Aesculus hippocastanum

La castañal de la india (Aesculus hippocastanum) ye un árbol de gran porte perteneciente a la familia de les sapindacees. Identifícase comunmente como falsa castañal por cuenta de que los sos frutos presenten una gran semeyanza esterna con aquellos de los árboles del xéneru Castanea de la familia de les fagácees.

Aesculus hippocastanum castañal de la india
Clasificación científica
Reinu:	Plantae
Subreinu:	Tracheobionta
División:	Magnoliophyta
Clas:	Magnoliopsida
Subclas:	Rosidae
Orde:	Sapindales
Familia:	Sapindaceae
Subfamilia:	Hippocastanoideae
Tribu:	Hippocastaneae
Xéneru:	Aesculus
Especie:	A. hippocastanum L., Sp. Pl., vol. 1, p. 344, 1753[1]
Distribución
Consultes
Royal Botanic Gardens, Kew	Royal Botanic Gardens, Kew
World Flora Online	World Flora online
[editar datos en Wikidata]

Aspeutu xeneral.

Carauterístiques

Panícula de flores.

Fueyes y flores.

Fueyes y tueru.

Ye un árbol qu'algama los 30 metros d'altor. Tien el tueru erectu que desenvuelve numberoses cañes. Les fueyes son grandes y opuestes, tienen un llargu peciolu y tán estremaes en 5 o 7 foliolos. Les flores son blanques y formen panícules pirámidales. La corola tien cinco pétalos y el cáliz tien forma de campana. Hai 7 estames con anteres coloráu-marrones. El frutu, la "castaña d'indies", ye una cápsula con un envoltoriu espinosu dehiscente en trés partes pa lliberar les granes conteníes nel so interior (de normal una y n'ocasiones dos), d'unos 5 cm, y que presenten un pie de color marrón escuru con una notable marca clara o ablancazada na so base. Nun ye comestible pal home pola so alta toxicidá, pero dellos animales son inmunes a l'aesculina, una saponina hemolisiante, que ye'l principal compuestu velenosu que contién.

Distribución xeográfica

Orixinaria d'una pequeña zona montiega de los Montes del Pindo y de los Balcanes (Albania, Bulgaria, antigua Yugoslavia y Grecia). Aclimatada y llargamente cultivada nes rexones templaes del globu.

Propiedaes

• Contién dellos principios activos como saponines y tanínos.
• Polos sos flavonoides úsase pa tratar flebitis, varices, hemorroides y problemes vasculares.
• Per vía esterna protexe'l pelo y esisten xampús colos sos estractos.
• El so estractu fluyíu úsase en preparaciones antisolares pa protexer la piel.
• En grandes dosis pue ser tóxica, polo que nun tien de suministrase a persones de riesgu.

Frutos y les sos granes.

Principios activos

Na corteza: heterósidos cumarínicos (2-3%): esculósidu, fraxósidu, escopoletósidu. taninos catéquicos; leucoantocianósidos, flavonoles: glucósidos del quercetol. Alantoína. Fitoesteroles.

Nel pericarpiu: taninos catéquicos, saponósidos, pectina, potasiu, calciu, fósforu, aceite etéreu.

Nos cotiledones: flavonoides (esculina), saponósidos triterpénicos (escina).

Nes fueyes: heterósidos cumarínicos: esculósidu, escopoletósidu, fraxósidu; flavonoles derivaos del quercetol, ramnetol y kenferol; taninos leucoantocianósidos. Traces d'escina. Fitosteroles: sitosterol, estigmasterol, campestrol.

Aición farmacolóxica

Ye un tónicu venosu o vasoproteutor que consigue menguar la mafa del sangre, volviéndola más líquida, amenorga'l tiempu de sedimentación provocando una desconxestión de los vasos sanguíneos y aumenta la resistencia capilar gracies a l'aición de la escina y l'esculósidu. La escina tamién tien propiedaes antiinflamatories y controla la permeabilidá de los vasos (actividá antiedematosa). En xunto realiza una actividá antivitamínica P. Los saponósidos faciliten l'espardimientu d'otros principios activos cuando s'apliquen per vía tópica. Los taninos provoquen un efeutu astrinxente.

