Centru Coordinador de Biblioteques d'Asturies
Esti artículu necesita wikificase. |
Historia
editar
Ente 1869 y 1936 Asturies cuntó con más de 350 centros bibliotecarios gracies al llabor coordináu de dellos organismos sociales y culturales. La Guerra Civil punxo fin a esta medría, y les grandes biblioteques asturianes foron destruyíes y los fondos de munches biblioteques populares cayeron en manes de la Comisión Depuradora de Biblioteques, encargada de requisar les sos coleiciones bibliográfiques.
En 1938 Ignacio Aguilera, direutor de la Biblioteca de la Universidá d'Uviéu, propunxo la idea de crear un organismu que la so principal misión fore la de fundar biblioteques públiques nueves y incorporar a elles los fondos bibliográficos requisaos. Un añu más tarde, a propuesta del diputáu rexonal Rafael Quirós Isla, la Diputación Provincial alcordó la creación del Centru Coordinador de Biblioteques. El Ministeriu d'Educación Nacional dio-y calter oficial cola orde ministerial de 18 de payares de 1940 y vio nesta iniciativa’l modelu ideal pa coordinar los esfuercios del Estáu, les provincies y los conceyos n’ámbitu bibliotecariu. Esti Centru convertíu en pioneru y modelu de los que se foron creando n’otres provincies tuvo como primer direutor a Ignacio Aguilera, qu'ente 1940 y 1944 compatibilizó esta actividá cola direición de la Biblioteca Universitaria, onde tuvo la sede provisional hasta 1941, en que se treslladó a una oficina asitiada na planta baxa del Palaciu de la Diputación, sede actual de la Xunta Xeneral del Principáu.
Dende 1944 hasta la so xubilación en 1975 fíxose cargu de la direición Lorenzo Rodríguez-Castellano, bibliotecariu, filólogu eminente y estudiosu de la llingua asturiana, que dio un impulsu decisivu al Centru Coordinador. En 1976 asume la direición José Ramón Barraca, quien permaneció al frente del mesmu hasta la so estinción. Compartió edificiu cola Biblioteca Pública d'Uviéu hasta 1958 na cai San Vicente, y depués, hasta la so supresión en 1984, na planta baxa del palaciu de los Condes de Toreno, na plaza Porlier. El llabor desenvueltu pel Centru nos sos 45 años d'existencia foi escomanáu y pueden establecese estes etapes:
- 1939-1959. Nos primeros años l'actividá del Centru empobinóse a la creación y ampliación de biblioteques nes cabeces de los partíos xudiciales, nes cuenques mineres y nes zones rurales. A partir de la década de los 50 los esfuercios empobináronse a afitar les biblioteques creaes y empecipiar una política d'estensión cultural consistente n’actos públicos entamaos poles Xuntes de Biblioteca, un organismu asesor y consultivu. En 1955 la Corporación Provincial tomó l'alcuerdu de denominar al Centru como “Centru Coordinador de Biblioteques Rafael Quirós Isla”.
- 1960-1978. En 1960 aprobóse’l Reglamentu que regula’l funcionamientu del Centru. Son años d'una gran actividá, cola creación de biblioteques y axencies de llectura nueves, los repartos regulares de llotes de llibros y l'establecimientu de programes de “biblioteques viaxeres” y maletes naquellos sitios onde nun yera posible establecer centros permanentes.
- 1979-1984. El Real Decretu 2874/1979, de 17 d'avientu, tresfirió al Conseyu Rexonal d'Asturies les competencies del Centru Nacional de Llectura. Nesa fecha, la Rede de Biblioteques Públiques del Principáu d'Asturies taba compuesta por dos grandes biblioteques de titularidá estatal n’Uviéu y Xixón, unes cincuenta biblioteques municipales, once axencies de llectura y dos bibliobuses.
El Decretu 5/1984, de 13 de xineru, recueye que la Conseyería Educación, Cultura y Deportes va exercer les competencies esclusives sobre’l Centru Coordinador de Biblioteques y, poco depués, el Decretu 123/84, de 31 d'ochobre, suprime definitivamente’l Centru Provincial, asumiendo les sos competencies l'acabante crear Serviciu de Museos, Archivos y Biblioteques de la Conseyería d'Educación, Cultura y Deportes del Principáu d'Asturies.
Bibliografía
editar- Prieto Álvarez-Valdés, Carmen (1992). «Aproximación a la historia del Centro Coordinador de Bibliotecas de Asturias». 1º Congreso de Bibliografía Asturiana II: páxs. 703-715. https://dialnet.unirioja.es/servlet/articulo?codigo=3867078. Consultáu'l 18 d'abril del 2016.
- (2009) Don Lorenzo Rodríguez-Castellano y el Centro Coordinador de Bibliotecas de Asturias. Conseyería de Cultura y Turismu, páx. 198.
Referencies
editarEnllaces esternos
editar
Wikimedia Commons tien conteníu multimedia tocante a Centru Coordinador de Biblioteques d'Asturies.
Datos: Q24940804
