Fuelga xeneral n'España de 1917
La fuelga xeneral n'España de 1917 o fuelga xeneral revolucionaria de 1917 referise a la fuelga xeneral —considerada pol so calter una fuelga xeneral revolucionaria— que tuvo llugar n'España'l mes d'agostu de 1917. Foi convocada pola UXT (socialista) y el Partíu Socialista Obreru Español, y en dellos llugares foi sofitada pola CNT (anarcosindicalista). La fuelga xeneral tuvo llugar nel contestu históricu de la crisis de 1917, mientres el reináu d'Alfonso XIII y el gobiernu d'Eduardo Dato.
.jpg)
La fuelga
editarLos planes de la fuelga xeneral viéronse alteriaos cuando'l 19 de xunetu de 1917, coincidiendo cola Asamblea de Parllamentarios axuntada en Barcelona, empezó una fuelga de los ferroviarios de Valencia, afiliaos a la UXT, pola mor del conflictu llaboral que calteníen cola empresa Compañía de los Caminos de Fierro del Norte d'España. Nes negociaciones la empresa negose a readmitir a los 36 obreros que fueren despidíos, postura inflexible que'l sofitu decidíu del Gobiernu -el 21 de xunetu'l Capitán Xeneral de Valencia declarara l'estáu d'esceición. La respuesta diola la Federación Ferroviaria d'UXT, que'l so secretariu Daniel Anguiano anunció que si la empresa nun vencía empezaría una fuelga de tol sector el 10 d'agostu -a pesar de que Anguiano yera consciente de que nun tenía de desencadenase nengún conflictu previu a la fuelga xeneral, pero la presión de los sos afiliaos obligó-y a ello-. La empresa nun dio marcha tras, polo que la dirección de la Unión Xeneral viose envolubrada nuna difícil tesitura yá que, per un sitiu, nun podía dexar abandonaos a los ferroviarios, pero, per otru llau, «dir al movimientu revolucionariu ensin tar preparaos yera dir al fracasu seguru», como afirmó dempués un dirixente socialista. Finalmente'l comité de fuelga socialista -compuestu por Francisco Largo Caballero y Daniel Anguiano por UXT y por Julián Besteiro y Andrés Saborit pol PSOE- decidió declarar la fuelga xeneral para'l llunes 13 d'agostu, trés díes depués de la fuelga ferroviaria que tenía d'empezar el día 10.
Con éses finalmente la fuelga xeneral revolucionaria convocóla namás UXT conjuntamente col PSOE obligaos pola fuelga del sindicatu ferroviariu d'UXT de Valencia, convocada por motivos llaborales internos, que bastió la suma de les demás secciones del sindicatu por tol país ente'l 10 y el 13 d'agostu.[1]
A pesar de lo precipitao de la convocatoria, al empezar la fuelga consiguiéronse paralizar les actividaes en casi toles grandes zones industriales (Vizcaya y Barcelona, inclusive delles menores como Yecla y Villena), urbanes (Madrid, València, Zaragoza, La Coruña), y mineres (Ríu Tintu, Xaén, Asturies y Llión); pero solu mientres unos pocos díes, a lo sumo una selmana. Nes ciudaes pequeñes y les zones rurales nun tuvo apenes repercusión. Les comunicaciones ferroviaries, un sector clave, nun se vieron alteriaes por enforma tiempu.[2]
El balance oficial de la represión fueron 71 muertos, 156 mancaos y 2 000 deteníos. Tamién se producieron dellos muertos ente les fuerces del orde, ente ellos cuatro guardias civiles.[3]
Para facilitar la salida de la crisis, el rei sustituyó al conservador Eduardo Dato pol lliberal Manuel García Prieto, al mandu de un gobiernu de concentración nacional nel que tamién entró Cambó.
Los miembros del Comité de Fuelga fueron sometíos a un conseyu de guerra acusaos del delitu de sedición, siendo atopaos culpables y condergaos a cadena perpetua'l 29 de setiembre de 1917. Asina Largo Caballero, Saborit, Besteiro y Anguiano fueron conducíos al penal de Cartaxena. Desencadenóse entós una amplia campaña popular de solidaridá colos condergaos que nun llogró nenguna resultancia, hasta que'l PSOE incluyiolos nes sos llistes de candidatos para les elecciones xenerales de febreru de 1918, resultando escoyíos los cuatro, qu'al pie de Pablo Iglesias y Indalecio Prieto, tamién escoyíos pola coalición Alianza d'Esquierdes, formaron la minoría socialista del Congresu de los Diputaos. La elección como diputaos obligó al gobiernu a concede-yos l'amnistía'l 8 de mayu de 1918 tomando posesión de los sos escaños diez díes dempués.[4]
La presencia nes Cortes de los cuatro miembros de Comité de Fuelga dexó-yos intervenir nel alderique parlamentariu sobro la fuelga xeneral, aportunando nos motivos qu'aniciaren el conflictu -la crisis de subsistencies y la crisis de trabayu y la nula repuesta qu'atoparen nel gobiernu- y denunciando la estrema durez que s'emplegara pa reprimila.[5]
La fuelga tamién foi oxetu d'alderique mientres el XIII Congresu d'UXT celebráu n'ochobre de 1918. Indalecio Prieto afirmó que «la fuelga fracasó nel momentu que el comité decretó que fora pacífica», y que de nun faese «revolucionariamente» sería meyor nun faela, a lo que Largo Caballero, miembru del comité de fuelga, respondió: «Acúsasenos de nun preparar debidamente un movimientu revolucionariu cuando lo que se nos encargara preparar foi una fuelga xeneral».[6]
Referencies
editar- ↑ García Queipo de Llano, 1997, p. 60.
- ↑ Ruiz González, 1987, páxs. 500-501.
- ↑ Silva, 2018, p. 188.
- ↑ Aróstegui, 2013, páxs. 110-111.
- ↑ Aróstegui, 2013, páxs. 111-112.
- ↑ Aróstegui, 2013.
Datos: Q429324
Multimedia: 1917 Spanish general strike
