Noreste d'Estaos Xuníos

El Noreste d'Estaos Xuníos (n'inglés, Northeastern United States o simplemente the Northeast) ye una rexón xeográfica d'Estaos Xuníos. Llenda al norte con Canadá, al este col océanu Atlánticu, al sur colos estaos d'El Sur y al oeste col Mediu Oeste. El Noreste ye una de les cuatro rexones definíes, col propósitu d'acollechar y analizar datos estadísticos, pola Oficina del Censu de los Estaos Xuníos[1].

Mapa d'El Noreste d'Estaos Xuníos. Los estaos de los dos tonos de color más escuros son los que formen la rexón según la Oficina del Censu. Los de color más claro inclúinse nella delles veces, con propósitos estremaos, por organizaciones diverses, pero nun hai consensu sobro la so ubicación dientro d'ella.

La rexón, según la define la Oficina del Censu, tien una estensión de 469.630 km². Nun tien una identidá cultural común, pero ye la fastera del país más densamente poblada, más desarrollada económicamente y la de mayor diversidá cultural[2]. La so población, en 2013, estímase en 55.943.073 habitantes, con una densidá mayor de la del doble de la de la segunda rexón más poblada, El Sur. El 85% d'ellos vive nún entornu urbanu.

Llendes xeográfiques de la rexón editar

Nun ta nidio, dende'l puntu de vista xeográficu, aú entama y fina el Noreste. Toles tierres de la fastera que va dende'l centru de Virxinia al sur a la llende norte de Maine al norte, y dende la Pennyslvania occidental (Pittsburgh) al océanu Atlánticu foron consideraes, nún momentu o otru parte d'El Noreste. Esta indefinición débese a la falta de rasgos culturales comunes, de conciencia de xunidá, lo que fai que se consideren llendes distintes según quiera ún centrase en realidaes (demográfiques, económiques...) distintes.

Según la definición de la Oficina del Censu El Noreste inclúi nueve estaos: Maine, Nueva York, Nueva Jersey, Vermont, Massachusetts, Rhode Island, Connecticut, New Hampshire, y Pennsylvania[1]. Hai, amás, dos sorrexones dientro d'ell: Nueva York, Nueva Jersey y Pennsylvania formen l'Atlánticu Mediu, mentantu que los otros seis, los estaos asitiaos al este del de Nueva York, formen Nueva Inglaterra. La definición d'esta fastera del país ye cuasimente la mesma dende 1880, y vien usándose de magar davezu pa la tabulación de datos estadísticos[3][4]. Sicasí, la Oficina del Censu tien reconocío les llimitaciones d'esta definición[5] y el valir potencial d'una propuesta, fecha tres d'acabar de facer el censu de 1950, qu'incluyiría los estaos de Delaware y Maryland, y el distritu de Columbia, dientru del Atlánticu Mediu. La propuesta refugose, al final, porque "el nuevu sistema propuestu nun tien una aceptación xeneral ente los usuarios de los datos que permita seguir alantre col nuevu agrupamientu d'estaos. La publicación previa de munches series estadístiques, afitaes y desarrollaes por llargos periodos de tiempu sobre la base de les sodivisiones actuales, favorez la persistencia de les actuales divisiones y sodivisiones rexonales"[6]. La Oficina del Censu confirmó en 1994 que diba seguir "revisando los componentes de les rexones y sorrexones p'asegurar que siguen representando les agrupaciones más afayaíces d'estaos"[6].

Magar que munches organizaciones consideren les llendes d'El Noreste tomando como referencia les de la Oficina del Censu[7][8][9], otres non. Asina, l'Asociación de Xeógrafos Americanos (Association of American Geographers) inclúi al estáu de Delaware na so definición de la rexón[10], y la Sociedá Xeolóxica d'América (The Geological Society of America) añade tamién, amás de a Delaware, a Maryland y el distritu de Columbia[11]. Otres definiciones, más restrictives, inclúin namás a Nueva Inglaterra, o a Nueva Inglaterra y Nueva York, escluyendo a Pennsylvania y Nueva Jersey[12].

Referencies editar

  1. 1,0 1,1 Census Regions and Divisions of the United States. Departamentu de Xeografía de la Oficina del Censu d'Estaos Xuníos (United States Department of Commerce, Economics and Statistics Administration).
  2. Zelinsky, W, North America's Vernacular Regions. Annals of the Association of American Geographers, 1980;70 (1):1-16. doi: 10.1111/j.1467-8306.1980.tb01293.x
  3. Geographical Areas Reference Manual. U.S. Census Bureau, 1994.
  4. Lewison, D.M., Retailing, p. 384. Prentice Hall, 1997. ISBN 978-0-13-461427-4.
  5. Proceeding of the National Geographic Areas Conference: putting it together for 1990, p. 161. U.S. Census Bureau, 1984.
  6. 6,0 6,1 "Six: Statistical Groupings of States and Counties". Geographic Areas Reference Manual. U.S. Census Bureau, 1994.
  7. Thompson, V (ed). Encyclopedia of Associations: Regional, State, and Local Organizations: Northeastern States. (Vol. 2: Northeastern States) (22 ed.). Gale, 2010.
  8. The New York Times Guide to Essential Knowledge: A Desk Reference for the Curious Mind, p. 630. MacMillan, 2011. ISBN 9781429950855
  9. Kelley, M.L., Macken Fitzsimons, V. Understanding Cultural Diversity: Culture, Curriculum, and Community in Nursing, p. 220. Jones & Bartlett Learning, 2000. ISBN 9780763711061
  10. Divisiones rexonales, na web de la AAG.
  11. About the Northeastern Section, na web de la Sociedá Xeolóxica d'América.
  12. "About the Council", na web del Department of Defense Northeast Regional Council.