Stockton (California)

Stockton ye una ciudá del estáu estauxunidense de California. Asitiada nel Valle Central de California, ye la sede alministrativa del condáu de San Joaquin. La ciudá fundola en 1849 el capitán Charles Maria Weber, y recibió'l so nome n'honor de Robert F. Stockton, un militar que tuvo un papel fundamental na conquista de California polos Estaos Xuníos: foi la primer comunidá californiana que recibió un nome que nun fora d'orixe nativu americanu o español. Stockton allúgase a la vera'l ríu San Joaquín, na fastera septentrional del valle de San Joaquín, y tenía una población, en 2019, de 312.697 habitantes (estimación del Departamentu de Finances de California), que faen d'ella la 13ª mayor del estáu y la 61ª mayor del país.

Edificiu del Commercial & Savings Bank.

Construyíu demientres la fiebre del oru de California, el puertu marítimu de Stockton ye la puerta d'entrada de mercancíes del Valle Central. Foi, demientres el sieglu XIX, la vía d'accesu de mercancíes y pasaxeros a les mines d'oru del sur del estáu. La universidá más vieya del estáu, la Universidá del Pacíficu (University of the Pacific, UOP), tien la so sé na ciudá de magar 1923. En 2012 Stockton foi la ciudá mayor del país en pidir la situación de bancarrota municipal, de resultes de la mala xestión de la década de 1990, de los xenerosos planes de pensiones pa los emplegaos municipales y de la crisis financiera de 2008. La ciudá salió de la situación de bancarrota en febreru de 2015.

Enllaces esternos

• Páxina web oficial de la ciudá
• Páxina web turística oficial de la ciudá