Taijitu (chinu tradicional: 太極圖; chinu simplificáu: 太极图; Wade-Giles: T'ai Chi T'u; pinyin: tài jí tú), que se traduz aproximao como “diagrama del poder supremu”, ye un términu que denoma’l símbolu del Taiji, o principiu del que surden el yin y el yang. El términu denoma tolos esquemes y diagrames que representen estos dos principios, pero davezu’l taijitu consiste nun dibuxu simétricu dientro un círculu. Una de les formes más conocíes tien una llinia en forma de “S” que dixebra’l círculu en dos partes iguales de diferentes colores. El dibuxu pue tener tamién unu o más puntos grandes. Por exemplu’l taijitu taoísta clásicu, que s’amuesa a la derecha, ye blancu y negru, con un puntu negru nel campu blancu y un puntu blancu nel campu negru.

La versión más conocida del Taijitu.
Representación céltica del “yin yang” (mediaos del sieglu I).

Dibuxos asemeyaos hailos tamién na iconografía celta, etrusca y romana. Anque los estudiosos modernos refiérense a cada casu como símbolu yin yang, nun pudo establecese denguna rellación ente estos símbolos y el chinu.

Composición xeométrica editar

El taijitu ye una simple figura xeométrica, consistente en variaciones de círculos inxertos. El símbolu taoísta pue dibuxase cola ayuda d'un compás y una regla: dibúxase sobre’l diámetru d'un círculu dos círculos internos tanxentes, caún con diámetru igual al radiu del círculu esterior. Se fai asina la llinia que forma una "S," borrando o escureciendo la otra llinia. D’esta miente tiense una espiral que los testos taoístes comparen con un par de pexes, caún cola cabeza encaxada na cola del otru. Esti patrón básicu nun ye un simple productu de la imaxinación humana, sinón que se da tamién −non tán xeométricamente perfeutu− na naturaleza. Na variante taoísta más conocida, les dos metaes de diferente color contienen caúna un puntu del color opuestu. A esti taijitu clásicu, “de los pexes”, llámenlu a veces “xiantian taijitu”, o "taijitu de los primeros tiempos". Teniendo en cuenta’l mou taoísta d'entender el Taiji, o principiu del que surden el yin y el yang, nel taijitu dase muncha importancia al centru del símbolu, que nun se destaca gráficamente pero que ye’l puntu onde s’aunen los opuestos.

Otres de les variantes más conocíes son el “Zhouzi taijitu”, o "Taijitu del maestru Zhou", un símbolu percomplexu, compuestu por dellos círculos superpuestos que s’interpreten distintamente según seya nun sen de xubida o de baxada (caminos de práutica alquímica); y el “Laishi taijitu”, o "Taijitu del estilu Lai", con un diseñu más espiral que’l clásicu taoísta y que representa’l papel principal del principiu li (理), la oposición del yin y el yang, y la circulación del qi.

 
Taijitu del maestru Zhou Dunyi.

Comentarios sobre’l taijitu editar

El Taijitushuo, el primer comentariu del taijitu nel que’l símbolu apaez na forma “desendolcada” del “Zhouzi taijitu”, atribúise a Zhou Dunyi (1017?-1073), eruditu confucianu, espertu nel Taoísmu y interesáu nel Budismu. Ente los sos sobrinos taben los hermanos Cheng, famosos neoconfucianos a los que siguió Zhu Xi. Foi esti últimu’l que decidió desarrollar la curtia obra de Zhou, na que reconoció idees acordies cola so propia teoría. Anque Zhou Dunyi nunca tuviera discípulos, Zhu convertiólu en precursor de la so escuela y escribió a la so vez un Taijitushuo qu'había entrar nel programa d'esámenes imperiales nel añu 29 de la era Kangxi (dinastía Qing).

La interpretación que fizo Zhu Xi del símbolu y de los conceptos arreyaos foi retrucada polos representantes de les otres corrientes. D’esta miente, Lu Xiangshan (1139-1192), contemporaneu de so, vía nel yin y el yang conceutos metafísicos, mentanto pa Zhu Xi solamente’l Taiji ye metafísicu. Los taoístes repróchen-y que, al desaniciar una pallabra del comentariu de Zhou Dunyi [1], tracamundió dafechu’l taiji (“cumal supremu”: definitivu supremu) col wuji (“sin cumal”: sin final, sin llendes, infinitu), cuando pa ellos trátase de dos polos ente los que’l prauticante de l'alquimia interna evoluciona nel so percorríu haza la inmortalidá.

Wu Jianquan, un famosu maestru d'artes marciales chines, describe d'esta miente’l nome del Taijiquan a principios del sieglu XX:

Munches persones tienen ofrecío diferentes análisis del términu Taijiquan. Dalgunos tienen dicho: "Taiji vien del equilibriu del yin y el yang. En términos del arte d'ataque y defensa, nel contestu de los camudamientos del [I Ching]] del llenu y del vacíu, una persona ta nel so interior constantemente latente, y ensin espresión haza l'esterior, hasta que’l yin y el yang nun se dixebren". Otros dicen: "En tou momentu’l Taijiquan básase nos círculos, na oposición de los principios, neto que la figura del Taijitu. Poro, llámase Tai Chi Chuan". Dambes esplicaciones son válides, especialmente la segunda, que resulta más clara.

Ver tamién editar

Referencies editar

  1. Versión de Zhou: 從無極而太極, “del sin cumal al cumal supremu”; versión de Zhu: 無極而太極, “sin cumal y cumal supremu (al empar)”

Enllaces esternos editar