Abrir el menú principal

Comunidá de Desarrollu del África Austral

Flag of SADC.svg

La Comunidá de Desarrollu del África Austral (Southern African Development Community, SADC) ye una organización intergubernamental que tien como oxetivu profundizar na cooperación ya integración socioeconómica, y na cooperación política y en cuestiones de seguridá, de los sos estaos miembros, 16 países del África Austral[1]. La so sé ta na capital de Botsuana, Gaborone.

Estaos miembrosEditar

Superficie y población de los estaos miembros[2]
País Estensión

(en km²)

Población (hab.) Notes
  Angola 1.246.700 25.646.166
  Botsuana 582.000 2.024.904
 [3] Comores 2.235 575.660 Estáu miembru dende'l 20 d'agostu de 2017
  República Democrática d'El Congu 2 344 858 78 736 153 Estáu miembru dende'l 8 de setiembre de 1997
  Lesothu 30.355 1.741.406
  Madagascar 587 295 12 238 914 Foi suspendíu como miembru en 2009, demientres la crisis política que sofrió'l país, y foi realmitíu el 30 de xineru de 2014 [4].
  Malaui 118.484 13.077.160
  Mauriciu 1.969 1.237.000 Estáu miembru dende'l 28 d'agostu de 1995.
  Mozambique 801.590 20.252.223
  Namibia 824.268 2.104.900 Estáu miembru dende'l 21 de marzu de 1990 (fecha de la so independencia).
  Seixeles 456 90.945 Formara parte de la Comunidá dende'l 8 de setiembre de 1997 hasta'l 1 de xunetu de 2004, cuando l'abandonó. Volvió a reingresar nella en 2008.
  Sudáfrica 1.221.037 56.000.000 Estáu miembru dende'l 30 d'agostu de 1994.
  Suazilandia 17.363 844.223
  Tanzania 947.303 44.928.923
  Zambia 752.612 13.046.508
  Zimbabue 390.757 12.973.808

Comores foi almitía na Comunidá na 37ª Cumbre de Xefes y Estáu y de Gobiernu celebrada en Pretoria (Sudáfrica) en 2017. Burundi tien solicitada la so entrada como país miembru.

HistoriaEditar

 
Sé de la Comunidá de Desarrollu del África Austral en Gaborone (Botsuana).

Los orixenes de la Comunidá remóntense a les décades de 1960 y 1970, cuando los cabezaleros de los países gobernaos pola mayoría de población negra y los movimientos nacionales de lliberación coordinaron los sos esfuercios políticos, diplomáticos y militares pa finar cola dominación colonial y de la minoría de población blanca nel África meridional. L'antecesor inmediatu del múerganu de cooperación política y de seguridá de l'actual Comunidá foi la asociación conocida como Frontline States, formada en 1980 por Botsuana, Tanzania, Zambia, Angola, Mozambique y Zimbabue. Pela so banda, l'antecesor de la llabor de cooperación económica de l'actual Comunidá foi la Conferencia de Coordinación pal Desarrollu del África Austral (Southern African Development Coordination Conference, SADCC), formada tres de la robla, polos nueve países con gobiernu de la mayoría negra, de la Declaración de Lusaka el 1 d'abril de 1980.

La SADCC tresformose n'actual Comunidá el 17 d'agostu de 1992, cuando los miembros fundadores y la recién independizada Namibia roblaron el Tratáu y la Declaración de Windḥoek, que-y dieron nacencia. Esta organización convivió cola de los Frontline States, que nun se disolvieron hasta dempués de celebrase, en 1994, les primeres eleiciones democrátiques en Sudáfrica. Los intentos posteriores d'asentar más firmemente los finxos de la cooperación política y de seguridá embaxu'l paragües de la Comunidá de la cabera década del sieglu XX fracasaron.

El 14 d'agostu de 2001 roblose un nuevu tratáu de la Comunidá, que sustituyía al de 1992 y mandaba revisar les estructures, polítiques y procedimientos de la Comunidá, nun llargu procesu qu'entá nun finó. Ún de los principales cambios ye que queda institucionalizada la cooperación política y de seguridá cola creación del Organ on Politics, Defence and Security (OPDS). El OPDS ta embaxu'l control del muérganu superior de la Comunidá, the Summit, formáu polos xefes d'estáu o gobiernu de tolos países miembros.

La Comunidá impulsa tamién un eventu deportivu multinacional, los Xuegos de la Comunidá. La primer edicion, celebrada en Maputu en 2004, xuntó a cerca de mil deportistes menores de 20 años de diez países, que compitieron nún programa qu'incluyía l'atletismu, el fútbol, el boxéu, el baloncestu y el netball[5].

ReferenciesEditar