Salvador Dalí

Salvador Felip Jacint Dalí i Domènech, marquès de Dalí de Púbol (Figueres, 11 de mayu de 1904 – Figueres, 23 de xineru de 1989) foi un pintor, decorador y escritor catalán, ún de los principales representantes del surrealismu. Suelen atribuyise les sos habilidaes pictóriques a la influyencia y l'almiración pol arte renacentista. Dalí tuvo l'habilidá de forxar un estilu personal y reconocible. Una de les sos obres más conocíes es La persistencia de la memoria, tamién nomada «los relós blandios», que data del añu 1931.

Anque'l so principal mediu d'espresión foi la pintura, tamién va facer incursiones nos campos del cine, la escultura, el diseñu y la moda, la xoyería y el teatru, disciplina na que va trabayar como diseñador de vestuariu y como escenógrafu. Tamién va escribir dellos llibros, ente los que destaca Diari d'un geni (1965).

Supo trabayar perbien la so faceta pública, siendo la so muyer i musa, Gala Dalí, ún de los personaxes capitales dientro de la so biografía y xestora económica que-y valió l'apellativu d'"Avida Dollars" (anagrama de Salvador Dalí). Les sos apariciones en público, bien fueren entrevistes o happenings, nun dexaben indiferentes; y la so rellación ambigua col franquismu fixeren d'esti personaxe un iconu poliédricu del sieglu XX. El contemporaniu y tamién catalán Josep Pla i Casadevalldedíca-y dellos capítulos d'"Homenots".