Diferencies ente revisiones de «Pradal Serey»

Contenido eliminado Contenido añadido
Páxina nueva: {{Infobox arte marcial | logo = | logocaption = | logosize = | imaxe = Prodal1.jpg‎ | imagecaption = Rapaz prauticando...
(Nun hai diferencies)

Revisión a fecha de 12:28 11 abr 2011

El Pradal Serey ye un arte marcial ensin armes de Camboya. En khmer la pallabra pradal significa lluchar o boxear, y serey significa llibre. Anque usáu n’orixe nel campu batalla, anguaño’l pradal serey ye ún de los deportes nacionales de Camboya. Los sos movimientos cambiáronse daqué p’axustase a les regles modernes.

Pradal Serey
Rapaz prauticando téuniques de coldu en sacu
Tamién Kun Khmer, Khmer Boxing, Kbachkun Pradal Khmer
Enfoque Principalmente téuniques de percusión (boxéu), pero tamién valtos
Contautu/durez Contautu plenu
País d'orixe Camboya
Prauticantes famosos Eh Phoutong, Bun Sothea
Paternidá Kbachkun Boran Khmer, Yuthakun Khmer Khom
Deporte olímpicu Non
Cambiar los datos en Wikidata

El pradal serey ye cuasimente netu al Kbachkun Boran ensin armes, sacantes que nun inclúi mae (téuniques esenciales) y tvear (sistema básicu centráu nos pasos). En cuenta d’ello céntrase más na victoria nel combate. Anque ye sobre too conocíu pola so téunica de pataes, que xenera la potencia dende’l xiru de les caderes más que de llanzar la pierna, el pradal serey consta de cuatro tipos de golpes: puñetazos, pataes, coldazos y rodiyazos. L’agarre úsase pa valtar al oponente. En comparanza con otres formes de kick boxing del sureste d’Asia, el pradal serey tien posiciones de combate más esnidioses y engañoses. L’estilu camboyanu tiende a utilizar más coldazos que los d’otres rexones. Les victories débense más a una téunica de coldu qu’a cualesquier otru golpe.

Hestoria

Lluchar foi una actividá constante nel sureste d’Asia dende tiempos antiguos, que col tiempu había producir formes de llucha organizaes. Na era d’Angkor, les artes marciales tanto con armes como a mano vacía foron prauticaes polos khmeres. Hai nicios de qu’un estilu netu al pradal serey conocíu como bokator esistía nel sieglu IX, pudiendo ser una de les razones de que l’imperiu khmer fuera una fuercia tan dominante nel sureste d’Asia. El reinu d’Angkor tenía una forma temprana de pradal serey llamada Yuthakun khmer khom, xunto con armes variaes y elefantes de guerra pa enfrentase al so principal enemigu, el reinu Champa de Vietnam, y, más tarde, Siam. Inda se recreen representaciones de batalles con elefantes na Xunta d’Elefantes de Surin.

Daquella’l reinu d’Angkor dominaba y controlaba la mayor parte de les actuales Camboya, Tailandia, Vietnam y Laos.[1] En resultes, Camboya influyó muncho nes cultures tai y laosiana.[2] Esto llevó a los khmeres a creer que toles formes de kickboxing del sureste d’Asia apenzaron col pueblu Mon-Khmer tempranu; caltienen que’l Pradal Serey derivó del bokator y tuvo nel orixe del Muay Thai. Pencima d’histories orales de los sos antepasaos, esti argumentu básase nos baxurrelieves que dexaron los khmeres antiguos nos templos Bayon y otros templos d’Angkor. Muncha de la documentación sobre l’arte khmer antiguu foi destruyía o prindada polos exércitos tai invasores cuando los siameses escalaron Angkor y llevaron p’Ayutthaya a prisioneros khmeres incluyendo a miembros de la corte real.[3] El rei-guerreru khmer Jayavarman VII, y el fundador del Laos xuníu, Fa Ngum, taben ente los cabezaleros militares que se creye qu’entrenaron los antiguos estilos de llucha de Camboya.

Nel periodu colonial, los colonos europeos consideraron a les artes marciales como’l pradal serey xabaces y incivilizaes. Los franceses convertieron l’arte nun deporte añadiéndo-y rondes cronometraes, un “ring” de boxéu y guantes de boxéu occidental al envís d’amenorgar les lesiones. A lo primero los combates facíense en fueyos puercos con porques regles, y les manes encañábense con cuerda. Dacuando había boxeadores que mangaben cáscares marines nos nudiellos pa facer más dañu. Nos años 1960, los promotores de boxéu camboyanu tresnaron exhibiciones ente artes marciales variaes.[4]

Decadencia y xorrecimientu del pradal serey

 
Una escena que representa’l bloquéu d’una patada nun baxurrelieve de la rexón d’Angkor.

