Federico Jiménez Losantos

Federico Jorge Jiménez Losantos (15 de setiembre de 1951, Orihuela del Tremedal ^(es) ) ye un periodista, escritor, llocutor y empresariu español.

Federico Jiménez Losantos
Vida
Nacimientu	Orihuela del Tremedal (es) , 15 de setiembre de 1951 (72 años)
Nacionalidá	España
Estudios
Estudios	Universidá de Barcelona doctoráu : filoloxía hispánica
Llingües falaes	castellanu catalán francés
Oficiu	periodista, escritor, llocutor, entamador, empresariu de medios, políticu, publicista, profesor universitariu
Participante manifiesto «Libres e Iguales» (es) Manifiesto por la Historia y la Libertad (es)
Emplegadores	El País  (1978 –  1980) Diario 16  (1982 – ABC  (1987 –  1999) COPE  (1992 –  2009) El Mundo  (1999 – Libertad Digital  (2000 –
Creencies
Relixón	ateísmu
IMDb	nm1415938

Dende setiembre de 2009 ye direutor y presentador del programa radiofónicu «Es la mañana de Federico», de la cadena esRadio, y columnista del diariu El Mundo.

Ye copropietariu, editor y collaborador del diariu dixital Libertad Digital y direutor y collaborador de la revista La Ilustración Liberal.

Biografía

Fíu de zapateru que desenvolvió'l cargu d'alcalde y de maestra de matemátiques, tamién ñetu de maestros, ye'l mayor de trés hermanos. A los diez años ganó una beca rural que conservó a lo llargo de tolos sos estudios, gracies a la que cursó'l bachilleratu nel Institutu d'Enseñu Mediu y nel Colexu de San Pablo en Teruel, onde tuvo como profesores al cantante y más sero políticu José Antonio Labordeta y al dramaturgu José Sanchís Sinesterra. Con selce años espublizó los sos primeros poemes y rellatos.

Estudió Filosofía y Lletres en Zaragoza y en 1971 treslladóse pa cursar la especialidá de Filoloxía Hispánica na Universidá de Barcelona. Llicencióse con una tesina sobro les acotaciones a los esperpentos de Valle-Inclán, dirixida por Joaquín Marco. El tribunal, presidíu por José Manuel Blecua, concedió-y un sobresaliente por unanimidá.

Estudió psicoanálisis con Óscar Masotta y foi ún de los fundadores de la Biblioteca Freudiana de Barcelona, arriendes de la universitaria Revista de Literatura. En xineru de 1978, xunto con Alberto Cardín, fundó y dirixó la revista de pensamientu sobro política, filosofía, lliteratura y psicoanálisis Diwan, considerada pol diariu El País como «la revista cultural más importante, abierta y viva d'esti momentu». Aidó a esparder n'España la obra del filósofu François Lyotard cola so edición crítica de Discurso, figura, en 1979.

Esi mesmu añu obtuvo'l I Premiu d'Ensayu El Viejo Topo por La cultura española y el nacionalismo, anque dempués esta editorial ñegóse a espubliza-y el llibru Lo que queda de España porque, según El Viejo Topo, taben nun procesu de restricción del númberu de títulos a espublizar. Llueu la editorial añadió que dalgunos capítulos yeren «impublicables». Los editores d'Ajoblanco, que competía nel mercáu con El Viejo Topo, encargáronse finalmente d'espublizar el llibru, presentáu por Francisco Umbral y col sofitu del diariu El País —incluyíos los de Javier Pradera y Juan Luis Cebrián— y que tornaría a editase en 1995. Lo que queda de España criticaba'l nacionalismu catalán y defendía los derechos culturales de los castellanofalantes, lo qu'entamó una llarga polémica que remató en pasando'l tiempu col Manifiesto de los 2.300.

Militancia izquierdista y antifranquista

A lo llargo del franquismu militó n'organizaciones clandestines de la izquierda antifranquista (Organización Comunista de España (Bandera Roja), d'ideoloxía maoísta y Partit Socialista Unificat de Catalunya, d'ideoloxía comunista) y collaboró en revistes y grupos artísticos (Grupo Trama) d'estrema izquierda hasta fines de los años setenta, cuando foi empobinando les sos posiciones per aciu d'un viaxe a la República Popular China en 1979, que-y fixo camentar que la realidá nun casaba colos valores de la ideoloxía na que militaba.

