Bakú

Bakú (n'azerí Bakı, en rusu Баку) ye la capital y ciudá más poblada d'Azerbaiján, del mar Caspiu y del Cáucasu. Ta asitiada na mariña sur de la península d'Absheron, que se proxeuta nel Caspiu. La ciudá compónse de dos partes principales: el centru y el cascu antiguu interior. En xineru de 2011 Bakú tenía una población de 2.092.400 habitantes, de los cualos 153.400 yeren movíos internos y 143.400 refuxaos de la guerra de Nagorno Karabaj.

Bakú estrema n'once distritos alministrativos (raiones) y 48 conceyos. Ente estos atópense los conceyos de les islles de la badea de Bakú y Neft Daşlları construyíes sobro pilotes nel mar Caspio, a 60 km de Bakú. El centru urbanu de la ciudá, col Palaciu de los Shirvanshah y la Torre de la Doncella, foi inscritu pola UNESCO como Patrimoniu de la Humanidá en 2000. Acordies cola clasificación de Lonely Planet, Bakú tamién s'atopa ente los diez meyores destinos de vida nocherniega urbana del mundu.

La ciudá foi un de los mayores centros petrolíferos de l'antigua Xunión Soviética y anguaño ye'l centru científicu, cultural ya industrial d'Azerbaiján. Munches instituciones importantes d'Azerbaiján tienen la so see ellí, incluyendo SOCAR, una de les cien principales empreses del mundu, ente otres. El Puertu de Comerciu Marítimu Internacional de Bakú, protexíu poles islles del archipiélagu Bakú escontra l'este y la península d'Absheron al norte, ye capaz de tresportar dos millones de tonelaes de carga xeneral y ensuga a granel per añu. La ciudá acoyó'l 57.º Festival d'Eurovisión en 2012 y va ser la see de los Xuegos Europeos nel 2015.