Espaciu históricu Frente del Nalón

L'Espaciu Históricu Frente del Nalón (Espacio Histórico Frente del Nalón en castellán) ye una actuación de revalorización históricu-patrimonial rellacionada coles posiciones defensives establecíes mientres la guerra civil española nel centru d'Asturies. Ocupa l'ámbitu xeográficu de les sierres de Bufarán y Pedrozu (o Pedrosu) que llinda los conceyos de Candamo y Les Regueres. Ente setiembre de 1936 y ochobre de 1937 el llugar foi un enclave de gran valor estratéxicu, especialmente la so llende meridional que formaba una cuña qu'estremaba dos frentes, el conocíu como "pasiellu de Grau" (o d'Uviéu), al Este, y el mesmu frente del Nalón, al oeste, que-y da'l nome, y siguía dende les estribaciones de la sierra'l calce baxu del ríu hasta la so desaguada.

Les sierres de Bufarán y Pedrozu constitúin unu de los principales cordales prelitorales del centru d'Asturies. Nellas llevóse a cabu la postrera ofensiva republicana nel Norte, que tuvo llugar el 1 d'agostu de 1937, y dexó sobre'l campu de batalla más de seiscientos muertos nuna sola xornada, tou un exemplu de la traxedia humana que supón un enfrentamientu bélicu. Al valor rememorativo d'estos fechos, que permaneció grabáu na memoria de la zona, xúnese l'estraordinariu legáu de infraestructures militares que quedaron abandonaes al rematar la batalla y que fueron oxetu de recuperación y puesta en valor: cárcoves de too tipu y función, abrigos de combate y descansu, allugamientos p'armes automátiques (ñeiros), casamates d'artillería, pozos fusileros, observatorios... Tou este patrimoniu dio pie al desenvolvimientu del proyeutu, col que se recuperaron unes obres que permanecieron abondes décades sumías nel abandonu, impulsáu pol G.D.R. Camín Real de la Mesa, cuntando col asesoramientu integral ya altruista de l'Asociación pa la Recuerpación de l'Arquiteutura Militar Asturiana 1936-1937 (ARAMA 36/37).

Espaciu históricu Frente del Nalón

Referencies editar

Enllaces esternos editar