Yá na Transición entró a militar nel Partido Socialista de Aragón (un partíu fuera de la órbita del PSOE, perteneciente a la yá finada Federación de Partidos Socialistas), qu'obtuvo un diputáu (Emilio Gastón) nes Cortes Constituyentes. Énte les primeres eleiciones autonómiques en Cataluña, en 1980, consideróse la presentación d'una candidatura per parte d'esti partíu, na que Jiménez Losantos ocuparía'l primer llugar. Magar, la candidatura nun se presentó por mor de la oposición del PSOE y del Partido Socialista d'Andalucía (dirixíu por Alejandro Rojas Marcos), a la fin foi candidatu por ésti últimu. Basando'l so discursu na defensa de los derechos culturales y cívicos de tolos españoles inmigrantes, según elli poco defendíos pol PSOE-PSC y el PCE-PSUC (al so xuiciu influenciaos pol nacionalismu catalán), el Partido Socialista d'Andalucía obtuvo dos escaños. Estos parllamentarios (que yeren cuasi los únicos diputaos que s'espresaben en castellán nel Parllamentu de Cataluña) centráronse na defensa del derechu de la población castellanofalante de Cataluña a conservar la so llingua, según ellos anuláu, ensin tocar otros temes.

El fechu de tenese presentao como candidatu pol Partido Socialista Andaluz llevólu a una engarrada dientro de la revista Diwan con Alberto Cardín, quien defendía la independencia política de la revista. Esti asocedíu provocó la fin de la so collaboración nella, pasando a incorporase a Diario 16 de la mano de Fernando Sánchez Dragó. El diariu dirixíu por Pedro J. Ramírez asoleyó'l 12 de marzu de 1981 el Manifiesto de los 2.300, nel que se defendía la igualdá de los derechos llingüísticos en Cataluña ente los falantes de castellán y catalán.

En pasando'l tiempu, el 21 de mayu de 1981, Jiménez Losantos foi secuestráu pola organización terrorista catalana Terra Lliure (que nun dio anuncia pública de la so esistencia hasta'l 24 de xunu). Tres recibir un disparu na rodiella y ser abandonáu atáu a un árbole, foi lliberáu pola policía'l mesmu día. Dempués del socesu, Jiménez Losantos y otros firmantes del Manifiesto como Amando de Miguel, Carlos Sahagún y Santiago Trancón dexaron Cataluña. Años dempués (el 31 de xineru de 2007) nuna entrevista pa la televisión (La noche de Quintero, en TVE-1) declaró, refiriéndose a los que-y dispararen, que «a lo único que me negué ye a que mataren a los que me dispararon, y eso que me lo ufrieron».

ABC y Antena 3

En 1982 asitió en Madrid y dexó de collaborar n'El País pa facelo en Diario 16, xera qu'acompañaba coles sos clases de Lliteratura nel Institutu Lope de Vega. En magar l'añu viniente ascendió a xefe d'opinión nesi diariu y columnista en Cambio 16. En 1987 fichó como columnista por ABC.

Nel entamu de los años noventa entamó a collaborar na cadena de radio Antena 3 y, cola llegada de la televisión privada, n'Antena 3 Televisión, onde dirixó programes culturales como La Historia de los judíos españoles. Foi comentarista políticu del noticieru de Luis Herrero y más tarde de la seición «Fuego Cruzado», d'Informativos Telecinco.

A lo llargo d'esta etapa caltuvo la so columna diaria n'ABC y foi contertuliu fixu en programes nocherniegos de radio como Hora Cero de José Luis Balbín y dempués na COPE, en La Linterna, de Luis Herrero.

