Concepción Saiz Otero

Concepción Saiz Otero (22 de mayu de 1851, Santiago de Compostela – marzu de 1934, Pancorbo) foi una maestra, pedagoga, feminista y escritora española. La so aportación al difícil y dilatáu procesu d'integración de la muyer española na sociedá en condiciones d'igualdá col varón, puede quedar descritu nestes pallabres escrites por ella en 1929:

Concepción Saiz Otero
Vida
Nacimientu	Santiago de Compostela, 22 de mayu de 1851
Nacionalidá	España
Muerte	Pancorbo, marzu de 1934 (82 años)
Estudios
Llingües falaes	castellanu
Oficiu	pedagoga, profesora, sufraxista

"La Escuela Normal Central fixo, nun cuartu de sieglu, el llabor cuasi milagrosu de tresformar a la muyer española, de ser pasivu, destináu (fora de la función de la maternidá, siempres augusta) a convertise en pesu muertu de la sociedá, nun ser intelixente, activu, aptu pa bastase a sigo mesma y entá pa sirvir a otros de sostén fuerte y abnegado. Aquellos tipos de les Señores de Porreño, arrincaos pol maestru Galdós a la vida real de la segunda metá del sieglu XIX, pasaron a la Hestoria".

Concepción Saiz Otero"La Revolución del 68 y la cultura femenina. Un episodiu nacional que nun escribió Pérez Galdós." (1929)

Biografía

Nacida nel ecuador del sieglu XIX, Concepción Saiz (a la que más tarde les sos alumnes llamaríen "Pura") foi fía d'Andrea d'Otero y Pérez, gallega, y Raimundo Saiz Reoyo, burgalés y carabineru d'oficiu. Esta ocupación paterna fizo que la familia viaxara mientres la infancia de "Pura", en virtú de los destinos que se-y dieron en Ciudad Rodrigo, Viveiro, Logroño y Burgos. Nesta última ciudá, la so hermana mayor y maestra d'oficiu, llogró una plaza na escuela de la llocalidá de Pancorbo. En 1870, "Pura" y la so familia viaxaron a Madrid, onde la moza siguió l'exemplu de la so hermana ingresando na Escuela Normal Central de Maestres en 1876, Empecipióse como profesora normalista en 1884, actividá que desenvolvió hasta la so xubilación en 1921.

En 1882 participó nel Congresu Nacional Pedagóxicu, y con mayor protagonismu tuvo na Mesa del Congresu Hispanu-portugués-americanu, celebráu en Madrid, del 13 al 27 d'ochobre de 1892; Mesa na que tamién tuvieron Manuel Ruiz de Quevedo (presidente de l'Asociación pa la Enseñanza de la Muyer), Emilia Pardo Bazán, Rafael Torres Campos, Concepción Aleixandre, Asunción Vela y Juan Facundo Riañu, nun pudiendo allegar, por topase enferma Concepción Arenal.

La so actividá nel campu de la pedagoxía quedó reflexada en numberoses collaboraciones en revistes, diarios y selmanarios como La Tribuna (1882) y El nuesu Tiempu (1902-1906), amás d'en les publicaciones profesionales Maxisteriu Español (ente 1883 y 1897), La Escuela Moderna (1893-1900) y la Revista de Medicina Social Española (1916-1918).

En 1908 foi pensionada pol Estáu Español al traviés de la Xunta p'Ampliación d'Estudios ya Investigaciones Científiques pa representar a España na Esposición francu-británica y el Congresu Internacional d'Educación Moral, axuntaos en Londres, dientro de la Seición de Pedagoxía xunto a otros cuatro maestres y a cuatro maestros, y nun claru ambiente rexeneracionista y Institucionista. Collaboró con Carmen de Burgos nel Álbum artísticu lliterariu y participó n'instituciones como la Unión Ibero Americana, l'Asociación Matritense de Caridá o'l Patronatu de Ciegos. Finalmente, de la Escuela Normal Central de Maestres de Madrid pasó en 1909 a la Escuela d'Estudios Cimeros de Maxisteriu de Madrid, onde se xubiló en cumpliendo los setenta años d'edá. Ocasión na que les sos compañeres y alumnes solicitaron pa ella la Cruz d'Alfonso XII. Siguió sicasí activa, publicando llibros y artículos en revistes profesionales de la educación y afitó la so residencia en Pancorbo (Burgos), anque caltuvo rellación con delles de les sos antigües alumnes y collaborando de manera esporádica na Revista d'Escueles Normales.

