Wikipedia

Ludvig Holberg

Ludvig Holberg, baron de Holberg (3 d'avientu de 1684, Bergen, Noruega, - 28 de xineru de 1754, Copenḥague, Dinamarca) fue un dramaturgu, historiador y ensayista danés de la Ilustración, consideráu'l pá de la lliteratura danesa y noruega.[6]

Ludvig Holberg
rector Universidá de Copenḥague, Dinamarca

1735 - 1736
← Georg Detharding - Marcus Wøldike →
profesor

Vida
Nacimientu Bergen[1], 3 d'avientu de 1684[2]
Nacionalidá Bandera de Noruega Noruega [3]
Bandera de Dinamarca Reinu de Dinamarca [3]
Muerte Copenḥague[1], 28 de xineru de 1754[2] (69 años)
Sepultura Sorø Klosterkirke[4]
Familia
Padre Christen Nielsen Holberg
Madre Karen Lem
Estudios
Estudios Universidá de Copenḥague
Bergen Cathedral School (en) Traducir
Llingües falaes llatín
danés[2]
Oficiu escritor, filósofu, dramaturgu, historiador, ensayista, autobiógrafu, novelista, guionista, profesor universitariu, poeta
Llugares de trabayu Copenḥague
Emplegadores Universidá de Copenḥague
Trabayos destacaos The Political Tinker (en) Traducir
Influyencies Molière y Plauto
Seudónimos Hans Mikkelsen[5]
Xéneru artísticu obra de teatru
Prosa
IMDb nm0390004
Cambiar los datos en Wikidata
Estatua de Holberg en Bergen

Vida[7]

editar

Ludwig Holberg nació na llocalidá noruega de Bergen el 3 d'avientu de 1684, de la que'l país taba embaxo'l dominiu la Corona danesa. Yera'l sestu y benxamín de los hermanos. Los sos pas morrieron cuando yera pequeñu. Primero'l pá, Christian Nielsen Holberg, cuando tenía un añu d'edá, dexando una granible propiedá, que quedó emprobecida dempués d'un gran fueu qu'amburó munchos edificios de gran valir. Por embargo, pa cuando fallez, en 1695, la má déxa-yos a Ludvig y a los sos hermanos una pequeña fortuna pa caún.

Güérfanu, con once años d'edá, marcha pa casa'l so tíu Peder Lim, que lu manda a estudiar llatín y lu prepara pa ser soldáu. El so primu Otto Munthe adóptalu y, dempués de pasar nes montañes un tiempu, la familia decide que torne pa Bergen pa que siga la so instrucción xunto al so tíu.

En 1702 quema la ciudá de Bergen y cola pa Copenhague col envís d'iniciar los sos estudios universitarios de Teoloxía. Esta carrera nun-y interesaba muncho, pero conformábase con algamar una "attestats", o seya, una especie de llicenciatura; con esta titulación diba poder exercer como sacerdote o d'abogáu (nun s'establez la carrera de Drechu en Dinamarca hasta l'añu 1736). Faltu de perres, vuelve pa Noruega a trabayar como tutor nuna casa noble en Voss. Yá con recursos, torna en 1704 a Copenhague pa finar los sos estudios y completar los sos conocimientos autodidactes d'historia, lleis y idiomes foriatos, convirtiéndose nun espertu n'inglés, francés ya italianu.

Entra entós a trabayar como tutor na casa del doctor Smith, vice-obispu de Bergen, paisanu mui illustrau y viaxáu. Los sos escritos permitirán-y a Holberg tener una primera toma de contautu colos itinerarios de viaxes del momentu que, dempués d'aforrar unos 60 táleros, se llanzará a descubrir.

Nun primer viaxe, partirá hasta Holanda y el norte de Francia, pero cai enfermu y, ensin dineru, marcha a pie dende Aix-la-Chapelle p'hacia Ámsterdam y volver a Noruega. Pero, por vergoña, nun sube hasta Bergen, sinón que queda en Christianssand (anguaño Kristiansand) onde dará clases de francés.

Cuando la primavera de 1706, marcha pa Oxford, onde estudiará dos años, anque nun seya nunca aceutáu pola universidá, trabayando como profesor de flauta y de violín pa pagar les clases. Va ser equí, motiváu poles impresionantes biblioteques, que va alcontrar la vena lliteraria.

De vuelta a Copenhague, en 1709, escomenzó a dar clases de metafísica na universidá con ciertu ésitu d'asistencia, pero con ganacies insuficientes. D'esta miente, aceuta acompañar a un caballeru ricu nun viaxe al norte d'Alemaña; ellí impartirá clases nes ciudaes de Leipzig, Halle y Hamburgu.

En 1710, toma un puestu de profesor na Escuela Borch. Esti momentu d'estabilidá va ser importante porque-y permitirá escribir la so primer obra Introduction til de fornemste Europæiske Rigers Historier (Una introducción a la historia de las naciones de Europa), espublizada l'añu siguiente. La repercusión de la obra fizo que tuviera la oportunidá de consiguir una audiencia col rei Frederick IV, a quien-y fizo entrega de dos ensayos sobre los reis Christian IV y Frederick III. Quedó'l rei tan entusiasmáu que-y lo agradeció ufiertándo-y el títulu de profesor de retórica y llatín y una beca de 100 táleros pa que viaxare. Énte esta nueva oportunidá, Holberg inició en 1714 un viaxe a Italia al traviés de los Países Baxos y Francia, que duró dos años.

