Tuscaloosa (Alabama)

Tuscaloosa ye una ciudá del estáu estauxunidense d'Alabama. La ciudá, que ye la sé alministrativa del condáu homónimu, asítiase na fastera centru-occidental d'Alabama, na zona de transición ente la meseta de Piedmont y la llanura costera atlántica, a la oriella del ríu Black Warrior. Tien 101.129 habitantes (U.S. Census Bureau, 2019), que faen d'ella la quinta ciudá mayor del estáu. La ciudá yera nomada Tuskaloosa hasta los entamos del sieglu XX. La población, incorporada como ciudá (town) el 13 d'avientu de 1819, recibió'l so nome de Tuskaloosa, el xefe d'un grupu d'indíxenes americanos de llingua muskogueana que lluchó escontra los soldaos del esplorador español Hernando de Soto en 1540; foi la nomada batalla de Mabila, qu'asocedió no qu'anguaño ye la fastera central d'Alabama y finó cola derrota de los indíxenes.

Paséu arboláu a la vera'l ríu Black Warrior, en Tuscaloosa.

Tuscaloosa foi la capital d'Alabama de 1826 a 1846. D'esa dómina data la plantación, nes cais del so centru urbanu, de fileres de carbayos d'agua (Quercus nigra); de resultes d'esi fechu la ciudá tien el nomatu de Ciudá de los Druides (Druid City). Anguaño ye'l centru industrial, comercial, educativu y sanitariu del área centru-occidental del estáu, conocida como West Alabama. Ye, amás, la ciudá principal del área metropolitana estadística de Tuscaloosa, qu'inclúi los condaos de Hale, Pickens y Tuscalooso y tenía, en 2013, una población estimada de 235.628 habitantes. La ciudá ye la sé de la Universidá d'Alabama, que tien algamao sonadía nacional de resultes de los ésitos de los sos equipos deportivos, especialmente'l de fútbol americanu. Esta universidá ye'l principal motor económicu y cultural de la ciudá, y ello pesie a que Mercedes Benz tien na ciudá la que foi so primer planta de construcción d'automóviles d'América del Norte.