COPE y Libertad Digital

En 1992 sumió'l grupu de comunicación formáu por Antena 3 Radio y Antena 3 Televisión, quedando la primera nes manes del grupu PRISA. Esta operación anició bulla abondo. Pola mor d'ello, un grupu de periodistes, ente los que taben José María García, Antonio Herrero, Luis Herrero y el propiu Federico Jiménez Losantos, entraron na cadena radiofónica COPE. L'antenicidiu, como ellos lu llamen, y les vinientes aiciones ante los tribunales, marcaron pa siempre una política editorial crítica y brava pa col grupu PRISA por parte d'estos llocutores.

En 1998, tres la muerte d'Antonio Herrero nun accidente, el so amigu Luis Herrero fíxose cargu del programa La Mañana y Jiménez Losantos quedó al frente del programa nocherniegu La Linterna. Tres colar Luis Herrero de la COPE en 2003, pasó a dirixir y presentar el mañaniegu, programa qu'enantó a ún de los mayores índices d'audiencia de la radio n'España. Meses más sero Luis Herrero presentóse a les eleiciones al Parllamentu Européu dientro de les llistes del Partido Popular y en 2005 enxirióse nel programa mañaneru de Jiménez Losantos como contertuliu. N'abril de 2009 la COPE, según dalgunos por presiones de sectores del Partido Popular encocoraos con Jiménez Losantos, propúnxo-y dexar La Mañana pa presentar La Linterna, de 22 a 24 h. Jiménez Losantos nun aceutó y decidió siguir la so actividá radiofónica nuna nueva emisora, esRadio (grupu Libertad Digital), xunto con César Vidal, tamién diba poco salíu del so programa de la COPE, y Luis Herrero.

Arriendes de la so actividá na radio, Jiménez Losantos afaló en 2000 la publicación d'un nuevu diariu lletrónicu, Libertad Digital, del qu'anguaño ye editor. En 1999 dexó la redaición d'ABC y xunióse como collaborador a El Mundo.

En magar 1998, tamién ye editor de la revista de pensamientu La Ilustración Liberal.

Calter y ideoloxía

Jiménez Losantos defínese como lliberal nel sentíu clásicu del términu. Los sos defensores camienten que ye una referencia pa la nueva corriente d'auto-nomaos «mozos lliberales» que s'identifiquen cola llinia editorial de Libertad Digital. Nos postreros años amosóse averao al partíu politicu formáu por, ente otros, la ex-eurodiputada socialiega Rosa Díez, llamáu Unión Progreso y Democracia, reconociendo que lu votara y declarando:

Anguaño'l partíu nacional con posibilidaes más anovador y con menos barganaces ideolóxicos ye UPyD. Nun ye un partíu lliberal, ye más bien socialdemócrata, pero sacante dalguna estaya del PP, como Esperanza Aguirre en Madrí, o Bauzá en Baleares, que son más lliberales, nel Partido Popular son conservadores y bien de vegaes son tan socialiegos como los socialiegos. Pero nun hay un partíu lliberal, y tampoco nun fai falta que lu haiga. Prestaríame qu'hubiera lliberales en tolos partíos, inclusive nel PSOE.

Quienes s'oponen a les idees de Jiménez Losantos cuiden que'l nuevu lliberalismu que representa ye en realidá otra manera de nomar a la ultraderecha, de la qu'elli sería'l voceru. Xentes d'izquierdes y de dereches (estes davezu bien venceyaes al Partido Popular) tán ente los sos detractores. Nesi sen, periodistes como Luis del Olmo o Iñaki Gabilondo, o l'humorista Andreu Buenafuente, espresaron el so engarru cuando Losantos recibió'l premiu Micrófono de Oro.

Na xera periodística y intelectual de Jiménez Losantos ye perimportante, dende'l so aniciu profesional, l'enfrentamientu radical colos nacionalismos periféricos, col socialismu y cola izquierda en xeneral. El raigañu de les sos reaiciones ente dambos ye la so conceición de la defensa de la llibertá individual y la consideranza d'España como un Estáu-nación garantizador. L'orixe del so xaréu colos nacionalismos afáyase na so crítica a la llexislación llingüística entamada y desenrollada en Cataluña baxo los gobiernos de Jordi Pujol, col sofitu d'una bien amplia mayoría de los grupos políticos representaos nel parllamentu catalán. Jiménez Losantos siempre camentó qu'esta llexislación ye discriminatoria pa los castellán-falantes. Mentanto les sos engarraes cola izquierda anicien na crítica a les sos polítiques intervencionistes no cultural y no económicu. Reprócha-yos tamién la pasividá interesada énte procesos qu'atenten, na so opinión, escontra la Constitución de 1978 no tocante a la igualdá de tolos ciudadanos énte la llei.

