'''Inaciu Galán y González''' ''(Xixón, 6 de xunu de 1986)'' díose a conocer polos sos programes de radio ''Xuventú d'anguaño'' (2003-2004) y ''Asina foi... el Surdimientu'' (2004-… )na emisora comercial Onda Peñes. Por esti últimu programa recibió nel añu 2005'l Premiu Enriqueta González Rubín de periodismu, otorgáu pol Principáu d'Asturies. Collabora amás con Televisión Llocal Xixón (TLG)y colos diarios lletrónicos Asturies.com y Asturnews.com. Nel 2004 fundó, xunto a Benxa Pérez, H.A XAREOS, asociación que dende entós vien organizando actos como'l ''I Certame de Monólogu Modernu ¡Rite n'asturianu!.'' Esti certame, que presentaba Galán, supunxo l'asentamientu definitivu de la modernización del monólogu asturianu y foi retrasmitíu pela televisión. Ye'l traductor de la revista de cómics n'asturianu EL GOMERU. N'abril del 2005 participó xunto a otros escritores asturianos nel alcuentru lliterariu 'Voces d'un país nel mundu', en Bélxica. Poco dempués coordinó en Mallorca l'alcuentru 'Diada per la llengua, cultura i tradicions dels pobles de Mallorca i Principat d'Astùries'. Como escritor algamó dellos premios y distinciones y tien espublizaos dellos testos en Lletres Asturianes, Reciella Malory, La Ratonera, La Nueva Quintana y La Migaya. Nel añu 2006 espublizó'l primer diccionariu del asturianu con una llingua estranxera, el ''Diccionariu básicu asturianu-inglés / inglés-asturianu // Introductory Asturian-English / English-Asturian Dictionary (Entamu d'Ana Cano)'' con Ediciones Trabe. Ye profesor de llingua asturiana na Universidá Popular de Xixón y tamién lo foi pa funcionarios de dellos conceyos. Na Selmana de les Lletres Asturianes del añu 2006 foi seleicionáu na antoloxía ''L'álbum de Talía'', editáu pola Xunta Xeneral del Principáu pa la llectura de los diputaos.
