Cath Wallace

Cath Wallace
Vida
Nacimientu	Hamilton, 1952 (71/72 años)
Nacionalidá	Nueva Zelanda
Oficiu	profesora universitaria, ambientalista
Emplegadores	Universidá Victoria en Wellington ; Universidá Nacional Australiana
Premios	ver Premiu Goldman pal mediu ambiente (1991) ;

Catherine C. "Cath" Wallace (1952, Hamilton) ye una ecoloxista de Nueva Zelanda y académica. Da conferencies d'economía y política pública na Universidá Victoria de Wellington, y forma parte d'organizaciones venceyaes col mediu ambiente en Nueva Zelanda. Dióse-y el Premiu Medioambiental Goldman en 1991, gracies a les sos contribuciones pa la proteición del mediu ambiente en L'Antártida.^[1]

Activismu y Trabayu Políticu editar

Dende 1987 Cath Wallace dio conferencies na Universidá Victoria de Wellington sobre economía y política pública, centrándose nel mediu ambiente.

Mientres una década foi la presidenta de les Organizaciones de Caltenimientu del Mediu Ambiente de Nueva Zelanda, (Environment and Conservation Organizations of New Zealand, ECU).^[1] ECU ye una organización ensin ánimu d'arriquecimientu que s'esmolez de la preservación del mediu ambiente.^[2] Cath Wallace sigue formando parte d'ECU.

Wallace formó parte del Conseyu de IUCN, la Xunión Internacional pal Caltenimientu de la Natura, mientres dos mandatos. El so principal focu foi consiguir que se caltuvieren en mente los costos medioambientales cuando se tomaren decisiones nacionales. Ella impulsó reformes a nivel medioambiental y de polítiques enerxétiques.

Como parte del so activismu, dirixó un movimientu de resistencia, xunto con otros activistes, contra intereses empresariales qu'intentaben acutar l'Acta d'Alministración de Recursos (Resource Management Act). Esta acta ye importante pa la proteición de los recursos naturales.^[1] Nel so puestu n'ECU, defendió un cambéu na llei de pesca nacional por que se xestionara l'ecosistema enteru en cuenta de namái la pesca de peces.

Wallace investigó los efeutos de la xestión de cuotes pesqueres en Nueva Zelanda y primió al Ministeriu de Pesca por que dexara de infringir les sos responsabilidaes medioambientales so l'Acta de Pesca de Nueva Zelanda de 1996. Wallace sigue defendiendo la implementación de fuertes polítiques medioambientales locales por toa Nueva Zelanda.^[1]

Cath Wallace tamién foi co-fundadora de la caña de Nueva Zelanda de la Coalición Antártica y del Océanu Antárticu (Antarctic and Southern Ocean Coalition, ASOC), una alianza internacional que trabaya pa la proteición de L'Antártida y el refugu de la Convención de Minerales de L'Antártida. N'asociación con ASOC, Wallace foi lobbista internacional pa prohibir la esplotación minera en L'Antártida. Un pasu importante na proteición de la redolada antártica foi gracies al Protocolu Medioambiental Antárticu. El protocolu designa a L'Antártida como "una reserva natural, dedicada a la paz y a la ciencia". Tamién conocíu como'l protocolu de Madrid, estableció regles pa la proteición de la redolada y la prohibición de la esplotación minera.^[1]

Referencies editar

↑ ^1,0 ^1,1 ^1,2 ^1,3 ^1,4 «Cath Wallance».
↑ «About ECU».

Enllaces esternos editar

[goldmanprize_1-1] 1,0 ^1,1 ^1,2 ^1,3 ^1,4 «Cath Wallance».

[2] «About ECU».

[1]

[2]