Ufficiali di Notte

Los Ufficiali di Notte (n'asturianu: «Oficiales de Nueche») fueron un tribunal florentín que s'encargaba de la represión de la homosexualidá masculina, actividá que, por ser clandestina, efectuábase sobremanera de nueche, d'ende la denominación del tribunal. Nun se conoz nengún casu nel qu'esti tribunal actuara sobre muyeres.

Foi creáu pol reximientu florentín en 1432 y tuvo activu hasta'l 29 d'avientu de 1502. Taba compuestu por seis miembros. Toos teníen de ser homes casaos, mayores de 45 años y escoyíense por periodos d'un añu.

Les denuncies por sodomía llegaben de forma anónima, en papeles que se depositaben nes urnes distribuyíes con esi envís pela ciudá. Los archivos de los Ufficiali di Notte apurrieron a los historiadores datos bien pervalibles sobre la homosexualidá na dómina: asina, por casu, que los implicaos en tal práctica yeren d'edá nueva (ente 1478 y 1502, más del 80% de los acusaos teníen menos de trenta años)^[1] y que'l rol pasivu solía correr al cargu de los más nuevos, ente que los activos yeren los adultos.

Magar el so llabor represor y punitivo, los Ufficiali di Notte nun s'estremaron pola so crueldá y, ello ye que supunxeron una meyora al respective de los castigos aplicaos enantes en Florencia. Anque ente les penes establecíes inda taben vixentes la capadura y la muerte na foguera, na mayoría de les sos condenes castigar con una multa. Contabilizáronse unes 2.500 condenes por sodomía nos rexistros de los Ufficiali di Notte mientres tol tiempu de la so esistencia (nel postreru terciu, de 1478 a 1502, hubo 4.062 acusaciones; calcúlase qu'unos 12.500 homes en total fueron acusaos ante esti tribunal).^[2]

Ente los encausaos destaca Leonardo da Vinci. El 8 d'abril de 1476 presentóse una denuncia anónima contra delles persones, por sodomía peracabada col mozu de 17 años Jacopo Saltarelli. Amás de Leonardo, ente los otros acusaos taben Bartolomeo di Pasquino y sobremanera Leonardo Tornabuoni, nuevu renuevu de la influyente familia florentina de los Tornabuoni, emparentada colos Médici. Según dellos estudiosos foi la implicación d'esti postreru lo que xugó a favor de los acusaos. El 7 de xunu la denuncia archivóse y tolos imputaos fueron absueltos por falta de pruebes.^[3]

Estos casos y, polo xeneral, la fama de la práctica de la sodomía en Florencia foi bien popular en toa Europa, hasta l'estremu de que n'Alemaña s'acuñó'l términu Florenzer como sinónimu de sodomita.^[4]^[5]

Referencies

↑ CHOJNACKI, páx. 34.
↑ CROMPTON, Louis (2006). Homosexuality & Civilization. Cambridge y Londres: Belknap. 0-674-02233-5.
↑ ABBOTT, Elizabeth: A History of Celibacy. Ed. Da Capo Press, 2001, páx. 340. ISBN 0-306-81041-7.
↑ MICHAEL, Rocke: Forbidden Friendships: Homosexuality and male Culture in Renaissance Florence, 1996. ISBN 978-0-19-512292-3.
↑ RUGGIERO, Guido: The Boundaries of Eros, 1985. ISBN 978-0-19-505696-9.

Bibliografía

CHOJNACKI, Stanley: Women and men in Renaissance Venice: twelve essays on patrician society. JHU Press, 2000. ISBN 0-8018-6395-3.

[1] CHOJNACKI, páx. 34.

[Crompton-2] CROMPTON, Louis (2006). Homosexuality & Civilization. Cambridge y Londres: Belknap. 0-674-02233-5.

[3] ABBOTT, Elizabeth: A History of Celibacy. Ed. Da Capo Press, 2001, páx. 340. ISBN 0-306-81041-7.

[4] MICHAEL, Rocke: Forbidden Friendships: Homosexuality and male Culture in Renaissance Florence, 1996. ISBN 978-0-19-512292-3.

[5] RUGGIERO, Guido: The Boundaries of Eros, 1985. ISBN 978-0-19-505696-9.

[1]

[2]

[3]

[4]

[5]