El clima xeneral n'Asturies ye oceánicu, con precipitaciones abondoses partíes a lo llargo del añu y temperatures nidies tantu pel iviernu como pel branu. Por cuenta de lo abrupto de la xeografía asturiana hai infinidá de microclimes, anque podríamos estremar tres microclimes principales nel Principáu: oceánicu lluviosu, oceánicu interior y de monte.

Les zones climátiques estremables son:

  • La franxa climática del mariniegu, muy influyida pel mar;
  • Otra franxa climática nel suroeste del Principáu, con un clima más continentalizáu;
  • La franxa central que, anque oceánicu, nun ta tan influyida pel mar como la mariniega y el clima de monte en toles rexones de la Cordal Cantábricu, con importantes nevaes, qu'en cotes non bien altes, pueden empezar n'ochobre y prorrogase hasta mayu, anque nun ye raru ver dalgún falopu en cotes cimeres a los 2000 metros nos meses de branu.

Descripción editar

Ye un clima húmedu, por cuenta de que a los tener el clima oceánicu y la mariña na mariña y abondoses precipitaciones faen que'l clima, que l'atmósfera tenga un porcentaxe de mugor carauterístico del clima húmedu.

Récores climáticos editar

Hai que tener en cuenta que la fonte de los datos ye l'Axencia Estatal de Meteoroloxía (Aemet) y que esta solu ufierta los datos de Xixón, Uviéu, Mieres y l'Aeropuertu d'Asturies pal Principáu d'Asturies. Por ello los datos visualizaos equí correspuenden a diches fontes, nun hai datos oficiales d'otros llugares del Principáu, siquier públicos. Magar, por casu, el INM cunta con una estación meteorolóxica automática na Urbanización de Valgrande - El Brañil.lín, na estación iverniza de Valgrande-Payares a una altitú de 1480 msnm, onde cada iviernu ye fácil ver rexistros inferiores a los -16,4 °C, anque nun se disponen series históriques de dicha estación meteorolóxica.

  • Temperatura máximo: 37,5 °C (18 de xunetu de 2016 en Mieres)
  • Temperatura mínimo: -16,4 °C (3 de febreru de 1942 en Mieres)
  • Precipitación máxima en 24 hores: 149,6 mm (26 de setiembre de 1987 en Xixón)
  • Precipitación máxima nun mes: 396,9 mm (avientu de 2020 nel Aeropuertu d'Asturies)
  • Racha máxima de vientu: 190 km/h (payares de 1978 n'Uviéu)
  • Máximu de díes d'agua nun mes: 29 (ochobre de 1972 en Xixón)
  • Máximu de díes de nieve nun mes: 19 (xineru de 1967 en Mieres)
  • Máximu de díes de nube nun mes: 11 (xunetu de 1986 n'Uviéu)

Los datos climáticos oficiales apurríos enantes ayuden a carauterizar el clima asturianu d'una forma bien llindada, más bien céntrase nuna descripción de les traces climátiques del centru de la rexón. Mientres oriente y occidente queden totalmente desprovistos por estaciones d'observación de primer orde siendo entá más grave sobremanera nel casu del occidente cuando en dicha ala de la rexón alcuéntrense les carauterístiques micro-climátiques más destacaes de la Comunidá Autónoma, Ibias y Cangas.

Referencies editar

Enllaces esternos editar