Juanín de Mieres

Juan Menéndez Muñiz, Juanín de Mieres, fue unu de los cantantes de tonada de mayor sonadía qu’hubo n’Asturies. Nació nel barriu d’Oñón (Mieres) el 14 d’ochobre de 1905 y morrió en Xixón el 13 de setiembre de 2003.

La so afición pola música vino-y por un ambiente familiar favoratible y de bien neñu entamó a cantar en diversos orfeones convirtiéndose pronto na so voz principal, aunque él siempre reconoció que la so verdadera escuela yeren los chigres onde aconceyaba con amigos pa cantar y beber sidra. A los 15 años tuvo la so primera ovación nel Antroxu mierense, un añu depués yera’l solista na cuerda de barítonos na “Capilla Sacra de Mieres”, y a los 19 años entró a formar parte del orfeón de la villa nel que tuvo 31 años.

Nel añu 1948 yera la gran estrella del concurso entamáu pol diariu “Región” que yera’l de mayor importancia de los que s’entamaben naquelles dómines.

Dexó grabaes más de 40 tonaes en nueve discos y en ninguna tuvo acompañáu pola gaita. Destaquen ente elles “A la salida del Sella”, “Pasé el puertu Payares”, “Cantar bien, neña”, “Arrea, carreteru” o “Los xatiquinos”.

La so voz y el so estilu personal failu ser una referencia obligada dientro’l mundu de la canción asturiana, ocupando un llugar destacáu xunto a otros importantes cantantes como Xuacu’l de Sama, Ángel “el Maragatu”, Miranda o Cuchichi.

El periodista Ricardo Vázquez Prada bautizólu como El Almirante de la tonada.

Durante 60 años vivió na so villa de Mieres, pasando los sos últimos años de vida en Xixón a onde se traslladaren les sos fíes, como tantos mierenses, a trabayar n’Uninsa