La nueche de los muertos vivientes
La nueche de los muertos vivientes (Night of the Living Dead n'inglés) ye un llargumetraxe independiente de Medrana de 1968, fechu n'Estaos Xuníos d'América y dirixíu por George A. Romero, con Duane Jones, Judith O'Dea y Karl Hardman como actores principales.
La trama entama con dos hermanos que deciden dir a visitar la tumba del so padre nun alloñáu cementeriu allugáu metanes una viesca, pero dambos son atacaos por un estrañu. Ella sobrevive y llogra fuxir hasta una casa cercana, pero namás afaya un cuerpu parcialmente mutiláu. Al salir asustada atopa un home que-y cuenta que los muertos se llevantaren p'acabar colos vivos. Dempués del estrenu, la cinta recibió crítiques pola so violencia gráfico, pero en pasando los años convirtióse en referencia del cine de zombis.
Doblaxe n'asturianu editar
Gonzali Producciones dobló al asturianu esti filme y en 2012 asoleyólu nun DVD onde la productora tamién incluyó “La lexón de los homes ensin alma”, versión subtitulada de “White Zombie”, el clásicu que dirixó Victor Helperin en 1932 y cuenta con una de les grandes interpretaciones de Bela Lugosi. La nueche de los muertos vivientes foi'l primer llargumetraxe dobláu n'asturianu.
Producción editar
Financiación editar
George A. Romero entamó la so carrera cinematográfica tres graduase na Universidá Carnegie Mellon de Pittsburgh. Xunto con John Russo y Russell Streiner fundó la compañía The Latent Image, cola que ficieron anuncios de televisión. Mientres esti periodu decidieron filmar una película de medrana. El tríu contautó a Karl Hardman y Marilyn Eastman, presidente y vicepresidente, respeutivamente, d'una compañía nomada Hardman Associates, Inc., a los que-yos contaron el so proyeutu. Col envís de financiar el filme, Romero, Russo, Streiner, Eastman y Hardman fundaron la compañía Image Ten a la fin de buscar inversionistes. La película tuvo un presupuestu aproximáu de 114.000 dólares.
Guión editar
El guión escribiéronlu Romero y Russo. Basáronse na idea central de la novela I Am Legend, de Richard Matheson, un llibru que describe un mundu estrozáu tres una guerra bactereolóxica, que provocó la mutación de los seres humanos en criatures asemeyaes a los vampiros. Romero prefirió nun emplegar vampiros, yá que Matheson ficiéralo nel so testu. Según el direutor, nunca pensó nellos como zombis, pues naquella entovía yeren identificaos como un mitu de les rexones caribeñes. Escoyó amosar el colapsu de la sociedá, en vez d'entamar la trama cuando esti fechu yá se consumara.
Sobre la naturaleza de los zombis na so película, George A. Romero faló nuna entrevista de 2007.1
Casting editar
Los actores que participaron nel llargumetraxe nun teníen muncha esperiencia nel cine, siendo la primer actuación de dellos nel mediu. El personaxe de Ben interpretólu Duane Jones, qu'actuara en delles obres de teatru. L'otru rol protagonista, Barbra, foi interpretáu pola actriz Judith O'Dea. O'Dea trabayara en comerciales con Karl Hardman y Marilyn Eastman, y viaxó dende Hollywood pa participar na película. Russell Streiner actuó como Johnny, l'hermanu de Barbra. Karl Hardman y Marilyn Eastman, qu'ayudaron a financiar la película, interpretaron a Harry y Hellen Cooper, el matrimoniu que s'abelluga na granxa xunto colos otros personaxes. La fía de la pareya, Karen, interpretóla Kyra Schon, fía de Karl Hardman. Keith Wayne y Judith Ridley participaron como Tom y Judy, una pareya de mozos. Ridley trabayó posteriormente na comedia romántica There's Always Vanilla (1971) de George Romero.
