Patinaxe de velocidá sobre xelu
Esti artículu o seición necesita referencies qu'apaezan nuna publicación acreitada, como revistes especializaes, monografíes, prensa diaria o páxines d'Internet fiables. |
Patinaxe de velocidá sobre xelu ye un deporte olímpicu que consiste en carreres de delles distancies sobre una pista de xelu con forma allargada y na que los competidores van provistos de patinos.
.jpg)
Historia editar
Como la mayoría de los deportes d'iviernu'l patinaxe sobre xelu empezó como una necesidá, nesti casu de tresporte pa poder travesar ríos o llagos conxelaos, daqué bien habitual nes zones fríes del norte d'Europa. Na antigüedá los patinos taben fechos bien de güesos d'animales o bien de madera.
Los primeros patinos con filu de fierro daten del sieglu XVI n'Escocia, y yá en 1850 E.W. Bushnell, de Filadelfia, foi'l primeru en fabricar el patín d'aceru, muncho más llixeru y resistente.
Les carreres fueron el primer deporte que se prauticó sobre'l xelu, y el país onde mayor puxu tuvieron foi Holanda, una y bones esti país cunta con ensame de canales que se conxelen pel iviernu y tolos ciudadanos pueden prauticar el patinaxe ellí. Por eso Holanda sigue siendo entá anguaño una de les grandes potencies nesti deporte. Los primeros campeonatos del mundu celebráronse'n 1889 y el patinaxe de velocidá yá foi incluyíu nel programa de los primeros Xuegos Olímpicos de Chamonix 1924.
Pista llarga editar
La pruebes faense nuna pista de 400 metros de llargor, asemeyada a una pista d'atletismu, con dos reutes y dos curves. Los participantes compiten de dos en dos, contra'l reló, cronometrándose'l tiempu que tarda cada unu en percorrer la distancia de que se trate. Cuando tolos participantes remataren el so percorríu gana'l que fixera'l meyor tiempu.
Una de les carauterístiques más llamatives d'estes carreres ye qu'en cada vuelta los dos participantes tienen d'intercambiar la cai pola que circulen, de manera que el que va pela cai interior tien de pasar a la esterior y al aviesu. Asina se consigue que dambos percuerran la mesma distancia nel mesmu númberu de vueltes. La cai interior y l'esterior tán dixebraes por pequeños conos, sacante na zona onde tien de faese l'intercambiu. En delles ocasiones esto puede dar llugar a accidentes al topetar dos participantes, polo que-yos convien dir bien sollertes.
- Nos Xuegos Olímpicos apuéstense 12 pruebes, 6 masculines y seis femenines.
- Les masculines son: 500 metros, 1000 metros, 1500 metros, 5000 metros, 10000 metros y persecución por equipos.
- Les femenines son: 500 metros, 1000 metros, 1500 metros, 3000 metros, 5000 metros y persecución por equipos.
Na prueba de 500 metros los participantes tienen de realizar dos carreres, sumándose los tiempos de dambes pa llograr el total de la prueba. Nel restu de distancies cada participante solo cuerre una carrera.
La prueba de persecución por equipos ye de creación recién, y celebróse por primer vegada nos Xuegos Olímpicos de Turín 2006. Paezse enforma a la persecución por equipos de ciclismu en pista. Los equipos son de tres patinadores que van relevándose y a la fin el tiempu del equipu ye'l del terceru qu'ente na meta..
Na historia del patinaxe de velocidá hubo grandes estrelles que ganaron munches medayes y batieron récores. Podemos citar al norteamericanu Eric Heiden, que ganó cinco medayes d'oru nos Xuegos Olímpicos de Lake Placid 1980, el noruegu Johan Olav-Koss, gran estrella nos Xuegos Olímpicos de Lillehammer 1994, la norteamericana Bonnie Blair, dominadora nes pruebes curties en Lillehammmer, o Lydia Skoblikova, que ganó cuatro medayes d'oru nos Xuegos Olímpicos de Innsbruck 1964.
Ver tamién editar
Referencies editar
Enllaces esternos editar
Wikimedia Commons acueye conteníu multimedia sobre Patinaxe de velocidá sobre xelu.
Datos: Q192431- Multimedia: Speed skating
