Ilíada
La Ilíada considérase'l poema épicu más antiguu na lliteratura occidental. El so autor ye Homero, y ta escritu n' hexámetros dactílicos, nel sieglu VIII e.C.. Tien 15.690 versos, que va tiempu (dica'l sieglu VI e.C.) s'iguaron en 24 llibros, y esta división respetóse hasta anguaño cásique ensin cambéu nengún.
El poema cuenta coses sobre la guerra ente griegos (llamaos aqueos nel llibru) y troyanos, que supuestamente pasaren nel sieglu XII e.C.; poro, 400 años enantes d'Homero. Probablemente tolos personaxes seyan inventaos, anque la historia ye verosímil; por exemplu, l'autor pon curiáu en non falar del fierru, que nun se descubriera na dómina de la Ilíada, anque sí yera ya conocíu na dómina d'Homero, y cásique toles referencies a metales y armes falen de bronce.
La ciudá de Troya conozse tamién col nome de Ilión, y por eso el poema se titula la Ilíada.
Argumentu editar
La historia de la Ilíada pue decise que ye la historia de la cólera de Aquiles, ún de los personaxes, un guerreru perimportante na so dómina. Desendólcase durante'l décimu añu na guerra. Aquiles fora pa Troya con una enorme flota de barcos griegos pa lluchar contra los troyanos; el xefe principal d'esta flota yera Agamenón, el rei más importante. El rei de los troyanos, Príamo, tenía dos fíos: Héctor y Paris. Paris raptara a Helena, la muyer de Menelao, que yera l'hermanu de Agamenón. Asina, la guerra de Troya sería una guerra enre troyanos y griegos, ente otres coses pol honor de Menelao. Los griegos nun pudieron ganar a los troyanos dafechu, y entamaron un sitiu a la ciudá, que se mantuvo durante munchos años, con escaramuces y batalles.
Aquiles enfádase porque quíten-y una esclava que él capturara, Briseida, y entós dexa de lluchar y retírase pa la so tienda. Cuandu na guerra Héctor mata a Patroclo, el meyor amigu de Aquiles, esti enfádase y decide volver a la llucha.
Anque cuandu se fala de Troya se piensa immediatamente nel caballu de madera nel que se diz qu'entraron los soldaos griegos escondíos pa abrir les puertes de la muralla, esti episodiu nun se cuenta na Ilíada (que termina enantes de que pasen estes coses), nin na Odisea, otru poema d'Homero que ye la continuación de la Ilíada, sinón na Eneida, escrita pol romanu Virxiliu munchos años dempués.
Hai que decir que la historia nun ye namás una narración de los fechos rellacionaos cola llucha. Hai munches descripciones, enforma detallaes; por exemplu, ye famosa la descripción de los barcos de la flota, que dan munches idees sobre los participantes na guerra y sobre aquella dómina en xeneral. Tamién tienen muncha importancia los sentimientos y les pasiones humanes, y tienen un papel perimportante los dioses, que colos sos caprichos influyen na historia constantemente y son personaxes tan presentes comu los guerreros.
Historia editar
Hebo muncha discusión sobre munchos aspeutos de la Ilíada. Lo primero, a propósito del autor, porque nun se sabía seguro si Homero yera una presona real o el poema fuera obra de estremaos poetas, tresmitíu oralmente. Anguaño considérase que sí, que Homero esistió y yera un personaxe históricu real.
Otra cosa que foi duldosa por munchu tiempu foi si Troya esistió de verdá o non. Na Ilíada fálase de una ciudá asitiada nel Helesponto, y na década de 1870 l'arqueólogu alemán Heinrich Schliemann alcontró na actual Turquía les ruines superpuestes d'una ciudá que güei s' almite que yera la Troya d'Homero. Asina, paez que anque la Ilíada seya ficción, básase en fechos reales y recueye elementos tresmitíos oralmente sobre una guerra que se desendolcó n'aquella zona na dómina en que se ambienta'l poema.
Referencies editar
Enllaces esternos editar
- Testu de la Ilíada nel Proyeutu Gutenberg (n'inglés)
- La ilíada (n'español)
- John Flaxman: Iliada
- Testu en Wikisource