Cuando’l caos de la guerra del Vietnam, Camboya sufrió la so propia guerra civil. El 17 d’abril de 1975 los rebeldes maoístes, los Khmeres Bermeyos, derrocaron el gobiernu de la República Khmer presidida por Lon Nol dempués de que los americanos colaren de Vietnam. El plan de los Khmeres Bermeyos yera desaniciar la sociedá moderna y crear una utopía agrícola.[5] Achuquinaron a la xente educao, a los que tuvieren venceyaos al antiguu gobiernu y a cualesquiera que se pensara que fuera un privilexáu de la vieya sociedá (médicos, profesores, soldaos, actores, cantantes, boxeadores, etc.), y, al envís de reeducalos baxo’l nuevu gobiernu, llendaron al restu de la xente en campos de trabayu, au morrieron munchos de fame y enfermedaes. Torgaron tamién les artes marciales tradicionales y munchos boxeadores foron executaos o forciaos a trabayar hasta morrer, lo que cuasi desanició’l pradal serey. Atalántase que 1,7 millones de camboyanos, o’l 21% de la población, morrieron daquella, acordies colos estudios del Programa sobre’l Xenocidiu de Camboya de la Universidá de Yale.[6] Esto duró cuatro años hasta 1979, cuando los vietnamites, xuntamente con antiguos oficiales de los Khmeres Bermeyos incluyendo al primer ministru Hun Sen, valtaron a los Khmeres Bermeyos. Nos años de relativa paz de magar marcharon los vietnamites hasta’l reestablecimientu del Reinu de Camboya, les artes tradicionales del país alitaron, incluyendo al pradal serey.

El pradal serey ta xorreciendo fuerte de magar lu torgaren nos años 1970.[7] Camboya ta tentando de comercializar el so estilu de boxéu al mesmu nivel que’l Muay Thai inda cuando’l so estatutu de país del cuartu mundu failu carecer de falta de financiación. Abriéronse munchos ximnasios y bon númberu d’estudiantes, llocales y foranos, entrenen en Camboya. Fáense competiciones selmanales, la mayoría televisaes en vivo, y munchos de los campeones camboyanos viaxen pa competir pel mundu. Actualmente hai al rodiu de 70 clubes de boxéu per tol país.

En Camboya, el Pradal Serey diríxelu la Federación Camboyana de Boxéu (CBF), antigua Federación Camboyana de Boxéu Amatéur (CABF), que ye la que da les llicencies obligatories p’árbitros, xueces y lluchadores. Les emisores de televisión qu’organicen torneos de boxéu khmer tán supervisaes pola CBF. Cada emisora ye responsable d’organizar a los boxeadores, entrenadores, personal médicu y músicos. La CBF manda los árbitros, xueces y cronometradores. Nel estranxeru’l boxéu camboyanu promuévenlu cuatro organizaciones, esto ye: la Federación Europea de Boxéu Khmer, asitiada n’Alemaña; la Federación de les Artes Marciales Khmeres (FAMK), asitiada en Francia; l’Asociación Anh Binh Minh d’Artes Marciales Khmer, en Vietnam; y la Kun Khmer Australia, n’Australia. Hai otres organizaciones de creación recién n’España y n’Italia, y ta entamándose otra en Bélxica.[8] L’Asociación Internacional del Deporte Kickboxing asitiada nel Reinu Xuníu tien organizao combates con participación de lluchadores camboyanos. Dalgunos boxeadores khmer llucharon nel estranxeru, en países como Corea del Sur.[9]

Ente los siguidores del pradal serey tien habío esmolimientos tocántenes a les apuestes y a les mafies. L’entrenador camboyanu Chiit Sarim refirióse a les diferencies ente l’ambiente del boxéu d’enantes y el d’agora: "Tengo viaxao de pagoda en pagoda pa participar nos torneos del festival del agua. Les pagodes yeren los llugares tradicionales de los combates de boxéu... Ellos [los siguidores actuales] actúen inapropiadamente. Llevanten les manes y griten al altu la lleva. Apuesten y nun tienen respetu polos boxeadores. Namái piensen en ganar la so apuesta. Nel mio tiempu nun pasaba cosa tala. Los combates taben bien organizaos y yeren mui populares. Agora los acérrimes nun tienen moralidá".

Los torneos tresmítense en direuto pela televisión nacional. La canal TV5 de Camboya echa torneos en direuto los sábados y los domingos.[10] Na Bayon Television tamién hai torneos de kickboxing en direuto los sábados y los domingos.[11]

La conocencia del pradal serey nel mundu occidental llegó de poco p’acá colos periodistes de viaxes y los turistes. Amás el pradal serey foi presentáu n’”Human Weapon”, de la Canal d’Historia, y mentáu nel episodiu camboyanu de les Guíes Pilot.[12]

Songchai Ratanasuban, el promotor númberu unu en Tailandia, llevó la so S1 Promotion a Pnom Penh en xunetu del 2005. Nel Cambodian S1 World Championship, ganó Bun Sothea tres derrotar a Michael Paszowski, Dzhabar Askerov y Lor Samnang delantre de 30.000 persones nel Estadiu Nacional Olímpicu de Pnom Penh.

