Shotokai (松濤會, Shōtōkai) ye de mano la organización que fundó Gichin Funakoshi en 1930 pa enseñar y esparder l'arte del kárate [1]. La organización tovía esiste y promueve un estilu de kárate venceyáu a les enseñances del maestru Funakoshi, sobre too a la qu'afita que la competición ye contrario a la esencia del kárate. Anguaño’l términu Shotokai tamién denoma un métodu formal d'entrenamientu.

Shotokai
松濤會
País d'orixe  Xapón
Fundador Gichin Funakoshi, Shigeru Egami
Deporte olímpicu Non
Sitiu Oficial http://www.shotokai.jp

Historia editar

El Kárate introdúxolu en Xapón nos años 1920 Gichin Funakoshi, un alumnu d'Anko Itosu. El so primer dojo en Xapón abrió les puertes en 1922 dempués d'una célebre demostración na Escuela Normal Superior de Tokiu. En pallabres del maestru Funakoshi: “Cuando tenía vagar, diba pasiar a los pies del monte Torao. Allí, cuando tiraba l'aire, sentíase’l ruxerrux de les ondulaciones nes cañes de los pinos, asemeyaes a foles, y podía sentise’l fondu y intanxible misteriu que forma los raigaños de tolo que ta vivo." Poro, col tiempu l'estilu de Funakoshi foi conocíu como Shōtō-ryū, “la escuela de Shōtō”. Shō significa “pinu” y tórnase a “fola”. D’esta miente pue traducise’l nome shōtō por “foles nos pinos”, representando les ondulaciones de les cañes producíes pol aire nos pinos. Shōtō yera’l nomatu col que Funakoshi firmaba los sos poemes d'estilu chinu

Funakoshi, nacíu en 1868, dominaba les téuniques de los antiguos estilos shorin y shorei. Amás estudiara obres clásiques, la lliteratura china y la caligrafía. Yera maestru de la escuela pública.

Funakoshi siempre solliñó la rellación ente les artes marciales y el budismu zen. Por eso cambió los kanjis de la pallabra karate de “mano china (tōde)” a “mano vacía (karate)”. El términu fai referencia al vaciu del zen. Pero al mesmu tiempu esta decisión débese al ambiente reinante daquella, calistráu de nacionalismu xaponés. El karate-dō de Funakoshi, qu'acordies coles sos intenciones yera un arte marcial con fines pedagóxicos, diba cayendo cada vez más baxo la influyencia de los círculos nacionalistes y militaristes. En 1931 la organización estatal que gobernaba les artes marciales, la Dai Nihon Butotukai, esixó la introducción d'un sistema de graduación y de competición y nomó cuatro escueles como estilos principales: shoto-ryu, shito-ryu, goju-ryu y wado-ryu. Funakoshi aceutó’l sistema de cinturones, pero non les competiciones. Nin siquiera aceutaba’l kumite, l'exercitamientu del combate en pareya, que tamién ye prauticáu nel shotokai d'anguaño. Los distintos tipos de kumite foi incluyéndolos ente 1930 y 1935 cola ayuda de so fíu Yoshitaka. En 1935 los sos alumnos, al envís d'axuntase, crearon la Shotokai (asociación de los alumnos del maestru Shoto).

En 1936 Sensei Funakoshi cambió’l nome de la so asociación “Dai Nihon Karate-dō Kenkyukai” a “Dai Nyon Karate-dō Shōtōkai”, y abrió’l primer dojo que llevó’l nome de Shōtōkan (la casa de Shōtō), escoyíu polos sos alumnos. Sicasí l'estilu de Funakoshi lleva’l nome de Shotokan hasta los años 1960, cuando Shigeru Egami (l'alumnu más avanzáu de Funakoshi) introduxo grandes cambeos na práutica.

