Fernando Beltrán

Fernando Beltrán (1956, Uviéu) ye un poeta asturianu.

Fernando Beltrán
Vida
Nacimientu	Uviéu, 1956 (67/68 años)
Nacionalidá	España
Estudios
Llingües falaes	castellanu
Oficiu	poeta, escritor
Xéneru artísticu	poesía

Biografía

Poeta y nomador. Nacíu n'Uviéu en 1956, treslládase a Madrid en 1964, onde anguaño mora.

En 1982, llogró con «Aquelarre en Madrid» l'accésit del Premiu Adonáis, nel mesmu añu que Luis García Montero ganó dichu premiu con «El xardín estranxeru». «Aquelarre en Madrid» foi reeditáu delles vegaes con posterioridá.

La poética del autor quedó definida al traviés de dos manifiestos. En 1987 espublizó'l manifiestu Perdimos la pallabra nel diariu El País, y darréu tamién foi l'autor d'Hacia una poesía entrometida, apaecíu na revista Lleer en 1989. Esti segundu manifiestu ye de gran importancia pa entender al autor como «poeta entrometido», como asina se define él mesmu. Con anterioridá'l poeta fuera unu de los fundadores del Sensismu, 1980, un movimientu que supunxo un refugu xeneracional a les corrientes estétiques culturalistes de los Novísimos nos años setenta.

A lo llargo de los años espublizó más de quince poemarios. La so obra foi traducida parcialmente a numberosos idiomes y de forma completa al francés nun llibru tituláu L’Homme de la Rue pola editorial L’Harmattan. Creador de l'«Aula de las Metáforas», una biblioteca poética a la que l'autor donó dos mil quinientos exemplares, y que s'atopa allugada na Casa de Cultura de Grau (Asturies). Fernando Beltrán preside la «Fundación Aula de las Metáforas».

Anguaño ye direutor de la revista poética «El hombre de la calle». Amás de poeta, ye profesor del Institutu Européu de Diseñu, de la Escuela Cimera d'Arquiteutura y ye fundador del estudiu creativu El nombre de las Cosas, estudiu que dio nome a empreses como Amena, Faunia, OpenCor o Rastreator.

Poética

La poética de Fernando Beltrán ocupa un llugar singular dientro de la poesía española contemporánea, yá que per una parte nun se-y puede adscribir a una corriente poética concreta pero al empar ye incluyíu pola crítica en delles d'elles. Esta aparente contradicción esplícase pola riqueza de matices de la so poesía, que presenta les siguientes carauterístiques:

a) Poesía “dende” la esperiencia. Como l'autor señaló en delles ocasiones, y apaez reflexáu na introducción escrita por Leopoldo Sánchez Torre pa l'antoloxía El hombre de la calle, la poesía de Fernando Beltrán tien como puntu de partida la esperiencia del autor. Pero la esperiencia personal nunca ye'l fin del poema, sinón namái el so principiu, el so puntu de partida. El poeta redacta la so poesía ensin saber la so direición final y dexando que seya'l mesmu poema y la so capacidá de vuelu ya imaxinación quien tresforme en testu poéticu autónomu la esperiencia vital del poeta: "Hai que salir siempres del poema d'una forma distinta a como entrasti nél".

b) Poesía social o “entrometida”. Na poesía de Fernando Beltrán, l'home nun ye namái un individuu sinón que tamién forma parte de la coleutividá. Ye lo que'l poeta denomina l'home de la cai («El hombre de la calle») con toles circunstancia que lu arrodien, cuantimás na so redolada urbana. El suxetu poéticu sabe que tien la partida perdida pero nun se rinde y se descara y remóntase nun continuu inconformismu y rebeldía que denuncia y fala con llibertá.

c) Elementos d'Irracionalismu y Surrealismu. El poeta parte d'una esperiencia cotidiana, pero tala esperiencia puede non yá trescender la esperiencia diaria sinón trescender la racionalidá del ser humanu y la so redolada, al traviés tantu d'imáxenes surrealistes como d'elementos que lu averen n'ocasiones al irracionalismu. El yo poéticu vese tresformáu por planos del subconsciente que remanecen tantu na so conciencia individual como na colectiva.

d) L'amor y el romanticismu. L'amor surde como una gran constante na poesía del poeta, como'l verdaderu “entrometimientu”, “viaje sin fin / a la mujer poema” en cada muyer, inalcanzable nel so sentíu más becquerianu, amada invencible como reza unu de los sos títulos, pero raspiada dende les mesmes esperiencies del autor. El poeta tresforma la residencia na tierra en residencia nel cuerpu, verdaderu catalizador del so espíritu vital. Como señala l'autor, l'amor suel ser puntu de llegada de los sos poemes.

Poemariu

• “Aquelarre en Madrid”, Rialp, 1983, accésit Premiu Adonáis (segunda edición Ediciones Vitruvio 1998, tercera edición Ediciones Vitruvio 2005).
• “Ojos de Agua”, El Observatorio, 1985.
• “Cerrado por reformas”, La Favorita, 1988.
• “Gran Vía”, Libertarias, 1990.
• “El Gallo de Bagdag y otros poemas de guerra”, Endymión, 1991.
• “Amor ciego”, Huerga y Fierro editores, 1995.
• “Bar adentro”, El Barco Ebrio, 1997. (segunda edición 1998, tercera edición 1999, cuarta edición 2000, toes en «Diarios de Helena»).
• “La semana fantástica”, Hiperión, 1996.
• ”El hombre de la calle”, Maillot Amarillo, 2001. Antoloxía.
• “Trampas para perder”, El Barco Ebrio, 2003.
• “L’Homme de la Rue”, L’Harmattan, 2004. Antoloxía en francés.
• ”La amada invencible. 80 poemas incurables”, KRK, 2006. Antoloxía de poesía amorosa.
• ”El corazón no muere”, Hiperión, 2006.
• ”Mujeres encontradas”, Sins Entido, 2008.
• ”Donde nadie me llama”, Hiperión, 2011. Obra completa.
• ”El Nombre de las Cosas”, Conecta - Random House Mondadori, 2012. Ensayu.
• ”Sólo el que ama está solo”, Ediciones In Pectore, 2012. Poesía. Ilustraciones Pep Carrió.
• ”Hotel vivir”, Ediciones Hiperión, 2015. Poesía.

Enllaces esternos

• Páxina d'historia de poesía del sieglu XX realizada pol críticu Ángel Luis Prieto de Paula
• Páxina na que'l poeta exerz de nombrador de les coses
• Enllaz a l'Aula de les Metáfores
• Artículu nel diariu El País
• Entrevista en TVE sobre'l llibru "Muyeres atopaes"
• Páxina web del proyeutu Muyeres atopaes

• Datos: Q5859238