Los siguientes dos años fueron mui duros, porque vivió n'estrema probitú, mientres trataba d'espublizar Morals Kierne eller Introduction til Naturens og Folke-Rettens Kundskab (El noyu de la moral o Introducción al Drechu Natural y Popular). Esta obra valdrá-y p'algamar la cátedra de metafísica na universidá de Copenhague. En 1720 será promocionáu a la "siella lucrativa de la elocuencia pública", cargu que-y daba accesu a un puestu nel consistoriu. Equí terminen los problemes económicos de Holberg.

Esti buen momentu espeyaráse nos sos escritos, que se tornen más satíricos, creando una clase completamente nueva dientro de la lliteratura humorística danesa, embaxo'l pseudónimu de Hans Mikkelsen. Asina apaez, ente 1719 y 1720, Peder Paars, una epopeya "serio-cómica" que satirizaba les costumes del momentu y que-y traxo a Holberg tanto ésitu como problemes: delles personalidaes importantes del país diéronse por aludíes y amenazaron al autor, que recibió l'ayuda del conde Danneskjold y, desmpués, la proteición del mesmu rei.

En 1721, Holberg tomó la direición del primer teatru danés, construyíu esi añu en Grönnegade, Copenhague. En setiembre del añu siguiente, programó L'Avaru, de Moliere, nuna versión tornada al danés, lo que rompía cola costume de representar les obres teatrales en francés o n'alemán. Viendo l'aceutación del públicu y de la crítica, Holberg decidió dedicase a la creación d'una comedia danesa. La primera d'eses pieces fue Den Politiske Kandestøber (El caldereru convertíu en políticu), que triunfó. Ente 1721 y 1727, Holberg estrenaría ná menos que 25 comedies, dalgunes d'elles consideraes obres maestres, como, por exemplu, Den Vægelsindede (L'indecisu), Henrich og Pernille (Henrik y Pernille), Jeppe paa Bjerget eller den forvandlede Bonde (Jeppe el Montañés o'l campesinu trasformáu), El politicastro, Erasmus Montanus eller Rasmus Berg (Erasmu Montanus o Rasmus Berg) y Barselstuen (Sala de maternidá). Pesie al xeniu dramáticu y al ésitu de públicu, el teatru tuvo que zarrar por problemas económicos. Nun últimu intentu pa salir del problema, y viendo que nun recibía ayudes de naide, compuso la satírica Den Danske Comoedies Liigbegængelse (Funeral pola comedia danesa).

En 1728 prodúzse un gran fueu na ciudá de Copenhague, que dirá siguíu por un aumentu de la probtú del país y d'un clima de puritanismu promovíu pol nuevu rei Christian VI, que chocaba escontra l'humor de les comedies de Holberg. Esti, entós, decide poner fin a la so obra teatral pa centrase en temes más científicos.

Ensin embargu, el rei muerre en 1747 y el so socesor, Frederick V reabrió'l teatru, nomando a Holberg direutor del mesmu y otorgándo-y el títiu de Barón de Holberg. L'autor volvió a escribir comedies, amás d'espublizar cinco volúmenes d'escritos espistolares, pero denguna d'estes obres algamó'l valir de les anteriores.

Holberg morría ricu, noble y cola reputación no más alto. La muerte alcontrólu encamáu na so casa de Copenhague, dende agostu de 1753, el 28 de xineru de 1754. Nunca nun se casó y nun tuvo fíos, polo que donó tolos sos bienes a la Universidá de Sorö, en Zelanda, llocalidá onde s'alcuentra enterráu.

Obra

editar

Comedies

editar
 
El cartel más antiguu conserváu d'una representación de testos de Holberg. Ye de la función del 22 d'ochobre de 1722, onde se poníen la so obra Maestru Gert de Westfalia
 