Morrió al entamu de la primavera de 1934 y foi soterrada nel campusantu de Pancorbo, onde una llábana costeada poles sos alumnes dexó memoria del so homenaxe, amás d'una placa conmemorativa na escuela de Madrid qu'en 1934 llevaba'l so nome.

La so trayeutoria vital quedó como rellatu autobiográficu nel llibru La revolución del 68 y la cultura femenina. Un episodiu nacional que nun escribió Pérez Galdós (Apuntes del natural), que foi reeditáu en 2006 por cuenta de la celebración del Centenariu de la Xunta p'Ampliación d'Estudios (1907-2007).

Pedagoxía y feminismu

L'actitú profesional y el compromisu social colos que "Pura" Saiz diseñó la so vida quedaron valoraos nel so momentu poles xeneraciones de maestres que formó y afaló —quiciabes de la mesma que los posibles méritos d'un escritor queden grabaos nes páxines de les sos obres completes—, y que na documentación recoyida dexaron escamplaes y abondosos exemplos positivos, a pesar de les especiales condiciones en que la so xera tuvo que desenvolvese. Unu de los mayores tracamundios colos que la educadora enfrentóse foi la insistencia con que los "detractores de la educación de les muyeres" tachaben a les maestres de feministes nel sentíu peyorativu del términu (bien estendíu na so dómina).

"Naide menos feminista <qu'una Maestra>, nel sentíu repulsivo y antipáticu que los malintencionaos dan a la pallabra. La Maestra, como toles feministes españoles, busca na cultura la dignificación, ensin aspirar, en pocu nin n'enforma, a esi mal llamada emancipación, que subvertiría la misión de los sexos. La Maestra española aspira a ilustrase y a ilustrar, a desendolcar y perfeccionar les sos cualidaes ingénitas, a rectificar los errores de la so intelixencia, la ceguedá de les sos pasiones y la obstinación de la so voluntá, col fin único y esclusivo d'algamar más perfeición nel so xéneru, de ser más muyer. Nun pide al trabayu que lu desafíe del amor y de la familia; otra manera, demánda-y la llibertá de dirixir los sos sentimientos, ensin sometelos a les imposiciones de la conveniencia o la necesidá".

Concepción Saiz Otero"Escontra'l porvenir. La maestra española. (1902)

Obra

• Cartes... ¿pedagóxiques? Ensayu de Psicoloxía pedagóxica. (Madrid; Sucesores de Rivadeneyra, 1895). Escrita en collaboración con Urbano González Serrano y prologada por Adolfo Posada.
• ¿Cómo utilizar los millones de superávit?. Madrid; Imprenta Sucursal de Hernando, 1905).
• Teoría y práutica de la educación y la enseñanza. Cursu completu y enciclopédicu de Pedagoxía, espuestu conforme a un métodu rigorosamente didácticu. Madrid; Sucesores de Hernando, 1908.
• Dos meses poles escueles de Londres. Madrid; Sucesores de Hernando, 1911.
• Llectures escolares. Notes históriques y páxines selectes de lliteratura castellana (sieglos XII al XIX), 4 vols.; Madrid; Llibrería Xeneral de Victoriano Suárez, 1913-1928.
• Urbano González Serrano (bocetu biográficu). Madrid; Llibrería Xeneral de Victoriano Suárez, 1914.
• La Revolución del 68 y la cultura femenina. Un episodiu nacional que nun escribió Pérez Galdós. (Apuntes del natural); dos ediciones, dambes en Madrid; la de la Llibrería Xeneral de Victoriano Suárez, 1929; y la de Sucesores de M. Minuesa.
• El métodu de la escuela anovada de Milán. Madrid; Ministeriu d'Instrucción Pública, 1930.
• Les nueves escueles italianes. Madrid; Ministeriu d'Instrucción Pública, 1930.

Ver tamién

• Institución Llibre d'Enseñanza

Bibliografía

• Saiz Otero, Concepción (2006 -1929-). Carmen Colmenar: cultura femenina-un episodiu nacional-que-non-escribio-perez-galdos-apuntes-del-natural/ La revolución del 68 y la cultura femenina, un episodiu nacional que nun escribió Pérez Galdós. Madrid: Biblioteca Nueva -Llibrería xeneral de Victoriano Suárez-. ISBN 8497426061.

Enllaces esternos

• Carolina García Borrazás. Artículu sobre Concepción Sáiz (en llingua gallega)

• Datos: Q20015731
• Multimedia: Concepción Sáiz Otero
• Cites famoses: Concepción Saiz Otero