Especie en peligru d'estinción

Una especie en peligru d'estinción ye un conxuntu d'organismos (davezu, pero non siempre, una especie tasonómica) de la que, o bien queden unos pocos exemplares, o bien tán en peligru por cambios nel so hábitat o pola caza o otros motivos y, poro, tien peligru d'estinción. Munchos Estaos tienen lleis dando proteición a estes especies nos sos hábitats: por exemplu, prohibiendo la so caza, restrinxendo el desendolcu urbanu o llendándo'l territoriu como reserva. Namás dalgunes de les munches especies en peligru tán inxertaes dientro de llistes d'especies en peligru o tienen proteición llegal. La mayor parte tienen un riesgu ciertu d'estinción ensin que la opinión pública lo sepa.

Esiste un gran discutiniu alrodiu de cuántes especies s'estinguieren nos caberos 150 años y los motivos. Les especies esapaecen por estinción dende siempre, pero'l númberu d'especies qu'esapaecieren dende la Revolución Industrial nun tien precedente n'otres dómines. Si'l ritmu d'estinción continúa a esti ritmu o s'acelera, como paez ser que ta asocediendo, les especies estinguíes nesti sieglu XXI podrán contase por cientos de miles. Demientres la xente ta entamando tar concienciao no que cinca a mamíferos y páxaros, cientos d'otres especies d'otros tipos, invertebráu, reptil, etc., dalgunes qu'entá nun conocemos, tán esapaeciendo, y ello ta alteriando l'ecosistema y la cadena trófica.

Repercusiones de la estinción

Lo que la perda d'especies trae consigo ye un tema de gran debate, especialmente importantes paecen estes cuatro repercusiones: (a) La perda de les especies como entidá biolóxica, (b) Desestabilización d'un ecosistema, (c) Peligru pa otres especies y (d) perda irreparable de material xenéticu y los conocimientos que pudieramos sacar d'él. La perda d'especies, magar fuera solo eso, yá sería un factor importante pola perda de biodiversidá y un dañu dende'l puntu vista los que camienten que'l ser humanu nun ye otro qu'una parte más de la natura. Pero, amás, ye bien conocío que la espapación d'una especie trai la desestabilización de la cadena trófica o d'alimentación nun ecosistema y que d'ello otres especies tornen en peligru.

A lo último, la perda de conocimientu del material xenéticu qu'esapaez tamién ye un factor a tener en consideranza. Cada especie tien un material xenéticu irrepetible nel so DNA que da información, ente otres coses, de rempuestes químiques que puen ser mui valioses pa, por exemplu, curar una enfermedá. Por exemplu, en llugares del centru de China, hai ciertes plantes que paecen producir una droga efectiva escontra la malaria, enfermedá qu'entá anguaño mata a millones de persones. El conocimientu del códigu d'estes plantes podría valinos pa saber cómo producir esa droga de forma artificial.

Referencies

Enllaces esternos

Wikimedia Commons tien conteníu multimedia tocante a Especie en peligru d'estinción.