Kansas City (Kansas)

Kansas City, conocida tamién poles sigles KCK, ye una ciudá del estáu estauxunidense de Kansas. Ye la tercer ciudá mayor del estáu, y ye la sé alministrativa del condáu de Wyandotte, col que forma una ciudá-condáu consolidada. El condáu, qu'inclúi tamién les ciudaes independientes de Bonner Springs y Edwardsville, amás de parte de les agües del llagu Quivira y d'una fastera de territoriu non incorporáu nomada Loring, llenda col condáu de Johnson al sur, y col de Kansas City (Missouri) al este. La ciudá, la tercer mayor del área metropolitana de Kansas City, tenía una población, según la estimación de la Oficina del Censu pa 2018, de 152.958 habitantes.

Arcu de Rosedale, copia del Arcu del Trunfu de París llevantáu n'alcordanza de los soldaos d'esi suburbiu de la ciudá que morrieran na Primer Guerra Mundial.

La antigua Kansas City incorporose n'ochobre de 1872, y en 1880 foi proclamada ciudá de segunda clase pol gobernador de Kansas. En marzu de 1886 fundose la nueva Kansas City al traviés de la consolidación de cinco municipalidaes: l'antigua Kansas City, Armstrong, Armourdale, Riverview y Wyandotte. Esta cabera, fundada en 1857 por misioneros metodistes y nativos americanos d'etnia wyandot, yera la ciudá más antigua de la zona. El crecimientu de la ciudá, que tien un gobiernu xunificáu col so condáu de magar 1997, remóntase a la dçecada de 1890, cuando entamó a convertise nun suburbiu de Kansas City (Missouri).

Na ciudá hai una fábrica de coches de la compañía General Motors, que ye la tercera empresa con más emplegaos de la ciudá tres de l'hospital de la universidá de Kansas y la propia universidá. Tien un equipu de fútbol profesional, el Sporting Kansas City, que xuega na Major League Soccer.

Enllaces esternos

• Páxina web oficial del Unified Government of Wyandotte County/Kansas City, Kansas
• Páxina web oficial del consorciu turísticu de la ciudá (Kansas City, KS/Wyandotte County Convention and Visitors Bureau)