Alfa Lupi
Alfa Lupi (α Lup / HD 129056)[7] ye la estrella más brillosa de la constelación de Lupus, el llobu, con magnitú aparente +2,30. Alcuéntrase a 550 años lluz del Sistema Solar.
Nome editar
Alfa Lupi nun tuvo nome propiu habitual sacante en China, onde yera conocida como Yang Mun o Men, la Puerta del Sur». Otru nome dacuando utilizáu pa designar a esta estrella ye Kakkab. Provién del títulu Kakkab El so‑gub Gud‑Elim usáu d'antiguo nel valle del Éufrates, «la estrella a la izquierda del toru enastáu», paez qu'en referencia a un centauru representáu nel cielu.[8]
Carauterístiques físiques editar
Alfa Lupi ye una estrella xigante azul caliente de tipu espectral B1.5III, que la so temperatura superficial ye de 21.600 K. Relluma con una lluminosidá equivalente a 20.000 soles, siendo la mayor parte de la so enerxía emitida en forma de lluz ultravioleta.[9] Presenta una metalicidá —bayura relativa d'elementos más pesaos que'l heliu— comparable a la solar ([M/H] = +0,04 ± 0,10).[10] Con una masa envalorada 10 vegaes mayor que la masa solar, ye una estrella relativamente nueva, d'unos 20 millones d'años d'edá.[9]
Alfa Lupi ye una variable del tipu Beta Cephei, asemeyada a Murzim (β Canis Majoris). Esti tipu d'estrelles amuesen variaciones nel so rellumu por cuenta de pulsaciones na so superficie. Nel casu d'Alfa Lupi estes variaciones son d'un 3% nel so lluminosidá y el so periodu ye de daqué más de 6 hores y 14 minutos, unu de los más llargos dientro d'esta clase de variables.
Como munches estrelles de tipu espectral O y B, Alfa Lupi forma parte d'una asociación estelar OB, grupu d'estrelles esvalixáu con un probable orixe común. Concretamente ye miembru de la subasociación «Centaurus Cimera-Lupus» o UCL, que de la mesma forma parte de la gran Asociación Scorpius-Centaurus. Conforma una estrella doble con una tenue «compañera» de magnitú 13, visualmente a 28 segundos d'arcu. Desconozse si dambes estrelles constitúin un verdaderu sistema binariu.[9]
Referencies editar
- ↑ 1,0 1,1 1,2 1,3 1,4 1,5 1,6 Afirmao en: SIMBAD.
- ↑ 2,0 2,1 2,2 Floor van Leeuwen (2007). «Validation of the new Hipparcos reduction» (n'inglés). Astronomy and Astrophysics (2): páxs. 653–664. doi:.
- ↑ Ulrich Bastian (2000). «Catálogo Tycho-2». Astronomy and Astrophysics: páxs. 27–30.
- ↑ Afirmao en: Catalogue of rotational velocities of the stars. Stated in source according to: SIMBAD. Llingua de la obra o nome: inglés. Data d'espublización: xunu 1970.
- ↑ «Pulkovo Compilation of Radial Velocities for 35 495 Hipparcos stars in a common system» (n'inglés). Astronomy Letters (11): páxs. 759–771. payares 2006. doi:.
- ↑ «MK Spectral Types for Bright Southern OB Stars» (n'inglés). The Astrophysical Journal: páxs. 313–326. xunetu 1969. doi:.
- ↑ Alfa Lupi (SIMBAD)
- ↑ Allen, Richard Hinckley (1889). «Lupus», Courier Dover Publications: Star Names — Their Lore and Meaning (n'inglés), páx. 563. ISBN 0-486-21079-0. Consultáu'l 20 de setiembre de 2010.
- ↑ 9,0 9,1 9,2 Kakkab (Stars, Jim Kaler)
- ↑ Niemczura, E.; Daszyńska-Daszkiewicz, J. (2005). «Metallicities of the β Cephei stars from low-resolution ultraviolet spectra». Astronomy and Astrophysics 433 (2). páxs. 659-669. http://cdsads.u-strasbg.fr/cgi-bin/nph-bib_query?2005A%26A...433..659N&db_key=AST&nosetcookie=1.
Coordenaes: 
14h 41m 55.756s, -47° 23′ 17.515″
Datos: Q14230