Ilustración de la edición del 1789 de Nicolai Klimii iter subterraneum. Grabáu por Johan Frederik Clemens y Nicolai Abraham Abildgaard.
  • Den Politiske Kandestøber (El caldereru convertíu en políticu), 1722
  • Den vægelsindede (L'indecisu), 1722
  • Jean de France eller Hans Frandsen (Jean de Francia o Hans el francés, 1722
  • Jeppe paa Bjerget eller den forvandlede Bonde (Jeppe el Montañés o'l campesinu trasformáu), 1722
  • Mester Gert Westphaler (Mester Gert Westphaler), 1722
  • Barselstuen (Sala de maternidá), 1723
  • Den ellefte Junii, 1723
  • Jacob von Tyboe eller den stortalende Soldat (Jacob von Tyboe o el soldáu fanfarrón), 1723
  • Ulysses von Ithacia (Ulises d'Ítaca), 1723
  • Erasmus Montanus eller Rasmus Berg (Erasmu Montanus o Rasmus Berg), 1723
  • Don Ranudo de Colibrados, 1723
  • Uden Hoved og Hale (Ensin cabeza nin cola), 1723
  • Den Stundesløse (Poder momentaniu), 1723
  • Hexerie eller Blind Allarm (La brujería o Falsa alarma), 1723
  • Melampe, 1723
  • Det lykkelige Skibbrud (L'amuermiamientu feliz), 1724
  • Det Arabiske Pulver (La povisa d'Arabia), 1724
  • Mascarade (Antroxu), 1724
  • Julestuen (La fiesta de Navidá), 1724
  • De Usynlige (La invisible), 1724
  • Kildereisen (El viaxe de la fuente), 1725
  • Henrich og Pernille (Henrich y Pernille), 1724-1726
  • Den pantsatte Bondedreng (Los campesinos empeñaos), 1726
  • Pernilles korte Frøkenstand (La esperiencia de Pernille como señorita), 1727
  • Den Danske Comoedies Liigbegængelse (Funeral por la comedia danesa), 1727
  • Den honette Ambition (L'ambición honesta), 1731
  • Plutus eller Proces imellom Fattigdom og Riigdom, ca. 1753
  • Husspøgelse eller Abracadabra, ca. 1753
  • Philosophus udi egen Indbildning, ca. 1754
  • Republiqven eller det gemeene Bedste, ca. 1754
  • Sganarels Rejse til det philosophiske Land, ca. 1754

Poemes

editar
  • Peder Paars, 1719-20
  • fire Skæmtedigte (Cuatro chistes), 1722
  • Metamorphosis eller Forvandlinger (Metamorfosis), 1726
  • Epigrammer (en llatín), 1737, espublizáu en 1749

Novela

editar
  • Nicolai Klimii iter subterraneum (Viaxe subterraniu de Nicolai Klimii) (en llatín), 1741.

Ensayos

editar
  • Moralske Tanker (Idees morales), 1744
  • Epistler (Epístoles), 1748–54
  • Moralske Fabler (Fábules morales), 1751
  • Tre latinske levnedsbreve (Tres menús llatinos), 1728-1743

Trabayos históricos

editar
  • Introduction til de fornemste Europæiske Rigers Historier (Una introducción a la historia de las naciones de Europa), 1711
  • Dannemarks og Norges Beskrivelse (Descripción de Dinamarca y Noruega), 1729
  • Dannemarks Riges Historie (Historia del reinu de Dinamarca), 1732–35
  • Den berømmelige Norske Handel-Stad Bergens Beskrivelse (Descripción de la famosa ciudá noruega de Bergen), 1737
  • Almindelig Kirke-Historie (Historia cotidiana de la Ilesia), 1738
  • Den jødiske Historie fra Verdens Begyndelse, fortsat til disse Tider (Historia de los Xudíos, dende'l comienzu'l mundu hasta los nuestro díes), 1742
  • Adskillige store Helte og berømmelige Mænds sammenlignede Historier (Hestories comparaes d'algunos de los héroes y homes más importantes), 1739–53
  • Adskillige Heltinders og navnkundige Damers sammenlignede Historier (Hestories comparaes d'algunes de les heroínes y muyeres más importantes), 1745

Trabayos xurídicos

editar
  • Morals Kierne eller Introduction til Naturens og Folke-Rettens Kundskab (El noyu de la moral o Introducción al Drechu Natural y Popular), 1716

Referencies

editar
  1. ↑ 1,0 1,1 Afirmao en: Gran Enciclopedia Soviética (1969–1978). Sección, versículu o párrafu: Хольберг Людвиг. Data de consulta: 28 setiembre 2015. Editorial: Большая Российская энциклопедия. Llingua de la obra o nome: rusu. Data d'espublización: 1969.
  2. ↑ 2,0 2,1 2,2 Afirmao en: autoridaes BNF. Identificador BnF: 11907650r. Data de consulta: 10 ochobre 2015. Autor: Biblioteca Nacional de Francia. Llingua de la obra o nome: francés.
  3. ↑ 3,0 3,1 Afirmao en: LIBRIS. Identificador de Libris: gdsvq8400j126rb. Data d'espublización: 26 marzu 2018. Data de consulta: 24 agostu 2018. Editorial: Biblioteca Nacional de Suecia.
  4. ↑ Afirmao en: Norsk biografisk leksikon. Norsk biografisk leksikon ID: Ludvig_Holberg. Editorial: Kunnskapsforlaget. Llingua de la obra o nome: Bokmål. ISSN: 2464-1502.
  5. ↑ Afirmao en: catálogu de la Biblioteca Nacional Checa. Identificador NKCR AUT: jn20000602978. Data de consulta: 30 agostu 2020.
  6. ↑ Andersen, Jens Kr.. «Ludvig Holberg - Forfatterportræt». Arkiv for Dansk Litteratur. En danés. Consultáu'l 2006-09-02.
  7. ↑ [1] Biografía de Holberg. N'inglés


Sacáu de «https://ast.wikipedia.org/w/index.php?title=Ludvig_Holberg&oldid=4243914»