Impuestu al vidriu
L'impuestu al vidriu creóse en Gran Bretaña en 1746, baxo'l reináu de Xurde II.
Orixinalente, esti impuestu aplicábase a los materiales usaos pa la fabricación de vidriu.[1] Nesa dómina, el vidriu vendíase al pesu, y los fabricantes respondieron produciendo oxetos más pequeños y más decoraos, de cutiu con partes güecos, conocíos güei como "vasos pa impuestos especiales".[2]
L'impactu d'estos impuestos foi que munches fábriques de vidriu tuvieron que treslladar los sos negocios a países cercanos, de vezu a Irlanda. En 1780, el gobiernu concedió a Irlanda el llibre comerciu de vidriu ensin impuestos, lo que dio llugar al establecimientu de fábriques de vidriu en Cork y Waterford. Depués de les campañes contra eses lleis, l'impuestu al vidriu treslladóse en 1811 a tolos productos fabricaos con vidriu, por casu, botelles de vidriu verde, ventanes y vidriu flint. Los pesaos oxetos decorativos de vidriu y los grandes ventanales convirtiéronse en símbolos de riqueza nesti periodu. Esto tamién significó que namás los bien ricos podíen dexase invernaderos y la fruta que nellos se cultivaba. En 1825 modificóse nuevamente l'impuestu especial sobre'l vidriu, incluyendo les materies primes y aumentando los tipos impositivos sobre los productos de vidriu finales.[3]
Adulces, la industria decayó, hasta que'l gobiernu de Robert Peel abolió l'impuestu al vidriu en 1845.(Tait, 2004)
Un relatu contemporaneu na revista médica The Lancet describió l'impuestu al vidriu como un "impuestu absurdu a la lluz":
Dende'l puntu de vista hixénicu, l'enorme impuestu sobre'l vidriu, que xube a más del trescientos per cientu del so valor, ye unu de los más crueles qu'un gobiernu podría imponer a la nación... La falta de lluz nes viviendes urbanes, debíu en gran midida al enorme costu del vidriu, almítese universalmente que ye una de les principales causes de falta d'hixene de les ciudaes...[4]
Bibliografía
editar- Glass, Collins Archaeology, 1980, ISBN 978-0-00-211379-3
- Tait, Hugh, ed. (2004), Five Thousand Years of Glass, ISBN 978-0-8122-1888-6
Referencies
editar- ↑ «Glass tax» (inglés).
- ↑ (Hurst-Vose, 1980)
- ↑ Kane, Kathryn (2008-10-10). «The Glass Excise and Window Taxes» (inglés).
- ↑ The Duty on Glass, 1, 22 de febreru de 1845, doi:, https://books.google.com/books?id=aP4BAAAAYAAJ
Datos: Q5567130