Usos melecinales

Puede aplicase en forma de pomada per vía esterna yá qu'amenorga'l diámetru de les venes menguando la inflamación provocada por varices, flebitis, insuficiencia venosa y otros trestornos circulatorios (como por casu edemes, equimosis, cuperosis arrosada). Al ser un potente vasoconstrictor úsase coles hemorroides p'amenorgar el so volume (al tener una elevada turxencia) y solliviar el so dolor. L'estractu secu prepárase en forma de cápsules que s'inxeren per vía oral en casos de fraxilidá capilar, epistaxis, metrorraxa, dismenorrees, etc.

Taxonomía

Aesculus hippocastanum describióse por Carlos Linneo y espublizóse en Species Plantarum, vol. 1, p. 344, nel añu 1753.

Etimoloxía

La castañal de la india (Aesculus hippocastanum) ye unu de los árboles que producen abiyotes ("Glandem, quae proprie intellegitur, ferunt robur, quercus, aesculus, ..." -L'abiyota puramente dicha llévenla el carbayu, ..., el aesculus, ...) y, quiciabes d'ellí provién el tracamundiu, pos les castañes d'india tienen un llonxanu y superficial paecíu cola abiyotes pola so piel dura y la so carne firme y amarellentao.

hippocastanum: del Griegu ίπποχ, hippos, el caballu y el llatín castanea, deriváu del griegu χάστανον, la castaña, y que significa lliteralmente "castaña de caballu" pos la lleenda cunta que "los Turcos suministraben los frutos de la Castañal india a los sos caballos vieyos con oxetu d'asela-yos la tos y sollivia-yos l'asma."

Sinonimia

• Aesculus asplenifolia Loudon
• Aesculus castanea Gilib. nom. invalid.
• Aesculus hippocastanum var. argenteovariegata Loudon
• Aesculus hippocastanum var. aureovariegata Loudon
• Aesculus hippocastanum var. beaumanii C.K.Schneid.
• Aesculus hippocastanum f. beaumanii (C.K.Schneid.) Dole
• Aesculus hippocastanum var. flore-plenu Loudon
• Aesculus hippocastanum var. incisa Booth ex Loudon
• Aesculus hippocastanum var. pendula Puvill.
• Aesculus hippocastanum f. pendula (Puvill.) Rehder
• Aesculus hippocastanum var. variegata Loudon
• Aesculus memmingeri K.Koch
• Aesculus procera Salisb.
• Aesculus septenata Stokes
• Hippocastanum aesculus Cav.
• Hippocastanum vulgare Gaertn.
• Pawia hippocastanum Kuntze

Ver tamién

• Planta melecinal
• Fitoterapia
• Usos melecinales de los raigaños
• Medicina china tradicional
• Terminoloxía descriptiva de les plantes
• Cronoloxía de la botánica
• Historia de la botánica

Bibliografía

• Esta obra remanez de la traducción de Castanyer d'Índia comú de Wikipedia - catalán, espublizada polos sos editores baxo la Llicencia de documentación llibre de GNU y la Llicencia Creative Commons Atribución-CompartirIgual 3.0 Unported.

1. Flora of China Editorial Committee. 2007. Fl. China 12: 1–534. Science Press & Missouri Botanical Garden Press, Beijing & St. Louis.
2. "Plantas Medicinales, bayas, verduras silvestres. Guias de Naturaleza Blume" Ed. Blume 1ª Edición (1985)
3. "Enciclopedia de las Plantas Medicinales" Dr. Pamplona Roger Biblioteca Educación y Salud Vol. 2 1ª Edición (1995)
4. "Plantas Medicinales. El Dioscórides Renovado" Pio Font Quer Ed Labor 7ª Edición (1981)
5. "Guía Práctica de las plantas medicinales y la salud" Vol. 4 Crédito Bibliotecario 2ª Edición (1991)
6. "Vademecum de prescripción de plantas medicinales" Ed.Masson 3ª edición (1998)

Enllaces esternos

• Wikimedia Commons acueye conteníu multimedia sobre Aesculus hippocastanum .

• Aesculus hippocastanum n'Árboles Ibéricos

• Datos: Q26899
• Multimedia: Aesculus hippocastanum
• Especies: Aesculus hippocastanum