El fechu más destacáu nel [[sieglu XVII]] foi la fundación de la [[Universidá d'Uviéu|universidá]] en [[1608]]. La donación póstuma de [[Fernando de Valdés Salas]] pa que se creara tardó bien de tiempu n'usase (l'inquisidor y arzobispu yá morriera en [[1568]]), pero camudó pa siempres la vida cultural de la ciudá. Esta conoció, nesti sieglu, ciertu crecimientu demográficu. Pesie a ello, y a que va convirtiéndose nel llugar de residencia de la nobleza y l'altu cleru, nun pasaba de los 7.000 habitantes al finar el sieglu.
Na [[Guerra de SucesiónSocesión española]] la ciudá caltúvose fiel a [[Felipe V d'España|Felipe V]]. Esti, años dempués ([[1717]]), fundó la [[Real Audiencia d'Asturies]] como tribunal d'apelación escontra les decisiones, munches veces arbitraries, de la [[Xunta Xeneral del Principáu d'Asturies|Xunta Xeneral]], controlada pola nobleza. Esti sieglu, d'otra banda, foi de gran actividá cultural; nella rescampló la figura de fray [[Benito Jerónimo Feijoo]], una de les figures cimeres de la cultura española d'esti sieglu que provocó colos sos ensayos, qu'elli nomaba ''discursos'' (axuntaos nes obres ''Teatro crítico universal'' y ''Cartas eruditas y curiosas'', ente más otres) y escribía na so celda del conventu de San Vicente (anguaño sede del [[Muséu Arqueolóxicu d'Asturies]]), grandes polémiques na so época. Creóse tamién nesta dómina la [[Sociedaes Económiques d'Amigos del País|Sociedá Económica d'Amigos del País]] que llegó a ser un grupu con un ciertu prestixu cultural y influyencia política.
