englobar dientro tolos artículos que vaigan saliendo? ¿Crear categoríes ye cosa de los alministradores, o pue faelo cualquiera? --esbardu (mensaxes) 22:30, 3 xunu 2006 (UTC)

____________

Les categoríes pue faceles cualquiera, magar que nesti casu al haber un solu artículu nun me paez que mereza la pena, vamos acabar teniendo una categoría pa dos o tres artículos, peri si te peta faílo: al creyar amalecimientos saldrate coloráu y tienes que editalu y poner Categoría:Medicina ente corchetes --Bar 22:44, 3 xunu 2006 (UTC)

Hola Esbardu. A mín paezme más afayadizo enfermedaes. Amalecimientu suéname coloquial enforma. Nun sé, casi que préstame más Malures Jesusito 08:36, 4 xunu 2006 (UTC)

Hola a toos. Jesusito, tienes razón cola nomenclatura. Paezme bien Malures. A Bar: Cuido que va ser meyor poner la subcategoría, anque agora namái tenga un artículu, yá habrá un sitiu onde poner tolos artículos que se refieran a malures. Yo voi siguir poniendo dalgún más --Esbardu 15:59, 4 xunu 2006 (UTC)

Ya metió la pata'l catetu d'Esbardu. Al intentar poner la subcategoría Malures nun sal como yo quería. Echái una güeyada a ver qué fixi mal. --Esbardu 16:08, 4 xunu 2006 (UTC)

Hola, Esbardu. Paezme que ye meyor usar la palabra más xeneral, que ye "enfermedá". Si mires el diccionariu de l'Academia pues ver que malura defínese primero como "cualidá de malu". Anque nun lo precisa, yo entiéndolo más bien en sentíu moral, como como sinónimu de "maldá". El sentíu médicu apaez namás na segunda acepción de la palabra, y remite a les formes mal, y enfermedá.

Igual la forma más tradicional n'asturiano ye mal. Va unos años falábase del "mal de les vaques lloques" , y nun sé si conoces esi cantar que diz qu'a un gochín "entro-y'l mal peles oreyes, estiró'l rau y morrió". Sicasí, la palabra "mal" ye mui ambigua y paezme preferible usar "enfermedá".

Volviendo al Diccionariu de l'Academia, la definición de "enfermedá" ocupa cinco renglones y les de les otres formes (malura, mal, malecimientu) malapenes ún. Paez bastante claro cuala ye la forma qu'hemos de privilexar, cuanto y más que paezme que ye la que más s'usa tanto na llingua escrita como na oral. Perdona si m'enrollé dalgo más de la cuenta. Motán 14:26, 4 xunu 2006 (UTC)

Hola, Motán. El to razonamientu paezme válidu. Ente mal y enfermedá yo cuido que ye meyor usar la segunda. Dame igual cómo lo poner, qu'opine más xente y lo que paeza mayoritario pues ponse. Yo de toes maneres voi faciendo l'artículu col nome d'enfermedá. A camudar el nome siempre se ta a tiempu. Un saludu --Esbardu 19:23, 4 xunu 2006 (UTC)

Lo curioso ye que'l Diccionario General de la Lengua Asturiana, del profesor García Arias, nun recueye la forma malura nin amalecimientu, polo que nun sé de ónde se tomaron pal Diccionariu de la Llingua Asturiana editáu pola ALLA. Zato-ino 21:23, 4 xunu 2006 (UTC)

Malura recuéyela Ramón d'Andrés como sinónimu d'enfermedá, magar que nel DALLA esi signaficáu ye la segunda acepción (la primera ye 'cualidá de malu'). Amalecimientu, nel DALLA, defíniese como aición y efeutu d'amalecer, verbu que sí recueyen como sinónimu d'enfermar diccionarios como'l de García Arias o el de los bables de Jesús Neira. Cuido que lo meyor ye emplegar 'enfermedaes' pa la categoría, ¿que non? Jesusito 22:38, 4 xunu 2006 (UTC)