Escrutiniu mayoritariu plurinominal

El escrutiniu mayoritariu plurinominal o votu en bloque ye una categoría de sistemes eleutorales nos que resulten escoyíos los candidatos que llogren el mayor númberu de votos. Nestos sistemes escuéyense más d'un representante en cada circunscripción. Dalgunos de los sistemes más importantes d'escrutiniu mayoritariu plurinominal son l'escrutiniu con pluralidá y l'escrutiniu preferencial o votu preferencial.

Escrutiniu mayoritariu plurinominal con pluralidá

Nel escrutiniu mayoritariu plurinominal con pluralidá tolos candidatos compiten ente sigo por ocupar n posiciones o escaños. Cada eleutor escueye n candidatos de la papeleta eleutoral y los n candidatos que llogren el mayor númberu de votos llogren l'escañu. Sicasí, a diferencia del votu acumulativu, l'eleutor nun puede utilizar el so n votos pa votar pol mesmu candidatu. Sí se dexa que l'eleutor pueda escoyer menos candidatos que'l númberu total d'escaños.

Si l'eleutor tien qu'escoyer menos candidatos que'l númberu total d'escaños, el sistema conozse como escrutiniu mayoritariu plurinominal parcial. Este ye'l casu de les eleiciones al Senáu español nes que l'eleutor puede votar por trés candidatos como muncho, pero son cuatro los escaños que s'asignen a los candidatos con más votos. Un sistema parcial dexa que minoríes de tamañu considerable llogren representación.

Votu preferencial

Col votu preferencial, cada eleutor ordena los x candidatos acordies cola so preferencia asignando un númberu a cada unu (1, 2, ..., x). Los candidatos col menor númberu de votos de la primer preferencia son esaniciaos y los sos votos son tresferíos según la siguiente preferencia de los eleutores. Esti métodu repitir hasta que queden n candidatos (siendo n el númberu d'escaños per circunscripción).

Ver tamién

• Sistema eleutoral
• Llistes eleutorales

Otros sistemes eleutorales

• Escrutiniu mayoritariu uninominal
• Escrutiniu proporcional plurinominal
• Representación proporcional mista
• Representación proporcional