Conseyu Regulador de la Denominación d'Orixe Protexida Sidra d'Asturies

Conseyu Regulador de la Denominación d'Orixe Protexida Sidra d'Asturies
	organismu públicu
Historia
Orixe del nome	Principáu d'Asturies

El Conseyu Regulador de la Denominación d'Orixe Protexida “Sidra d'Asturies”

Home escanciando nuna sidrería

Ye un órganu venceyáu a la Conseyería de Mediu Ambiente y Desarrollu Rural de l'Alministración del Principáu d'Asturies, con calter desconcentráu de la mesma, con atribuciones decisories en toles funciones que se-y encomienden nel so Reglamentu, y d'acordies colo que se determina nes disposiciones vixentes nesta materia.

El so ámbitu ta determináu no territorial pola zona de producción y ellaboración; en cuantes a los productos, polos protexíos pola Denominación en cualquiera de les sos fases de producción, ellaboración, almacenáu, envasáu, circulación y comercialización, y en cuantes a les persones, poles inscrites nos rexistros (persones físiques y xurídiques).

El Conseyu Regulador ye’l muérganu de control y certificación que, acordies col artículu 10 del Reglamentu (CEE) 2081/92, va encargase de garantizar que los productos protexíos pola Denominación cumplan los requisitos afitaos nel so Reglamentu. Ente otres, les funciones del Conseyu Regulador algamen tola xestión alministrativa del organismu: llevar el control de les pumaraes y del orixe de la materia prima pa facer la sidra protexío; tamién se va encargar del siguimientu de los procesos de collecha, mayáude les variedaes, trasiegu de la sidra, formientu, maduración, aclariáu, estabilización, corcháu, distribución y col envís de que nun se pueda tracamundiar la sidra acoyío na Denominación d'Orixe Protexida con otro d'otru aniciu; la orientación, vixilancia y control de la producción, ellaboración y calidá; certificación de la calidá de la sidra acoyío na denominación; va ser responsable de l'aplicación del so Reglamentu y vixilancia del so cumplimientu; de la promoción y publicidá de la Denominación d'Orixe Protexida; de la concesión del derechu d'usu de la Denominación d'Orixe Protexida acordies col sistema de certificación recoyíu nel Manual de Calidá y Procedimientos y del sofitu a la comercialización del productu abellugáu pola Denominación. Dende la so vertiente socioeconómica de defensa de los porgüeyos del sector, el Conseyu Regulador va favorecer les iniciatives pa que s’afiten alcuerdos interprofesionales ente los operadores inscritos nel rexistru.

Historia del conseyu

Como talu y de manera efectiva, el Conseyu Regulador de la Denominación d'Orixe Protexida “Sidra d'Asturies” naz el 12 de payares de 2002 al asoleyase la correspondiente Resolución de la Conseyería de Mediu Rural y Pesca del Principáu d'Asturies nel Boletín Oficial de la rexón, anque la so xestación ta muncho más atrás, nel esfuerciu al empar de toles partes del sector sidreru: productores de mazana, llagareros, industriales y, por supuesto, l'Alministración, que tuvo un papel clave. La creación del Conseyu Regulador ye’l cumal de la evolución natural del sector sidreru marcáu nestos años últimos pol aumentu del preciu de la botella de sidra, les normes nueves d'etiquetáu de les botelles y una esixencia mayor de calidá y competitividá nos mercaos. Dende’l sector de la sidra supo vese que’l futuru de los productos agroalimentarios ta cada vez más arreyáu a la calidá y la respuesta foi la creación del Conseyu Regulador de la D.O.P. “Sidra d'Asturies” que precisamente tien como llabor curiar pola calidá de la sidra acoyío pol estandarte de la Denominación d'Orixe.