 
Shigeru Egami

Dixebra ente’l Shotokai y el Shotokan editar

Acabante la Segunda Guerra Mundial, cuando foi destruyíu’l Shotokan, dellos alumnos veteranos de Funakoshi –Nakayama, Nishiyama y Obata– pidieron que s’introduxera l'entrenamientu pa la competición y que s’espardiera’l kárate nos alcuentros con motivu de campeonatos, torneos, etc. Nakayama fundó en 1949 la JKA (Japan Karate Association, Asociación Xaponesa de Kárate) col envís de facer del kárate un deporte de competición. Funakoshi refugó sofitar esto masque foi nomáu “instructor d'honor”, honor que nun aceutó enxamás por mor de que karate-dō y competición nun yeren pa él daqué compatible. Entós nomó como heriede un uchi deshi (alumnu internu) que siguiera tamién los valores éticos del arte marcial: Shigeru Egami. Esti creó con otros alumnos de Funakoshi la NKS (Nihon Karate-dō Shōtōkai). Funakoshi morrió en 1957

Desendolcu del Karate-do Shotokai editar

Shigeru Egami siguió fiel al espíritu zen del karate-dō de Funakoshi: “El verdaderu nun ye sólo resistir al adversariu, sinón buscar tar n’harmonía con él. Matar nun ye una opción, nin se trata tampoco de ganar. L’exerciciu del karate-do ye pa progresar xuntos.” Con esti espíritu Egami anovó y desendolcó les téuniques. El so oxetivu yera crear un máximu d'enerxía y de presencia cola mayor relaxación y capacidá física, abriendo camín a l'harmonía y a la unidá nel movimientu común.

Egami socedió a Funakoshi tres la muerte d'ésti en 1957, coyendo los sos cargos nel honbu dojo (dojo central) de Xapón y la direición de la Nihon Karate-dō Shōtōkai como direutor téunicu, puestu qu'había caltener hasta la so muerte en 1981. Dende 1960 los cambeos qu'Egami fixo nel estilu shotokan llegaron a ser tan importantes y influyentes qu'escomienza entós a falase del estilu shotokai. La NKS presidíala daquella otru alumnu de Funakoshi: Genshin Hironishi, que siguió calteniendo la denomación de shotokai-ryu pal grupu que dirixía nel sen de la NKS. Dempués de la muerte d'Hironishi, Jotaro Takagi, antiguu direutor de la empresa Mitsubishi, convertióse nel presidente, cargu nel que sigue n’actualidá.

Carauterístiques editar

El refugu de la competición

En pallabres el maestru Egami, nun hai que buscar la victoria sobre un adversariu, sinón sobre unu mesmu, asina como l'harmonía colos demás. Esta foi una de les razones de la dixebra de los dos estilos: shotokan y shotokai.

Relaxáu, fluyíu, natural

Otru conceutu carauterísticu ye’l "trabayu relaxao" en cata de lo natural y la fluyidez de los movimientos y de les téuniques. Obsérvase tamién que’l trabayu de delles escueles Shotokai ye menos fluyío o más tenso que’l d'otres.

La forma especial del puñu

En visu a aumentar l'efeutu del impautu, la forma del puñu cambia a ippon ken (nudiellu del mediu) o a shoken (nudiellu del índiz) pa esparder un máximu d'enerxía sobre un mínimu de superficie.

Llegar rápido y lloñe

Visiblemente, y al aviesu del Shotokan, el vector de puxu en Shotokai nun ye solamente la cadera sinón tol cuerpu ensembre’l que se mueve con una gran amplitú como un bloque. El papel de la cadera ye simplemente de gatillu. Lo diferente del Shotokai ye tratar de llegar mui rápido y mui lloñe. Esti estilu tien como oxetivu los movimientos mui amplios, flexibles, fluyíos, rápidos y potentes. Un movimientu ampliu pue ser enforma rápidu, ye cuestión de coordinación. Ye proyeutar la masa del propiu cuerpu haza’l compañeru y “trespasalu” utilizando la inercia.

L’harmonía del cuerpu y del espíritu

Nun se pue dixebrar el cuerpu del espíritu, polo que tamién hai qu'educar la mente per aciu d'exercicios acionaos (Zen, respiración, Ki…) Lo mental predomina muncho más que la téunica. Si nun se ye a controlar l'espíritu, nun va podese nunca controlar el cuerpu.

