Wikipedia

Trece Colonies

Les Trece Colonies, nomaes tamién les Trece Colonies Britániques[1] o les Trece Colonies Americanes[2], foron un grupu de colonies de Gran Bretaña asitiaes na costa atlántica d'América del Norte que se fundaran nos sieglos XVII y XVIII y declararon la so independencia de la metrópolis en 1776 pa formar los Estaos Xuníos d'América. Les Trece Colonies teníen sistemes políticos, constitucionales y llegales perasemeyaos, y la so población yera mayoritariamente de colonos de llingua inglesa y relixón protestante. Les más septentrionales fundáronse a lo primero por motivos relixosos, mentanto que nel orixe de les meridionales tuvieron los motivos económicos, la búsqueda del beneficiu a partir de la esplotación de les materies primes del territoriu. Les trece formaben parte de les posesiones britániques n'América, qu'incluyíen tamién colonies en Canadá y el Caribe, amás de la península de Florida.

Trece Colonies
(de 14 mayu 1607 a 4 xunetu 1776)		 Estaos Xuníos d'América →
colonia alministrativa
Alministración
Llingües oficiales inglés
División
Xeografía
Demografía
Población 2 400 000 hab. (1775)
Cambiar los datos en Wikidata

La población de les colonies pasó de 2.000 a 2,4 millones d'habitantes ente 1625 y 1775, lo qu'obligó a robá-yos les sos tierres a les tribus d'indíxenes americanos. Esta población incluyía tamién a los esclavos, una y bones, primero de la guerra d'independencia d'Estaos Xuníos, la esclavitú yera llegal en toles colonies britániques[3]. Nel sieglu XVIII el gobiernu británicu gobernaba les sos colonies acordies colos principios económicos del mercantilismu, polos que'l gobiernu central alministraba les sos posesiones col únicu enfotu d'obtener el mayor beneficiu económicu pa la metrópolis.

Les trece colonies teníen un importante gráu d'autogobiernu y elixíen a los sos representantes llocales, y resistíense a vese sometíes a un mayor control por parte del gobiernu central. La guerra franco-india (1754-63) escontra Francia y los sos aliaos indios fizo medrar la tensión ente la metrópolis y les colonies, qu'entamaron a collaborar y comerciar ente elles en cuenta de facelo directamente con Gran Bretaña. Esti desarrollu de les actividaes intercoloniales foi creando un sentimientu d'identidá americana común y de la necesidá de defender los derechos de los colonos en cuantes homes ingleses llibres, y especialmente la petición de tener voz política propia nel parllamentu, refugando'l derechu d'esti a imponé-yos impuestos: fizo fortuna la espresión no taxation without representation, nun hai tributación ensin representación (política), usada como eslogan polos colonos. La escalada de tensión col gobiernu británicu llevó a la fin a la Revolución Americana, na que les colonies aconceyaron pa formar un congresu que les representara a toes, el Congresu Continental. Los colonos llucharon, y ganaron, la guerra d'independencia de los Estaos Xuníos (1775-83), na que contaron cola axuda de Francia y, en menor midida, de los Países Baxos y España[4].

Les Trece Colonies editar

En 1606 el rei Xacobu I d'Inglaterra concedió-yos cartes de derechos a la Compañía de Plymouth (Plymouth Company) y la Compañía de Londres (London Company) col fin de qu'establecieran asentamientos permanentes n'América. La Compañía de Londres estableció, en 1607, la que foi primer colonia permanente británica nel continente: la colonia y dominiu de Virxinia (Colony and Dominion of Virginia). La Compañía de Plymouth fundó la colonia de Popham a la vera'l ríu Kennebec, pero l'intentu nun cuayó. El Conseyu de Plymouth pa Nueva Inglaterra (Plymouth Council for New England) patrocinó dellos proyeutos de colonización, que tuvieron finalmente ésitu cola formación de la colonia de Plymouth (Plymouth Colony) de la mano del asentamiento de puritanos ingleses, conocíos anguaño como los pas peregrinos[5]. Holandeses, suecos y franceses tamién consiguieron establecer colonias al tiempu que los ingleses, pero toes elles acabaron cayendo en manes de la Corona británica. Les Trece Colonies completáronse col establecimientu de la provincia de Georgia (Province of Georgia) en 1732, magar que l'usu del términu Trece Colonies (Thirteen Colonies) fízose habitual namái nel contestu de la Revolución Americana.

La metrópolis, de magar 1660, gobernó toles colonies per aciu d'un departamentu estatal conocíu como Departamentu Meridional (Southern Department) y d'un comité del Conseyu Priváu (Privy Council) nomáu Xunta de Comerciu y Plantaciones (Board of Trade and Plantations). En 1768 creóse un departamentu específicu pa los asuntos americanos, pero les sos competencies tresfiriéronse-y en 1782 al Ministeriu del Interior (Home Office)[6].

Colonies de Nueva Inglaterra editar

1. Provincia de la badea de Massachusetts, que recibió la carta de derechos propia d'una colonia real en 1691. Incluyó a lo llargo la so historia colonial les siguientes colonies:

  • Colonia de Popham, establecida en 1607 y abandonada al añu siguiente.
  • Colonia de Plymouth, establecida en 1620 ya fusionada cola colonia de la badea de Massachusetts en 1691.
  • Provincia de Maine, establecida por licencia del Conseyu pa Nueva Inglaterra en 1622, licencia confirmada por Carlos I en 1639. Foi absorbida pola colonia de la badea de Massachusetts en 1658.
  • Colonia de la badea de Massachusetts (Massachusetts Bay Colony), establecida en 1629 ya fusionada cola colonia de Plymouth en 1691.

