Franciscu Coll Guitart

Franciscu Coll i Guitart (18 de mayu de 1812Gombrèn – 2 d'abril de 1875Vic), más conocíu como Padre Coll, foi un relixosu dominicu español, misioneru popular y fundador de la Congregación d'Hermanes Dominiques de l'Anunciata. La Ilesia Católica nomólu santu'l 11 d'ochobre de 2009.

Franciscu Coll Guitart
Vida
Nacimientu Gombrèn18 de mayu de 1812[1]
Nacionalidá España
Muerte Vic2 d'abril de 1875[1] (62 años)
Estudios
Llingües falaes castellanu
catalán
Oficiu presbíterufundador (es) Traducir
Santoral
2 d'abril
Creencies
Relixón Ilesia Católica
Orde relixosa Orde de Predicadores
Cambiar los datos en Wikidata

Primeros años de la so vida editar

Franciscu Coll i Guitart nació'l 18 de mayu de 1812, nel pueblín de Gombrén, del Pirinéu catalán (provincia de Girona, España). Cataluña daquella taba pasándolu mal por mor de la guerra tres la invasión de Napoléon[2]. Yeren tiempos d'escasez, fame y tou tipu de penuries. Franciscu foi'l menor d'once hermanos; cuando tenía cuatro años morrió'l so pá. La so má, Magdalena, que yera una muyer fondamente cristiana, formólu nel amor y la piedá pa con Dios y la Virxe María.

Siendo como yera de calter inquietu y activu, les dificultaes lleváronlu a forxar una personalidá fuerte y con puxu. A los diez años, atrayíu pola vocación sacerdotal, marchó pa la ciudad de Vic, lloñe de la familia de so, p'aniciar estudios nel Seminariu. Igual qu'otros seminaristes pobres, algama agospiu y alimentu nuna casería, a cambio de collaborar cola instrucción lliteraria y relixosa de los neños de la familia, que lu acoyó como si fuere ún más d'ella[3].

Dominicu y misioneru editar

A los 18 años, ingresa na Orde de Predicadores, nel conventu dominicu de Girona, u fai la so profesión en 1831. Cuando yá-y faltaben pocos meses pa ordenase, nel contestu de les lluches polítiques por mor de la socesión del rei Fernandu VII, alcordase la supresión de les Órdenes relixoses en España (esclaustración)[4]. N'agostu de 1835 Francisco Coll y la so comunidá son expulsaos del convento, onde nunca pudieron volver. Tres dellos meses d'inseguridaes y dubies, y magar que'l gobiernu prohibiera celebrar el sacramento de l'Orde Sagráu, ordenóse sacerdote en Solsona'l 28 de mayu de 1836. Exerció'l ministeriu más de trenta años, primero nuna Parroquia y dempués como misioneru en delles diócesis de Cataluña. Fízose famosu como predicador mui pronto, y les sos pallabres movilizaben xente abondo. Lo que más-y preocupaba yera poder tresmitir la Pallabra de Dios d'un mou cordial, pasional, cenciellu y comprensible pal pueblo, pa poder algamar una verdadera conversión interior. Decidióse pol trabayu n'andecha  con otros sacerdotes y collaboró con san Antonio María Claret

Fundador editar

La realidá social y relixosa que vía nas misones que ficieron impresionólu fondamente, poro empezó a esmolecese pola falta d'acesu a la educación, sobre too nos sitios pequeños y nes neñes. Too esto fizo que fundara la Congregación d'Hermanes Dominiques de l'Anunciata'l 15 d'agostu de 1856, pente munches dificultaes, porque'l Padre Coll nun cobrara nunca dinero polas sos misiones y nun tenía práuticamente recursos económicos nin apoyos. Sin embargu, la Congregación espoxigó bien pronto y en pasando 14 años yá tenía 46 cases en Cataluña. Les hermanes, que veníen casi toes de families humildes, afanábense na so formación y fueron algamando títulos de maestres. Llamábenles  pa dirixir les  escueles públiques o colexos  en pueblos pequeños y tamién en delles ciudaes.

La primer casa que tuvieron n'Asturies foi la de Sama, en Llangréu, fundada en 1897, a la que siguieron abondes comunidaes, sobre manera na cuenca minera[5]. Güei, les Hermanes Dominiques de l'Anunciata tan yá en venti países d'Europa, América del Sur, América Central, África y Asia.

Caberos años editar

El Padre Coll repartía las sos xeres ente l'actividá misionera y la organización de la Congregación. Pero, n'avientu de 1869, con 57 años, predicando na localidá de Sallent, tuvo un primer ataque cerebrovascular. La salú suya entamó a empeorar, foi quedando ciegu y perdiendo dacuando les facultaes mentales. Morrió en Vic el 2 d'abril de 1875, y el pueblu averóse a mamplén pa da-y el caberu homenaxe[6]. Los sos restos venerar en Casar Madre de la Congregación en Vic.

A Francisco Coll declarólu beatu'l Papa Xuan Pablu II nel año 1979 y el Papa Benitu XVI canonizólu'l 11 d'ochobre de 2009[7]. La so fiesta celébrase'l 19 de mayu .

Bibliografía editar

  • Gómez García, Vito T. (1993): Francisco Coll, O.P. Testimonios (1812 - 1931). HH. Dominiques de la Anunciata, Valencia
  • Gómez García, Vito T. (2009): El padre Coll, dominicu: Francisco Coll y Guitart, santu fundador de les Dominiques de la Anunciata. EDIBESA, Madrid.
  • González González, Ma. Otilia (2008): Francisco Coll y Guitart, O.P.: Fondateur de la Congrégation des Soeurs Dominicaines de la Anunciata.
  • Equipo de investigación del carisma (2018). Compendio de historia de la Congregación HH. Dominicas de la Anunciata. HH. Dominicas de la Anunciata, Madrid

Referencies editar

  1. 1,0 1,1 Afirmao en: Find a Grave. Identificador Find a Grave: 29536067. Apaez como: Francisco Coll y Guitart. Data de consulta: 9 ochobre 2017. Llingua de la obra o nome: inglés.
  2. (2009) El padre Coll, dominico: Francisco Coll y Guitart, santo fundador de las Dominicas de la Anunciata. EDIBESA, p. 38 ss.
  3. (2009) El padre Coll, dominico: Francisco Coll y Guitart, santo fundador de las Dominicas de la Anunciata. EDIBESA, p 53 ss
  4. Revuelta González, Manuel (2005). Universidad de Comillas, ed. La Iglesia española en el siglo XIX. p. 124ss.
  5. Equipo de investigación del carisma (2018). Compendio de historia de la Congregación HH. Dominicas de la Anunciata. HH. Dominicas de la Anunciata, Madrid, p 90 ss
  6. Gómez García, Vito T. (2009). El padre Coll, dominico: Francisco Coll y Guitart, santo fundador de las Dominicas de la Anunciata. EDIBESA. p. 386ss
  7. Benedicto XVI canoniza a los españoles Francisco Coll y Rafael Arnáiz, Agencia SIC

Enllaces esternos editar