Nel 2008 la Cambodian Television Network (CTN) echó una serie de televisión-realidá sobre’l pradal serey llamada Kun Khmer Champion. La serie presentaba a boxeadores de 65 kilos, foi producida por Ma Serey y co-presentada por Ma Serey y Eh Phoutong.

El 28 d’agostu del 2008, los boxeadores camboyanos Vorn Viva y Meas ganaron en Pnom Penh los títulos mundiales de los pesos medios y “welter” de la ISKA (Asociación Internacional de Kárate Deportivu). Ye la primer vez qu’un camboyanu gana un títulu mundial de kickboxing.[13]

Intentos d’aunir los estilos de boxéu

Nun conceyu de l’ASEAN (Asociación de Naciones del Sureste d’Asia) nel 1995 a respeutive la siguiente competición Copa del Rei de Muay Thai, Camboya propunxo renomar el Muay Thai como "Boxéu Sovannaphum” o "SEA Boxing" (Boxéu del Sureste d’Asia), pa representar a Tailandia, Camboya, Laos y Myanmar. Sovannaphum significa "tierra dorada" en khmer, y escríbese Suwannabhumi en tailandés. El nome refierse al sureste asiáticu continental na llingua pali de la India.

Tailandia nun apautó, aldericando que cada país del sureste asiáticu tien el so estilu de boxéu propiu, y que Tailandia taba en reduñes de facer el so kickboxing un deporte internacional. Nos Xuegos del Sureste d’Asia (SEA Games) del 2005, Camboya nun participó nel tornéu de Muay Thai como protesta pol Nome usáu pa referise al deporte.

Regles y sistema d’asaltos

La competición consta de cinco rondes de tres minutos, y tien llugar nun “ring” de boxéu de 6,1 metros cuadraos. Faise una posa de minutu y mediu o dos minutos ente cada ronda. Al principiu de cada combate los boxeadores faen los rituales de rezu conocíos como “kun kru”. Demientres el combate tócase música tradicional camboyana colos instrumentos llamaos skor yaul (una especie de tambor), “sralai” (flauta de xungu) y “chhing” (tarrañueles metáliques). Los boxeadores modernos lleven guantes de cueru y pantalones curtios de nilón.[14]

Regles
  1. Nun ta permitío cutir al contrariu cuando ta en suelu.
  2. Nun ta permitío morder.
  3. Cuando un lluchador nun ye quien a siguir, l’árbitru para’l combate.
  4. Nun ta permitío golpiar al oponente en llombu.
  5. Los boxeadores nun pueden agarrase a les cuerdes.
  6. Nun se permiten los golpes a los xenitales.

La victoria pue ser por fuera de combate (KO). Dase’l KO cuando un boxeador cai valtáu y nun pue siguir lluchando dempués de que l’árbitru cuente 10 segundos, anque ésti tamién pue nun facer la cuenta y declarar el fuera de combate si ta claro que’l boxeador nun alica dafechu. La victoria pue algamase al final del combate cuando los xueces deciden pol sistema de puntos qué lluchador foi más efeutivu. Si los lluchadores lleguen al final cola mesma puntuación, dase l’empate.[14]

Referencies

  1. Michael Freeman, Claude Jacques: Ancient Angkor, Asia Books, ISBN 974-8225-27-5.
  2. Cambodia: History, britannica.com (retrieved January 28, 2009).
  3. The Ayutthayan period, britannica.com (retrieved November 5, 2006).
  4. «Cambodian Boxing». National Geographic School Bulletin (National Geographic) 128 (7). October 24, 1966. 
  5. Sites, Kevin. July 18, 2006. Year Zero, Yahoo.com (retrieved November 5, 2006)
  6. "Cambodia Genocide Project | Yale University." Cambodian Genocide Project.(retrieved 16 Jan. 2009)
  7. «Khmer Kickboxers No Match for Bangkok Fighters». Black Belt 12 (8):  p. 62. 1974. 
  8. Rahn, Cornelius. December 17, 2008. Monday night's all right for fighting in Phnom Penh, Phnompenhpost.com (retrieved January 19, 2009)
  9. Sokheng, Vong. June 11, 2008. Cambodian kick boxers triumph in South Korea, Phnompenhpost.com (retrieved January 19, 2009)
  10. «TV5 Cambodia Friday Schedule». Channel 5 Cambodia (2011). Consultáu'l 02/17/2011.
  11. «Angkor Youth Boxing Club » Weekend wrap up». Paddy's Gym (2008). Consultáu'l 02/17/2011.
  12. "Cambodian Bloodsport". Human Weapon. Bill Duff, Jason Chambers. History Channel. 16 November 2007
  13. http://www.paddysgym.com/news/
  14. 14,0 14,1 «Khmer Boxing». Leisure Cambodia 1 (7). 12/1/2001. http://www.leisurecambodia.com/Leisure_Cambodia/No.07/boxing.htm. Consultáu'l 02/17/2011. 

Enllaces esternos