Escudu de Parres

L'escudu'l conceyu asturianu de Parres ta cuarteáu en cruz.

Escudu oficial del Conceyu de Parres

• El primer cuartelu, amuesa un guerreru vestíu con túnica de plata, cascu y cota de malles, con un arma na so mandrecha, y suxetando na otra man la Cruz de la Vitoria, sobro un fondude montes y enriba l'anagrama de la Virxe María, en rellación colo socedío en Cangues d'Onís.

• El segundu cuartelu partíu. 1u, de plata, una flor de llis, d'azur, acompañada de cuatro roses de gules, una en cada cantón; 2u, n'oru, una faxa d'azur, con un ceñidor de plata, acompañada, no cimero d'una cruz floretiada, de gules, y embaxo d'un lluceru, d'azur. Fai referencia a l'escudu de la familia González d'Argandona qu'allevantaron el pendón conceyil.

• El tercer cuartel partíu. 1u, d'oru, un águila de sable; 2u, xaqueláu d'oru y gules, con bordura de sinople cargada de cuatro corderos de plata. Fai referencia a Estrada y Corderu de Nevares, familia qu'ostentaba'l señoríu del cotu de Les Arriondes.

• Cabera ente, el cuartu cuartelu, amuesa dos palmes puestes n'aspes somontáu d'una corona real abierta. El cuartu ye la Real Comunidá de San Pelayu d'Uviéu, pol so señoríu nel cotu de Llames de Parres.

Nuevu Escudu

Ficheru:Nuevu escudu Parres.jpg

Propuesta de nuevu escudu pa'l Conceyu de Parres.

"En campu azur tres montes en plata. Embaxo ondes d'agua n'azur y plata cargaes nel so centru d'un salmón n'oru. Al timbre Corona Real".

Nun plenu de setiembre del 2015 l'ayuntamientu de Parres acordó por unanimidá entamar l'espediente pa solicitar un nuevu escudu y una nueva bandera pal conceyu acordies coles normes heráldiques. En setiembre del 2016 l'ayuntamientu de Parres unvió una solicitú a la Real Academia de la Hestoria pa llegalizar l'escudu tradicional de Parres, ésti nun foi aceptáu pola institución académica y empobinó al consistoriu a "buscar un nuevu escudu , con elementos propios del Conceyu, que cumpliera coles condiciones de llexibilidá y cencillez que tien poseer toa composición heráldica."

Depués de presentar na prensa y en públicu'l nuevu diseñu en febreru del 2018, l'ayuntamientu de Parres nun plenu estraordinariu del 26 d'abril del 2018, decidió poner frenu, por unanimidá, a la oficialización del nuevu escudu por mor del clamor popular a la escontra.