Espor d'Asturies

Espor d'Asturies
Situación
Datos
Tipu	club deportivu
Fundáu en	2008
	;

Espor d'Asturies – Espor[a] foi un Club Deportivo Básicu que naz a finales del añu 2008 como respuesta d'un grupu de persones, comprometíu cola cultura tradicional asturiana, pa la situación actual de los xuegos tradicionales asturianos. Miembru fundador del Conceyu Nacional de Liriu. Miembru de l'Asociación Europea de Xuegos Tradicionales.

Oxetivos

La perspeutiva d'Espor d'Asturies, dende un primer momentu, nun ye quedase únicamente nun contestu competitivu, sinón que los sos oxetivos busquen poner en valor la cultura física del país, ufiertar modelu pa un estudiu oxetivu de la etno-ludo-motricidá asturiana y, sobre too, preparar unos cimientos que sofiten l'espardimientu de los xuegos y deportes tradicionales. Les aiciones d'Espor[a] van empobinaes por eses directives hacia la meta final: consiguir que los xuegos tradicionales vuelvan a la cai.

Aiciones y collaboraciones

Enantes de formalizase como Club Deportivo Básciu, Espor d'Asturies yá collabora cola Tertulia Cultural "El Garrapiellu" de Xixón nel "II Cursu Básicu de Monitor de Xuegu y Deporte Tradicional", n'avientu de 2008, pa facer una breve introducción de los bolos de Tinéu y del liriu. Espor d'Asturies preséntase en sociedá nel programa radiofónicu "Acuto", de la RPA, nesi mesmu mes d'avientu. Dende l'aniciu de les sos actividaes, el liriu va tomar gran importancia pa Espor d'Asturies, embarcáu nel proyeutu d'esportificación d'esti xuegu nomáu Conceyu Nacional de Liriu. Miembru fundador del mesmu, xunto a los equipos Quirinal y Asturlirio, roblará l'Alcuerdu pa la Celebración del I Campeonatu d'Asturies de Liriu, el 18 de xunetu de 2009 y participa de forma activa nel conceyu d'Illas pa la celebración del II Campeonatu y la creación del I Campeonatu d'Asturies de Liriu Individual. Ye miembru de la Promotora de la Federación Asturiana de Liriu y Asemeyaos. En xunetu de 2009 participa nel Alcuentru Internacional de Xuegos Tradicionales celebrada n'Aranda del Dueru (España), onde mostrará'l liriu y el so procesu d'esportificación. Pal añu 2010, la Asociación Europea de Xuegos Tradicionales acepta la incorporación d'Espor d'Asturies como miebru de plenu drechu. Y en xunetu d'esi mesmu añu, nel Alcuentru de Guarda (Portugal), el club asturianu presentará'l xuegu d'a manaes. Diverses organizaciones recurren dende un principu a Espor d'Asturies pa qu'organice alcuentros de xuegos tradicionales. Asina, celebra delles gymkhanes de xuegos tradicionales pa la Escuela de Música Tradicional de Noreña y la Casa d'Asturies en Valencia. En tierres valencianes, Espor d'Asturies ponse en contautu cola Escola Valenciana de Jocs Tradicionals pa la celebración d'un alcuentru de liriu/pic i pala.

Compromisu cola llingua asturiana

Dao que'l xuegu nun ye'l simple fechu de l'actividá física sinón toles rellaciones sociales que lleva venceyaes, ún de los oxetivos d'Espora ye qu'eses rellaciones se dean n'asturianu, faciendo usu del bayurosu léxicu que tien esti idioma pa cadún de los xuegos que n'Asturies son tradicionales. Nesti sen y nel apueste claru de la defensa de la cultura tradicional, Espora vien collaborando col movimientu de reivindicación llingüística mesmo que cola Academia de la Llingua Asturiana. Asina, tuvo al llau del Conceyu Abiertu pola Oficialidá, na xornada 10.000 Semeyes pola Oficialidá, celebrada en La Pola (Siero), y nos Cursos de Branu entamaos pola Academia de la Llingua Asturiana. Dende entós, esti Club vien contando col sofitu de la institucion cimera de la llingua asturiana pa la celebración de les xornaes que-y correspondió entamar nel Campeonatu d'Asturies de Liriu. Amás, apostó dende'l primer momentu por facer del asturianu l'idioma vehicular del Conceyu Nacional de Liriu, institucionalizáu dafechu en llingua asturiana, mandándose d'ella en toles sos publicaciones y recuperando'l vocabulariu tradicional d'esti xuegu. Espor d'Asturies fai usu llingua asturiana en tolos documentos asoleyaos, medios de comunicación, redes sociales y eventos nos que participa, n'Asturies y allende les sos fronteres.

Xuegos

Espor d'Asturies trata de recoyer y espardir el mayor númberu de xuegos de la bayurosa cultura ludomotriz asturiana. L'apueste pola esportificación del liriu nun impide que dientro'l club practique tamién el bolu de Tinéu, anque ensin tar federaos. Amás, dientro de los diversos eventos organizaos pol club suelen contase multitú de xuegos, dende'l dexabolu hasta a manaes, pasando poles carreres de llecheres, de panoyes, el tiru con gomeru, el cascayu, el tiru al palu o el pañuelu, ente munchos otros.

Seición de liriu

Equipu de liriu d'Espora nel I Alcuentru Xixón de Liriu, payares de 2009

Espor d'Asturies ye miembru fundador del Conceyu Nacional de Liriu y el so compromisu pola recuperación d'esti xuegu tradicional yá lu llevó a tierres castellanes, gallegues y valencianes, n'alcuentros con organizaciones que tan impulsando los diferentes xuegos de los dos palos autóctonos pa de so. Al so llabor organizativu, tanto institutional como d'alcuentros, hai que nomar los diferentes trunfos algamaos nes dos primeres temporades de liriu como deporte, dende que disputare'l so primer eventu, el III Abiertu'l Pitu Caleya de Piarnu, en xunu de 2009:

Campeón d'Asturies de Liriu 2009, venciendo nes trés xornaes.
Campeón d'Asturies de Liriu 2010.
1ᵘ nes xornaes 1, 2 y 5 del Campeonatu d'Asturies 2010.
1ᵉʳ y 2ᵘ clasificaos nel Campeonatu d'Asturies de Liriu Individual 2010 (Suari y Sergio)
I Abiertu'l Barreñón (Iyán)
I Abiertu Llonganiza d'Avilés (Luis Riaño)
I Abiertu'l Llacón Internacionalista (Sergio)
I Alcuentru de Navidá de Liriu (Sergio)
I Abiertu de Liriu de La Caizuela (Suari)
I Abiertu de Piedrasblancas (Suari)
II Alcuentru de Navidá de Liriu (Sergio)