Cinetocoru

El cinetocoru ye una estructura proteica onde s'anclen los microtúbulos (MTs) del fusu mitóticu mientres los procesos de división celular (meiosis y mitosis). Alcuéntrase nuna zona específica del cromosoma, el centrómeru. En vertebraos y lleldos los cinetocoros son estructures discretes y úniques en cada cromosoma, pero esisten organismos (como C. elegans) que presenten cinetocoros difusos a lo llargo los brazos cromosómicos: son los nomaos cromosomes holocéntricos.

Imaxe d'una célula humana en mitosis, na que los microtúbulos muestrense en verde (formando'l fusu mitóticu), los cromosomes n'azul nel ecuador del fusu y los cinetocoros en collorao.

Los cinetocoros empecipien, controlen y supervisen los llamativos movimientos de los cromosomes mientres la división celular. Tocantes a la so estructura, los cinetocoros les célules animales pueden subdividise en dos rexones:

• El cinetocoro internu entámase de normal sobre secuencies d'ADN altamente repitíu (l'ADN satélite) y ensámblase nuna forma especializada de cromatina que persiste al traviés del ciclu celular.
• El cinetocoru esternu ye una estructura proteica con munchos componentes dinámicos que s'ensambla y funciona namái mientres la división celular.

Les funciones del cinetocoru inclúin l'anclaxe de los cromosomes a los MTs del fusu mitóticu, la verificación d'esos anclajes, l'activación del checkpoint de mitosis (un mecanismu de control que retrasa la salida de mitosis si se detecten fallos) y la participación na xeneración de les fuercies que propulsen los movimientos cromosómicos mientres la división celular. Los microtúbulos son polímeros metaestables de tubulina-α y β qu'alternen ente fases de crecedera y despolimerización, un fenómenu que se conoz como "inestabilidá dinámica". La naturaleza descomanadamente dinámica del comportamientu de los MTs ta integrada cola función de los cinetocoros pa mover y segregar los cromosomes.

Enllaces esternos

• Datos: Q908912