Circulación de Brewer-Dobson

El términu circulación de Drewer-Dobson fae referencia al patrón de circulación atmosférica global pol que l'aire troposféricu asciende a la estratosfera y dempués va desplazándose hacia los polos al tiempu que vuelve a descender. Los principios d'esti patrón foron propuestos por primer vegada por Gordon Dobson y Alan Brewer, y ye nomáu asina, n'honor d'ellos, de magar 1963. Esti patrón de circulación atmosféricu permite desplicar los datos, oxetivaos nos rexistros, de la distribución del vapor d'agua ya l'ozonu na atmósfera. Los datos recoyíos amuesen, tamién, qu'el patrón tien aceleraose nes caberes décades, posiblemente por culpa del cambéu climáticu.

Circulación de Brewer-Dobson. Diagrama fechu a partir de los datos recoyíos pol satélite meteorolóxicu Nimbus 7 ente 1980 y 1989.

Circulación

La circulación de Brewer-Dobson ye dirixida por ondes atmosfériques d'ámbetu planetariu, nomaes ondes de Rossby, qu'exercen un arrastre del aire troposféricu hacia l'oeste con un bombéu posterior d'elli en sentíu norte y sur (hacia los polos) pa conservar el momentu angular.

Impactu global

La circulación de Brewer-Dobson, como mete y saca aire de la estratosfera, determina la edá media y el tiempu d'estancia nesa capa de los gases estratosféricos, y tamién les temperatures del aire de la tropopausa na rexón tropical y el nivel de vapor d'agua na estratosfera. La circulación tamién inflúi directamente na distribución y abondancia del ozonu estratosféricu al llevalu dende los trópicos hacia los polos. La so esistencia desplica por qué l'aire tropical tien menos ozonu que l'aire polar pesie a que ye na estratosfera tropical na que se produz la mayoría del ozonu atmosféricu. La circulación de Brewer-Dobson, por últimu, inflúi tamién na vida media de les sustancies que degraden l'ozonu y na de dellos gases d'efectu invernaderu.

Aceleración por aciu del cambéu climáticu d'orixe antropoxénicu

L'interés pola circulación de Brewer-Dobson aumentó enforma nel sieglu XXI, a partir de les predicciones, basaes nos cambeos nos modelos de circulación xeneral y nos modelos químicu-climáticos, de que la circulación va acelerase por aciu del cambéu climáticu inducíu polos gases d'efectu invernaderu. Les observaciones más recientes confirmen que la circulación acelerose alredor d'un 2% cada década demientres les cuatru caberes décades, provocando un enfriamientu de la estratosfera baxa nos trópicos y un calecimientu de la mesma en llatitúes altes.