Jodo
El Jodo (杖道, jōdō), lliteralmente “vía del palu”, ye un arte marcial xaponés qu'utiliza’l jo, un palu de 1 metru 28 cm de llargor y 2,5 cm de diámetru. Vien direutamente del Jojutsu (jō-jutsu, “arte del palu”) creáu por Muso Gonnosuke hai 400 años.
 | |
| Tamién | Pa munchos ye lo mesmo que “jojutsu” |
|---|---|
| Enfoque | Fundamentalmente’l “jo” como arma defensiva y la espada como arma ofensiva |
| País d'orixe |
 Xapón |
| Fundador | Muso Gonnosuke (creador del “jojutsu”) |
| Fecha de fundación | aprox. 1605 |
| Paternidá | Jojutsu |
| Deporte olímpicu | Non |
| Sitiu oficial | www.kendo-fik.org |
 | |
Historia
editarFundación
editarLa fundación del jodo, baxo la forma de Shindo Muso Ryu o Shinto Muso Ryu (Muso, pol nome’l fundador), atribúise a Muso Gonnosuke haza'l 1605.
La lleenda cunta que Muso Gonnosuke Katsukichi aportó a Edo, actual Tokiu, constituyida nueva capital pol shogunatu Tokugawa. Ellí había midise coles munches espaes célebres de la ciudá y nunca foi vencíu. Pero un día enfrentóse a Miyamoto Musashi, que lu caltuvo a raya gracies a una carauterística téunica de parada emplegando les dos espaes cruzaes (“nito seiho”)[1]. Dempués d'esta derrota, Gonnosuke viaxó pel país pa estudiar diversos estilos al envís de vengase de Musashi.
Retiróse 37 díes al santuariu de Kanado. Una nueche, un mensaxeru divín apaecióse-y nun suañu baxo la forma d'un neñu que-y dicía: "Busca’l plexu solar con un palu cilíndricu”. Inspirándose nesti mensaxe celestial, Gonnosuke atalantó una nueva arma, que yera un simple palu aproximao 30 cm más llargu que la media d'una espada. Asina nació’l jo (jō).
Del jojutsu al jodo
editarEn 1940 el jojutsu cambió a jodo (vía del palu) per aciu del maestru Takaji Shimizu (1896–1978), de la Shindo Muso Ryu. De siguío esta disciplina defensiva púnxose a disposición de les fuercies policiales.
Munchos grupos o llinies, sicasí, usen indistintamente inda güei los términos “jojutsu” y “jodo”, como nomes d'una mesma cosa.
Práutica
editarEl jodo prautícase en pareya. Ún de los prauticantes remana una espada de madera (bokken) que representa una(katana), y l'otru lleva un jo. Los movimientos tán codificaos na forma de kates, que simulen combates. De cutiu’l jodo prautícase dientro un dojo, y raramente al aire llibre. Nun se necesiten cualidaes atlétiques esceicionales pa prauticalu. Nun hai cayíes nin golpaes violentes. La mayor parte de los clubes aceuten prauticantes dende los 14 o 15 años, ensin tope d'edá máximu.
L’aprendimientu faise per aciu del estudiu de los movimientos fundamentales nel manexu del palu, primero “al aire” (kihon tandoku) y llueu énte un collaciu (kihon sotai). Siguidamente los dos trabayen l'enfrentamientu, caún turnándose pa xugar el papel d'atacante, y adautando l'otru al ataque la respuesta afayadiza.
La práutica del jodo busca sobre too algamar el dominiu d'unu mesmu per aciu de caltener un espíritu fuerte y vixilante (“zanshin”) y controlar los movimientos de la forma más amañosa, simple, pura, adautada y eficaz pa facer frente a una agresión.
Material
editarLa vistimienta del jodo aseméyase a la de les otres artes marciales xaponeses. Compónse d'un keikogi (chaqueta y pantalón) n’algodón azul, d'un hakama (pantalón tradicional, peranchu) y d'un obi (cintu).
L’armamentu consta d'un jo, palu de más o menos 1,28 m de llargor y 2,5 cm de diámetru, en madera perduro (davezu carbayu albar xaponés o ramín, una especie tropical), y d'un bokken (espada de madera).