Postures enforma baxes

Al envís d'aumentar la xera y fortalecer el cuerpu y l'espíritu.

Midare

El Midare, pa la idea del maestru Shigeru Egami, ye la téunica más ellaborada pa desendolcar el sentíu del combate que pue prauticase nes artes marciales. El Midare ye una forma de combate onde, por turnos, unu s’atopa na posición fixa d'atacante y l'otru na del qu'esquita; poro, desendólquense y aguíyense tolos sentíos. La situación de peligru crea l'atmósfera real del combate. La llibertá total del movimientu y l'harmonía que naz ente los compañeros permiten aportar a la plenitú final.

Ren tsuki kumite

Combate codificáu con téuniques definíes d'antemano. Dempués d'atacar Tori conviértese n’Uke y asina siguío hasta galdir.

La busca del Irimi

Esta ye una pallabra formada pol verbu “hairu” que significa entrar, y pol sustantivu “mi”, que significa cuerpu o carne. El términu ye entós perclaru: lliteralmente tórnase a “entrar nel cuerpu”. La imaxe más evidente dala’l Sumo. El sumotori tien qu'entrar con tol pesu, con tola so fuercia, contra l'oponente, sin parase en cálculos d'agresividá, que tien que ser total nel intre. Polo tanto ye un ataque nel sentíu más puru.

Kates editar

En Shotokai prautíquense trenta kates:

  1. Ten no kata
  2. Taikyoku shodan
  3. Taikyoku nidan
  4. Taikyoku sandan
  5. Heian shodan
  6. Heian nidan
  7. Heian sandan
  8. Heian yondan
  9. Heian godan
  10. Tekki shodan
  11. Tekki nidan
  12. Tekki sandan
  13. Bassai dai
  14. Bassai sho
  15. Kanku dai
  16. Kanku sho
  17. Hangetsu
  18. Gankaku
  19. Enpi
  20. Jion
  21. Jitte
  22. Nijushiho
  23. Jiin
  24. Meikyo
  25. Sochin
  26. Chinte
  27. Wankan
  28. Unsu
  29. Gojushiho sho
  30. Gojushiho dai

En Shotokan prautíquense 26 kates, pero los maestros Gichin y Gigo Funakoshi añadieron unes formes más elementales, formando los conxuntos Taikyoku y el Ten no kata, que sirvíen como introducción a los kates tradicionales.

Diferencies col estilu Shotokan editar

Les diferencies téuniques col estilu Shotokan nun son demasiaes, y básense principalmente nel resultáu de los estudios del maestru Egami sobre’l “tsuki” (téunica de puñu). Sensei Egami llegó a la conclusión de que l'usu del makiwara ye innecesariu, y afaló l'adopción de la téunica conocida como “nakadaka ken” (puñu d'un solu nudiellu), por considerala más efeutiva contra’l cuerpu humanu, que ye abondo más flexible que’l ríxidu makiwara.[2] [3] Otra diferencia notable ye’l fechu de que mientres los maestros del estilu Shotokan tán siempre cambiando, faciendo ampliaciones o incluyendo kates d'otros estilos de kárate, nes escueles de Shotokai siguen entrenando los kates qu'enseñara’l maestru Gichin Funakoshi ensin malapenes cambeos.

Organizaciones editar

  • London Karate-do Shoto Association (LKDSA)
  • AKSER (Association Karate-Do Shotokai Egamiryu)
  • ISKA (Israel Shotokai Karate-Do Association)
  • Karate Do Italia Kenkyukai
  • Karate Do Shotokai
  • Kiseikai (Francia)
  • Karate Do Shotokai Denmark Association
  • Karate Do Shotokai Europe (KDSE)
  • Murakami-Kai
  • Nihon Karate-do Shotokai
  • Shin-do Shotokai
  • Shotokai Karate Budo (SKB)
  • Scuola Shotokai Italia (S.S.I.)
  • American Karate-do Shotokai (AKDS)

Referencies editar

Enllaces esternos editar