Xeitu periodísticu

El xeitu radiofónicu de Jiménez Losantos carauterízase pol emplegu espontáneu y discursivu del llinguaxe, enllenándolu de sátira, ironía y crítica. Fai munchu usu de silencios, ritornellos, vocativos y entrugues retóriques. La so formación humanista permíte-y amecer xiros llariegos y espresiones populares con otres orixinaes nun rexistru cultu y ilustráu. El so xeitu na prensa escrita tamién ye coloquial, con xiros y espresiones propies, y enxiriendo referencies a la cultura popular o clásica.

Lo que más rescampla del so xeitu, y lu fai inconfundible nel periodismu radiofónicu español d'anguaño, ye l'emplegu d'espresiones, nomatos y afirmaciones terries. Nesi sen, Jiménez Losantos foi condergao en cuatro procesos xudiciales por frayar el drechu al honor, y notros dos procresos por un delitu d'inxuries.

Condergues

El día 22 de febreru de 2007, l'Audiencia Provincial de Barcelona fizo pública una sentencia que conderga a la Cadena COPE y a Federico Jiménez Losantos a indemnizar con 60.000 euros a Esquerra Republicana de Catalunya ya Josep-Lluís Carod-Rovira y Joan Puigcercós, presidente y secretariu xeneral d'esti partíu políticu, por una «intromisión illexítima nel honor» d'estos. La sentencia, escontra la que la parte condergada interpunxo un recursu de casación, resolvióse nun recursu d'apelación interpuestu polos demandantes ente la desestimación de la demanda na primer instancia y valiéndose de les espresiones feches por Federico Jiménez Losantos nel programa "La Mañana" de la COPE los díes 13, 14, 15 de xunu y 1 de xunetu de 2005 escontra Esquerra Republicana de Catalunya y los dirixentes del mesmu enantes citaos.

Premios

Ente otros, obtuvo'l Premiu Continente de periodismu, el Premiu González Ruano en 1993, el Premiu Espejo de España en 1994, el Micrófono de Plata en 2000 y el Micrófono de Oro en 2007 na categoría de radio.

Publicaciones

• Lo que queda de España (1979, 1995)
• Diván de Albarracín (1982)
• Contra el felipismo (1993)
• La última salida de Manuel Azaña (1994)
• La dictadura silenciosa (1996)
• Crónicas del acabóse (1996)
• Los nuestros: cien vidas en la historia de España (2000)
• Poesía perdida (1969-1999) (2001)
• Con Aznar y contra Aznar: artículos y ensayos 1983-2002 (2002)
• El adiós de Aznar (2004)
• Federico responde: los chats de Libertad Digital (2004)
• España y Libertad (2006)
• De la noche a la mañana (2006)
• La ciudad que fue: Barcelona, años 70 (2007)
• Más España y más Libertad (2008)
• Lo que queda de España (Reimpresión y ampliación) (2008)
• Historia de España. De los primeros pobladores a los Reis Católicos (Junto a César Vidal). (2009)
• Historia de España II. De Juana la Loca a la Primer República (Junto a César Vidal). (2009)
• Historia de España III. De la Restauración a la guerra civil (Junto a César Vidal). (2010)
• El linchamiento (2011)

Enllaces esternos

• Wikimedia Commons acueye conteníu multimedia sobre Federico Jiménez Losantos .
• Federico Jiménez Losantos na Internet Movie Database (n'inglés)
• 1

• Datos: Q2736191
• Multimedia: Federico Jiménez Losantos
• Cites famoses: Federico Jiménez Losantos