Comerciu triangular
La espresión comerciu triangular ye un conceptu históricu qu'indica la esistencia de rellaciones comerciales ente trés puertos o rexones. El comerciu triangular surde, xeneralmente, cuando una rexón tien productos esportables que nun son necesarios na rexón de la que recibe la mayoría les sos importaciones. El comerciu triangular ye, nesta circunstancia, una forma de rectificar los balances comerciales ente eses rexones.
Históricamente les rutes comerciales taben fuertemente influyíes pol réxime de vientos y corrientes na mar. Asina, pa les naciones comerciantes de la Europa occidental yera enforma más fácil navegar hacia l'oeste si primero viaxaben más al sur del paralelu 30N p'aprovechar los nomaos «vientos del comerciu», que-yos permitíen aportar al Caribe muncho primero que si facíen el viaxe en direición oeste hacia América del Norte. El viaxe de vuelta ye muncho más curtiu si se sigue la corriente del Golfu en direición noreste usando los vientos de poniente. Un triángulo asemeyáu a esti, nomáu volta do mar, yera usáu polos navegantes portugueses, primero del viaxe de Cristóbalo Colón, pa dir a les islles Canaries y les Azores. Colón espandió'l radiu d'esti triángulu p'aportar a les Indies, y la so ruta convirtióse nel principal itinerariu pa cruciar l'Atlánticu dende los países europeos.
El comerciu triangular d'esclavos al traviés del Atlánticu editar
El sistema de comerciu triangular meyor conocíu ye'l comerciu tresatlánticu d'esclavos, que tuvo en funcionamientu de finales del sieglu XVI a entamos del XIX, y que tresportó esclavos, cultivos comerciales y productos manufacturaos ente África occidental, les colonies caribeñes o norteamericanes y les potencies coloniales europees, con delles colonies britániques d'América del Norte, especialmente Nueva Inglaterra, ocupando delles veces el rol d'Europa[1]. L'usu d'esclavos africanos yera fundamental pa los cultivos coloniales orientaos a la esportación a Europa. Estes materies primes agrícoles pagábense con bienes manufacturaos, que se llevaben a África en pagu polos esclavos que yeren tresportaos por mar na etapa conocida como Pasaxe del mediu (Middle Passage)[2]. El fundamentu d'esti comerciu yera principalmente económicu, pero tamién hubo, en dellos momentos, una xustificación relixosa pa desarrollalu. Asina, en 1452, el papa Nicolás V, na so bula Dum Diversas, garantizó-yos a los reis d'España y Portugal «permisu pa invadir, buscar, capturar y someter a los sarracenos, los paganos y otres persones non cristianes.. y reducilos a esclavitú perpetua»[3].
El primer llau del triángulu llevaba a los barcos d'un puertu européu, cargáu de cobre, ropa, caxigalines, bisutería, armes y municiones, a África[4]. Al aportar ellí el cargamentu vendíase, o cambiábase por esclavos. El segundu llau confórmalu'l viaxe d'África al Nuevu Mundu, un viaxe nel que morríen bien d'esclavos, que yeren tresportaos nes bodegues de los barcos en condiciones inhumanes. Los sobrevivientes vendíense nel Caribe, o nes colonies americanes, y, tres de llimpiar y reparar los barcos, enllenábense de productos pa volver al puertu de salida: zucre, melaza y ron dende les Indies occidentales, y tabacu y cáñamu dende Virxinia. La llegada del barcu al so puertu de salida, n'Europa, pesllaba'l ciclu.
Sicasí, los barcos esclavistes, preparaos pa tresportar cuantes más persones meyor pero non con bones condiciones pa tresportar otru tipo de carga, víense obligaos a enllenar parte o toa la so bodega de lastre, pola incapacidá de cargar lo qu'hubiera disponible n'América al aportar allí. Esto favorecíalo tamién la gran variabilidá de la duración de los viaxes con esclavos, que facía imposible acordar una fecha d'entrega precisa n'América y, poro, facía que munches veces los barcos llegaran fuera de la temporada de collecha. Esto fizo que, col tiempu, los barcos esclavistes namái ficieran viaxes con esclavos, y que los cultivos comerciales foran tresportaos por flotes diferentes que namái navegaben d'Europa a América. El comerciu triangular ye un modelu de funcionamientu, non una descripción exacta ya inmutable nel tiempu de les rutes reales de los barcos[5].
Referencies editar
- ↑ The Trans-Atlantic Slave Trade, artículu d'Alistair Boddy-Evans na web thoughtco.com (26 de xineru de 2018).
- ↑ "Triangular trade", na web del National Maritime Museum.
- ↑ Curran, C.E., Change in Official Catholic Moral Teaching, p. 67. Mahwah (Nueva Jersey), Paulist Press, 2003.
- ↑ Abolition of the Slave Trade, artículu na web del gobiernu escocés itscotland.org.
- ↑ Emmer, P.C., The Dutch in the Atlantic Economy, 1580-1880. Trade, Slavery and Emancipation. Various Collected Studies Series CS 614, 1998.
Enllaces esternos editar
- The Transatlantic Slave Trade Database, portal web con datos referentes al comerciu tresatlánticu d'esclavos..
- Report of the Brown University Steering Committee on Slavery and Justice. Informe del Comité sobre la Esclavitud de la Universidá de Brown (Providence, Rhode Island).