Kates
editarLa escuela Shindo Muso Ryu organiza les kates en dellos conxuntos, d'esta miente:
- Omote: 2 formes col envís d'entrenar téuniques básiques pa llograr una bona postura, apariencia y téunica.
- Chudan: 13 formes de nivel mediu. Los movimientos son rápidos y con puxu.
- Ran-ai: síntesis d'omote y chudan. Estes son les formes que deseaba aprender antiguamente la clas media.
- Kage: 14 formes empobinaes al entrenamientu de la mente. Nun son mui rápides, pero precisen un espíritu aliellu. Ye la base del entrenamientu de la mente, onde l'alumnu pue atopar una verdadera “sensación de Budo”.
- Gohon no Midare: son les formes atalantaes por Shimizu Takaji Katsuyasu, 25 Gran Maestru (non oficial) del ryu. Ye una síntesis d'omote, chudan, kage y ran-ai.
- Samidare: considérase’l nivel mediu del entrenamientu de la mente. La téunica tamién requier dignidá. Estes son les formes cimeres, que nun pueden algamase ensin una perfeuta harmonía de mente, téunica y cuerpu (“shingitai”).
- Okuden: son formes qu'únicamente s’aprienden a persones perconcretes que sobresalen n’habilidá mental, téunica y física dempués de munchos años d'entrenamientu.
- Hiden-gokui (Gomusono-jo): formes secretes.
El Jodo anguaño
editarAnguaño’l jodo sigue básicamente dos tendencies. Una ye’l jodo koryu, o de la vieya escuela, que tamién inclúi otres artes y armes, como’l palu curtiu (tanjo), la foz con cadena (kusarigama), la porra policial (jitte), y un arte menos conocíu llamáu hojojutsu, l'arte d'amarrar a un oponente namás dominalu. Toes elles apunten a fuertes conexones del jodo col llabor de les fuercies de la llei, yá que quiciabes foi pa esto pa lo que s’emplegó orixinalmente.
La otra tendencia ye’l Seitei Jodo o jodo unificáu, enseñáu y dirixíu pola Federación Xaponesa de Kendo (AJDF, Zen Nippon Kendō Renmei) xuntamente col kendo, la vía de la esgrima xaponesa, y l'iaido, la vía de desenvainar y cortar con una espada real. El Seitei Jodo entama con 12 formes prefixaes (kata), escoyíes nel sistema koryu. Namái dominar estos 12 kates, l'estudiante ponse a estudiar les escueles antigües.
Güei, el jodo adautóse pal usu poles fuercies policiales xaponeses, que lu denomen keijojutsu, o arte del palu policial.
Referencies
editar- ↑ Oscar Ratti, Adele Westbrook, Secrets of the samurai: a survey of the martial arts of feudal Japan, Tuttle Publishing, 1991, páxs. 308-309, 484 p. ISBN 0804816840
Bibliografía
editar- Michael Finn: The Way of the Stick Paul H Crompton, 1984, ISBN 0-901764-72-8
- Pascal Krieger: Jodô - la voie du bâton / The way of the stick (bilingual French/English), Geneva (CH) 1989, ISBN 2-9503214-0-2
- Matsui: Jodo Nyuumon (en xaponés, con ilustraciones de kihon y tolos kates seitei) Tokiu, 2002, ISBN 4-88458-018-4
Enllaces esternos
editar- Federación Internacional de Kendo, Iaido y Jodo
- Federación Europea de Kendo, Iaido y Jodo
- Federación Europea de Jodo Archiváu 2006-01-14 en Wayback Machine
- Sei Ryu Kai, dojo de Nishioka Tsuneo
- Grupu de Siguehiro Matsumura Archiváu 2011-01-29 en Wayback Machine
- Jodo Kai España Archiváu 2010-06-30 en Wayback Machine
- Shindo Muso Ryu Jodo
- Jodo nel sitiu de la organización Jikishin-kai Archiváu 2011-07-13 en Wayback Machine
- Takeda Ryu Maroto Ha - Jodo y Shugi Jutsu
- - hokujoukai