Los zombis de La nueche de los muertos vivientes yeren amigos del equipu de producción y habitantes d'Evans City.2 El zombi qu'ataca a Barbra y Johnny nel cementeriu foi interpretáu por Bill Hinzman. La escena onde apaez foi una de les últimes en filmase, y aceptó'l rol dempués de que-ylo pidiera Romero.³
Rodaxe editar
El rodaxe entamó en xunu de 1967 y duró cerca de nueve meses. Les escenes de la película filmáronse n'Evans City (Pennsylvania), nuna zona rural. Los primeros minutos, qu'alluguen a Barbra y el so hermanu nel campusantu, rodáronse nel cementeriu d'Evans City, y el restu nuna granxa que diben valtar, polo que'l dueñu dio-y llibertá al equipu de producción pa facer con ella lo que necesitaren.
La nueche de los muertos vivientes rodóse en blancu y negru, con película de 35 mm. Los efeutos especiales viéronse mui condicionaos pol presupuestu. Otros de los títulos pensaos pal llargumetraxe fueron Night of Anubis y Night of the Flesh Eaters.
Receición editar
La película estrenóse'l 1 d'ochobre de 1968. Pola mor de que l'Asociación Cinematográfica d'Estaos Xuníos nun se creara hasta un tiempu dempués, a la cinta nun la clasificaron por edaes, fechu que permitió'l so visionáu por cualquier persona.
La violencia gráfico de la película criticóse en dellos medios, pero otros críticos de cine destacaron el resultáu final y diéron-y valir al so méritu.
Influencia editar
La nueche de los muertos vivientes indentificóse como la responsable d'afitar les bases del arquetipu zombi na cultura popular. Enantes de 1968, esti tipu de criatures correspondíen a seres míticos del folclor d'Haití, que yeren representaos como muertos reanimaos per aciu del vudú. Una conceición adoptada tamién pol cine, pues les películes anteriores a la de Romero teníen llugar xeneralmente en países del Caribe y los zombis yeren les más de les veces de raza negra. Exemplu d'ello son les películes White Zombie (1932) y I Walked with a Zombie (1943). La nueche de los muertos vivientes camudó la manera de ver a los zombis, que pasaron de seres serviles a caníbales incontrolables.
Referencies editar
- Roberts, Sheila (2007). «Interview: George Romero» (n'inglés). MoviesOnline.
- «Night of the Living Dead - Zombies» (n'inglés). Homepage of the Dead.
- Collis, Clark (28 d'ochobre de 2010). «'Night of the Living Dead': How a 42-year-old zombie movie refuses to die» (n'inglés). Entertainment Weekly.
Referencies editar
- ↑ URL de la referencia: http://www.imdb.com/title/tt1512222/. Data de consulta: 18 abril 2016.
- ↑ 2,0 2,1 URL de la referencia: https://www.allmovie.com/movie/night-of-the-living-dead-v35311.
- ↑ Afirmao en: Lexikon des internationalen Films. Llingua de la obra o nome: alemán. Editorial: Zweitausendeins.
- ↑ 4,0 4,1 4,2 «Internet Movie Database» (inglés). Consultáu'l 15 ochobre 2022.
- ↑ URL de la referencia: http://www.imdb.com/title/tt0063350/. Data de consulta: 18 abril 2016.
- ↑ 6,0 6,1 6,2 URL de la referencia: http://www.allocine.fr/film/fichefilm_gen_cfilm=1133.html. Data de consulta: 18 abril 2016.
- ↑ URL de la referencia: http://www.filmaffinity.com/en/film582638.html. Data de consulta: 18 abril 2016.
- ↑ 8,0 8,1 8,2 8,3 8,4 URL de la referencia: http://www.imdb.com/title/tt0063350/fullcredits. Data de consulta: 18 abril 2016.
- ↑ 9,0 9,1 9,2 Afirmao en: ČSFD. Llingua de la obra o nome: checu. Data d'espublización: 2001.
- ↑ URL de la referencia: http://www.forbes.com/sites/markhughes/2013/10/30/the-top-ten-best-low-budget-horror-movies-of-all-time/2/. Data de consulta: 27 avientu 2014.
- ↑ «The Numbers» (inglés). Consultáu'l 15 ochobre 2022.
- ↑ «The Top Ten Best Low-Budget Horror Movies Of All Time». Consultáu'l 27 avientu 2014.
Enllaces esternos editar
- La nueche de los muertos vivientes fragmentos del doblaxe
- La nueche de los muertos vivientes ficha téunica del doblaxe
Datos: Q623051
Multimedia: Night of the Living Dead
