Territoriu del Norte

El Territoriu del Norte (Northern Territory), nomáu oficialmente Territoriu del Norte d'Australia (Northern Territory of Australia) ye un territoriu qu'ocupa la fastera centru-septentrional d'Australia. Llenda al oeste con Australia occidental (meridianu 129E), con Australia del Sur al sur (paralelu 26S) y con Queensland al este (meridianu 138E). Al norte llenda col mar de Timor, el mar d'Arafura y el golfu de Carpentaria. Tien una estension de 1.349.129 km², la tercera mayor de les xunidaes territoriales d'Australia y la decimoprimer mayor de toes les xunidaes territoriales subnacionales del mundu. La so población, escasa, ye de 245.800, menos de la metá de la de la islla de Tasmania.

Territoriu del Norte d'Australia.

La historia arqueolóxica del territoriu entama col asentamientu nelli, fae 40.000 años, d'indíxenes australianos. Los comerciantes makassan, de la islla indonesia de Sulawesi, entamaron a comerciar colos habitantes del territoriu, pa mercá-yos pepinos de mar, de magar el sieglu XVIII. Primero d'eso, nel sieglu XVII, la fastera costera del territoriu fora avistada por navegantes europeos. Sicasí, nun sedría hasta'l sieglu XVIII cuando los británicos tentaran d'asentase nelli. Tres de trés intentos fallíos de fundar un asentamientu (1824-28, 1838-49 y 1864-66) finalmente la fundación, a partir de 1869, del asentamientu de Port Darwin foi definitiva. La economía, anguaño, básase nel turismu y na minería.

La so capital, y principal ciudá, ye Darwin. La poblacion concéntrase a la vera la costa y a lo llargo la ruta l'autopista Stuart. Amás de la capital podemos citar, n'orde descendente de tamañu, les ciudaes de Palmerston, Alice Springs, Katherine, Nhulunbuy y Tennant Creek. Los habitantes del territoriu lleven el xentiliciu de territorians o northern territorians, y son conocíos tamién polos nomatos de top enders y centralians.