2. Provincia de New Hampshire, establecida en 1629, foi fusionada cola colonia de la badea de Massachusetts en 1641 y recibió la so carta de derechos como colonia real en 1679.

3. Colonia de Connecticut, establecida en 1636. Recibió la so carta de derechos como colonia real en 1662. Incluyó a lo llargo la so historia colonial les siguientes colonies:

  • Colonia de Saybrook, establecida en 1635 y fusionada cola de Connecticut en 1644.
  • Colonia de New Haven, establecida en 1638 y fusionada cola de Connecticut en 1664.

4. Colonia de Rhode Island, que recibió la carta de derechos propia d'una colonia real en 1663. Nel so territoriu hebo primero d'esi año dellos asentamientos. En 1636 Roger Williams estableció les plantaciones de Providence; en 1638 John Clarke, William Coddington y otros fundaron l'asentamientu de Portsmouth; en 1639, tres d'un enfrentamientu ente los pobladores de Portsmouth qu'acabó dixebrándolos en dos grupos, fundóse Newport; y en 1642 Samuel Gorton fundó Warwick. Estos cuatro asentamientos fusionáronse nuna única colonia real en 1663.

Les colonies de Plymouth, Massachusetts Bay, Connecticut y New Haven formaron la Confederación de Nueva Inglaterra nos años 1643-54 y 1675-80, y toles colonies de Nueva Inglaterra foron incluyíes nel Dominiu de Nueva Inglaterra (1686–1689).

Colonies centrales editar

5. Colonia de Delaware (conocida anantes de 1776 como Condaos Meridionales sobre el Delaware, Lower Counties on Delaware), establecida en 1664 como una colonia de propietariu en favor del segundu lord Baltimore. Una colonia de propietariu yera una concesión real a una persona (amiga, familiar o aliada del rei) o a una compañía, que tenía la propiedá de la tierra, el derechu a dividila y a xestionala, y a sacá-y provechu económicu ensin tar sometíu a dengún más que a la llei inglesa y al propiu rei.

 
A new map of Virginia, Maryland, and the improved parts of Pennsylvania & New Jersey, mapa de Christopher Browne de 1685.

6. Provincia de Nueva York, establecida como una colonia de propietariu, en favor del entonces duque de York, en 1664. Recibió la carta de derechos colonial en 1686 y foi incluyida, ente esi añu y 1689, nel Dominiu de Nueva Inglaterra.

7. Provincia de Nueva Jersey, establecida como una colonia de propietariu, tamién en favor del duque de York, en 1664. En 1674 estableciéronse dos colonies, East Jersey y West Jersey, que se fusionaron en 1702 pa formar la provincia. Tuvieron incluyíes les dos nel Dominiu de Nueva Inglaterra.

8. Provincia de Pennsylvania, establecida en 1681 como colonia de propietariu en favor de William Penn.

Colonies meridionales editar

9. Colonia y Dominiu de Virxinia, establecida en 1607 como colonia de propietariu en favor de dos grupos d'inversores de la Compañía de Virxinia, que formaron la Compañía de Londres y la Compañía de Plymouth, y qu'algamó l'estatus de colonia real en 1624.

10. Provincia de Maryland, establecida en 1632 como una colonia de propietariu en favor del segundu barón Baltimore.

Provincia de Carolina. La primer colonia fundada nesti territoriu foi la colonia de Roanoke; hebo dos intentos de sacala alantre, en 1585 y 1587, pero foi abandonada en 1590. Recibió la carta de derechos, como colonia de propietariu en favor de sir Robert Heath, en 1629, magar que nun entamó a poblase hasta 1651. En 1660 Carlos II anuló la carta inicial, y dio-y otra en 1663, pola que la convirtió nuna colonia de propietariu en favor d'un grupu de ocho nobles ingleses. La gran distancia ente les fasteres septentrional y meridional de la colonia fizo que, a entamos del sieglu XVIII, los lores propietarios decidieran dixebrala en dos.

11. Provincia de Carolina del Norte. Establecida en 1712, recibió la carta que-y daba la condición de colonia real en 1729.

13. Provincia de Carolina del Sur. Establecida en 1712, recibió la carta que-y daba la condición de colonia real en 1729.

13. Provincia de Georgia. Establecida en 1732 como colonia de propietariu pol rei Xurde II (del que tomó'l nome la provincia) en favor del xeneral James Oglethorpe, foi colonia real dende 1752.

Referencies editar

  1. ↑ Galloway J, Cool thoughts on the consequences of American independence, p. 57. Londres, John Wilkie, 1780.
  2. ↑ Journal of the Convention of the people of South Carolina, p. 461. Publicáu por orde de la Convención en 1862.
  3. ↑ Rodriguez JP, Slavery in the United States: A Social, Political and Historical Encyclopedia, p. 88. ABC-CLIO, 2007. ISBN 978-1-85109-544-5.
  4. ↑ Middleton R, Lombard A, Colonial America: A History to 1763. 4ª ed., 2011.
  5. ↑ Richter D, Before the Revolution: America's ancient pasts, páxs. 152-3. Cambridge, Belknap Press, 2011.
  6. ↑ Foulds NB, Colonial Office. Entrada de The Canadian Encyclopedia.

Enllaces esternos editar

Sacáu de «https://ast.wikipedia.org/w/index.php?title=Trece_Colonies&oldid=4061573»